TEUNGÁ MO E FŌTUNGÁ
Ko ʻEku ʻAlu ʻo Fakatau mo ʻEku Faʻeé
Teunga taau ke fakahāʻaki hoʻo fakaʻapaʻapa ki he ʻOtuá pea mo koe foki. ʻOua naʻá ke teitei tuku hifo ʻa e tuʻunga taau ʻo ho teungá koeʻuhí ko ha faʻahinga meʻa pē ʻoku hoko. ʻOua te ke maumauʻi ho fōtungá ʻaki ʻa e ngaahi tā-tataú [pe] hoka fakaavaava ʻo ho sinó.
Naʻe fai ʻema fakatau mo ʻeku faʻeé ʻo u sio ai ʻi ha piva ʻuliʻuli naʻá ku fuʻu fie maʻu. Naʻá ku ʻahiʻahiʻi e pivá peá u haʻu ʻo fakaʻaliʻali ange ki heʻeku faʻeé. Naʻá ne kiʻi tuʻu siʻi peá ne toki pehē mai, “ʻE Peki, mahalo ʻoku kiʻi nounou e pivá.” Naʻá ku talaange ʻoku ʻikai pea ʻoku tui ʻe he tamaiki fefine kotoa he akó ʻa e sīpinga tatau pē—pea naʻe toe nounou ange e ʻū piva ia ʻe niʻihi. Ne ʻosi e ngaahi miniti mo ʻeku feinga ke fakalotoʻi ia ke saiʻia he pivá.
Naʻe faifai pea pehē mai ʻeku faʻeé ʻi ha leʻo fefeka, “ʻOku fuʻu nounou. He ʻikai ke ta fakatau ia. ʻAlu ʻo fetongi.”
Naʻe ʻikai ke mahino kiate au ʻene fuʻu tuʻutuʻuni fefeka peheé he ne u ongoʻi ʻe au kuó u fuʻu lahi feʻunga ke fili ʻa e vala ke u tuí. Naʻe mole e fakafiefia ʻo ʻema ō ki falekoloá peá ma tauʻaki fakalongolongo pē heʻema foki ki ʻapí.
Naʻe faifai pea pehē mai ʻe heʻeku faʻeé, “ʻE Peki, ko hono ʻuhinga naʻe ʻikai ke u tuku ai ke ke fakatau e pivá he ʻoku ʻikai feʻunga ia mo koe. Naʻe fuʻu nounou e pivá pea naʻe ʻikai te ne fakaʻaliʻali mai ho tuʻunga totonú. Ko ha ʻofefine koe ʻo e ʻOtuá.”
Ne akoʻi kiate au ʻe he fakamatala ʻa ʻeku faʻeé ha tefitoʻi moʻoni te u manatuʻi maʻu pē. Ko ha ʻofefine au ʻo e ʻOtuá, pea ʻoku tala ʻe he meʻa kotoa pē te u fai mo e meʻa te u tuí ʻa e anga ʻo ʻeku fakakaukau kiate au peé mo ʻeku ongo ki heʻeku Tamai Hēvaní mo hoku Fakamoʻuí.
ʻOku faingataʻa maʻu pē ke u fili ki he teunga tāú, ka ʻoku ou fakamālō naʻe ʻikai te u tukulolo ʻo fai ha meʻa ʻoku fehangahangai mo ʻeku tuʻunga moʻuí. ʻOku ou ʻilo kapau ʻe lava ʻo mahino moʻoni kiate kitautolu ko e fānau kitautolu ʻa e ʻOtuá, te tau ikunaʻi ʻa ʻetau holi ke tui ʻa e vala ʻoku fakaʻaongaʻi ʻe māmaní.