Ko e Tui ke Taʻofi ha Tāfea
Ko ha ʻaho ʻeni ʻi he faʻahitaʻu failaú ʻi Helesingikī ʻi Finilani. Ne ulo lahi ʻaupito e laʻaá pea vave e vaia ʻa e sinoú. Ne lau houa ʻeku ngāue mo ʻeku ongo tama tangatá, ko Siua ʻa ia naʻe taʻu valu, mo Hanui naʻe taʻu ono, ke taʻofi e tafe mai ʻa e sinou kuo vaiá ki homau loki ʻi lalo falé. Naʻe kei fonu ʻaisi pē ʻa e fakatafenga vai ko ia naʻe mei tafe ai e vai ko ʻení.
ʻI he mavahe atu hoku husepānití ki he ngāué he pongipongi ko iá, naʻá ne talamai ke mau fakapapauʻi ʻoku ʻikai tafe mai ha vai ki he loki ʻi laló. Naʻa mau ngāue mālohi ʻo aʻu ki he hoʻatā, mo e hoko e taimi ke ō ai ki he Palaimelí. (ʻI he taimi ko iá naʻe fai e Palaimelí ia ʻi he lolotonga ʻa e uiké). Ka ne u talaange ki heʻeku ongo tamaikí he ʻikai te na ō ki he Palaimelí ka na nofo ʻo tokoni mai kiate au ke taʻofi ha tafe ʻa e vaí ki he loki ʻi laló. Pea ko e tahá, naʻe ʻikai foki ke Siasi hoku husepānití pea he ʻikai mahino kiate ia hono mahuʻinga ʻo e Palaimelí ki heʻema ongo tamaikí.
Naʻe lea fakataha mai ʻa Siua mo Hanui ʻo fakapapauʻi mai kapau te mau ō ki he Palaimelí, ʻe tokangaʻi ʻe he Tamai Hēvaní ke ʻoua naʻa tafe ha vai ki he loki ʻi laló. Ne fefokiʻaki ʻeku sió mei he vaí ki he mata ʻo ʻeku ongo tamaikí ʻa ia ne hā mei ai ʻa ʻena tuí. Naʻe pehē ʻe ha konga ʻo hoku lotó, “He ʻikai lava ke ke ʻalu koeʻuhí he ʻikai ha mālohi ia te ne lava ke taʻofi ha tāfea ʻa e loki ʻi laló.” Ne u lotu ʻi hoku lotó ʻo kole ki he Tamai Hēvaní. Hili ko iá ne u fai ha fili faingataʻa.
Ne u lī ki lalo e ongo kané peá u talaange, “Te tau ō ki he Palaimelí he taimí ni!” Tatau ai pē pe ko e hā e meʻa ʻe hokó, he ʻikai te u fakatupu ha maumau ki he tui ʻa ʻeku ongo tamaikí.
Naʻe fiefia e ongo tamaikí ʻi he Palaimelí. Ka ʻi heʻemau foki ki ʻapí, ko ʻemau ofi ange ki homau falé, ko e lahi ange ia ʻeku tailiilí. ʻI heʻemau aʻu atú, ne lele fakavave e ongo tamaikí ki he matapā ʻo e loki ki laló. ʻI heʻena sio hifo ki laló, naʻá na kaila mai, “Fineʻeiki, naʻá ma ʻosi talaatu pē.” Ne u fakavave atu. He ʻikai teitei ngalo ʻiate au ʻa e meʻa fakaʻofoʻofa ne u mamata ki aí. Ne mātuʻu lelei e lokí ʻo hangē pē naʻe mopí. Naʻe ʻikai ʻasi ha vai ʻi ha feituʻu. Naʻa mo e taimí ni, ʻa ia ko e ʻosi ʻeni ʻa e taʻu ʻe 40 mei ai, ʻoku kei faingataʻa pē ke u tui ki he meʻa ne u mamata ki aí.
Naʻe hā mei he mata ʻo ʻeku ongo tamaikí ʻa ʻena fiefia mo e falala ki he Tamai Hēvaní. Naʻe fonu foki mo hoku lotó ʻi he fiefia—mo e loto houngaʻia!
He ʻikai lakasi ʻe ha mālohi ʻi he māmaní ʻa e tui ʻa e fānau īkí. ʻOku pehē ʻe he folofolá kapau te tau tui pea ʻoua ʻe [veiveiua], te tau lava ʻo hiki ha moʻunga (vakai, Mātiu 17:20). ʻI he ʻaho ko iá ne hanga ʻe he tui ʻa ʻeku ongo tamaikí ʻo taʻofi ha tāfea.