TAUHI ʻO E ʻAHO SĀPATÉ

Ko e Fē Feituʻu ʻOku Totonu Ke u ʻI aí?

FAI ʻE EMMA WITHERS

Fakaʻaongaʻi e ʻaho Sāpaté ke ke lotu mo hū ki he ʻEikí, ʻalu ki he lotú, toe vāofi ange ai mo ho fāmilí pea ke ke tokoniʻi foki ʻa e niʻihi kehé. ʻOua naʻá ke fekumi ki ha fakafiefia pe fai ha fakamole fakapaʻanga ʻi he ʻaho Sāpaté. Kapau ʻe lava, peá ke fakaʻehiʻehi mei he ngāue he ʻaho Sāpaté.

Kuo ʻi ai nai ha ngaahi ʻaho Sāpate ʻoku ʻikai pē te ke ongoʻi fie ʻalu koe ki he lotú? Ne hoko ʻeni kiate au kimuí ni mai pē. Ko ʻeku toki hiki atu ia ki ha uooti foʻou ʻi Keipi Tauni ʻi ʻAfilika Tonga. Naʻe ʻikai pehē ia naʻe ʻikai ke angalelei pe anga fakakaumeʻa e kakai ʻi he uōtí. Ka ʻoku ʻikai ko hoku ngaahi kaungāmeʻa kinautolu ʻi he uooti ne u haʻu mei aí.

ʻI he ʻosi pē hoku ʻuluaki uike ʻi he uōtí, ne u fakapapauʻi leva—ko e kamata ʻeni ʻeku ʻalu ki he houalotu sākalamēnití pē. Ne u tōmui atu he uike hono hokó. ʻI heʻeku hū atu he matapā ʻo e falelotú, ne fakalea mai pē ha kakai tokosiʻi peá u nofo ki lalo. Ne u ongoʻi taʻelata ʻaupito heʻeku tangutu ko iá. Ko e meʻa pē ne u fie maʻú ko hoku uooti motuʻá, mo e mata anga fakakaumeʻa ʻo kinautolu naʻa nau ʻiloʻi aú.

Ne tuʻu hake leva e tokotaha lea ʻuluakí ʻo kamata ʻene malangá. Ne hangē pē ko haʻane lea hangatonu mai kiate aú. Naʻá ne lea kau ki heʻete ongoʻi tuēnoa ʻi ha kolo foʻoú, peá u ʻiloʻi leva naʻe ʻikai ko au pē ne u ongoʻi peheé. Hili ko iá naʻe vahevahe ʻe he tokotaha lea hono uá ha pōpoaki ʻe taha ʻa ia naʻe fuʻu mahuʻinga fakatāutaha kiate au. Ki muʻa pea ʻosi e houalotú, naʻe tuʻu hake ʻa e pīsopé ʻo talamai ʻene ʻofa lahi kiate kimautolu takitaha. Naʻá ne pehē ʻokú ne ʻiloʻi pē naʻe ʻi ai ha kakai naʻe fakafalala ange ke ne tauhi mo tokangaʻi kinautolu.

ʻI heʻeku hiva he hiva tukú, ne u ʻiloʻi ko e feituʻu ʻeni naʻe totonu ke u ʻi aí. Kuo fuoloa mo e ʻikai ke u maʻu ha ongoʻi nonga peheni, pea naʻá ku ʻiloʻi ko e haʻu ia mei he Tamai Hēvaní. ʻOkú Ne ʻafioʻi kitautolu takitaha mo ʻetau ngaahi fie maʻú. Naʻá Ne foaki mai ʻa e meʻa ne u fie maʻu ʻi he ʻaho ko iá, pea ʻoku ou ʻiloʻi kapau te u kei hokohoko atu pē hono tauhi ʻEne ngaahi fekaú, te Ne foaki maʻu pē ia kiate au.

KO HA FAKAʻILONGA ʻO E TUKUPĀ KI HE ʻEIKÍ

Elder Russell M. Nelson

ʻI heʻeku [kei siʻí], ne u fifili pe ko e hā koā e ngaahi ʻekitivitī naʻe feʻunga ke fai he ʻaho Sāpaté. Naʻá ku lau ha ʻū lisi naʻe hiki ʻe ha niʻihi kehe kau ki he ngaahi meʻa ke fai mo ia ke ʻoua naʻa fai ʻi he ʻaho Sāpaté. Ka ko e taimi ní ʻoku lelei ange e mahino ʻoku ou maʻú, pea ne u maʻu ia mei ha ongo potufolofola ʻi he Fuakava Motuʻá [vakai, ʻEkesōtosi 31:12–13; ʻIsikeli 20:12, 19–20]… .

“Naʻe tokoni ʻeku fakalaulauloto ki he ongo potufolofolá ni ke mahino ia kiate au. Ko hoku ʻulungāanga ʻi he ʻaho Sāpaté ko ʻeku fakaʻilonga ia ki he ʻEikí ʻo ʻeku tokaʻi Iá mo ʻeku tauhi ʻeku ngaahi fuakava mo Iá… . Kuó u pehē ai ʻe taau e ngaahi meʻa te tau fai he ʻaho Sāpaté ʻi he taimi te tau lau ai e ngaahi meʻá ni ko ʻetau fakaʻilonga fakatāutaha ia ki heʻetau tukupā mo e ʻEikí.”

ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Reflection and Resolution,” ʻi he Brigham Young University 1989–90 Speeches (1990), 6.