Anaanatae i te haapii mai
« A imi hoi i te ite, oia ia na roto hoi i te haapii e na roto atoa i te faaroo » (PH&PF 88:118).
Ua faanaho maite o Russell i ta’na na penitara e piti e ta’na buka nota i roto i ta’na pute haapiiraa. Ua pahere i to’na rouru e ua hi‘opo‘a maite ia papû e mea au anei to’na ahu. I muri a‘e i to’na aroharaa’tu i to’na metua vahine, ua horo atu oia i te tape‘araa pereoo uta tamarii. Ua mana‘o oia e parari oia no to’na oaoa i te haere i te haapiiraa mai te mea eita te pereoo e tae oioi mai. Ua rahi roa to’na oaoa i te haamata i te haapiiraa no te taime matamua.
I te mau matahiti atoa, ua mata‘ita‘i noa o Russell i to’na mau tuane e tuahine paari a‘e ia haere atu i te tape‘araa pereoo uta tamarii, a pauma atu ai i roto i te pereoo uta tamarii no te haere i te fare haapiiraa. Ua hinaaro oia ia tere atoa’tu na ni‘a i te pereoo na muri ia ratou. E hau atu â, ua hinaaro oia ia haapii mai i te mau mea ta ratou i haapii mai. Ua hinaaro oia ia haapii mai â no ni‘a i te mau moo rarahi roa. Ua hinaaro oia ia ite no ni‘a i te mau pereoo auahi. Ua hinaaro oia ia haapii mai i te tai‘o. Ua ite oia e au oia i te haapiiraa.
A tomo atu ai o Russell i roto i te piha haapiiraa, ua ataata mai ta’na orometua haapii, o Wilson vahine. Ua faaite oia ia Russell ta’na iri papa‘iraa. Ua faaite atoa oia ia’na te vahi vairaa no ta’na pute haapiiraa.
Ua mana‘o ihora o Russell e «pPenei a‘e e haapii mai matou na mua roa no ni‘a i te mau moo rarahi roa ».
« Manava i te haereraa mai i te fare haapiiraa », ua parau maira o Wilson vahine. « E haamatau tatou ia tatou iho e e faaite i te tahi mea no ni‘a ia tatou iho ».
Ua maere ihora o Russell. Ua mana‘o ihora oia, « e ti‘a ia matou ia haamatau te tahi i te tahi », « E penei a‘e e haapii mai matou no ni‘a i te mau moo rarahi roa i muri a‘e ».
I te taime a faaite ai o Russell ia’na iho, ua na ô oia, « O Russell vau. Ua hinaaro rahi roa vau ia haapii i te mau mea atoa – no ni‘a ihoa râ i te mau pereoo auahi e te mau moo rarahi roa ».
Ua parau mai ra o Wilson vahine « Mea maitai roa e Russell ». Ua ataata o Russell. Ua papû oia eita e maoro roa e haapii ratou no ni‘a i te mau pereoo auahi e te mau moo rarahi roa.
Tera râ, aita roa. Ua amuamu ratou e ua hauti i te tahi mau hauti taraihia mai te huru o te mau haamenemeneraa, te mau poro toru, e te mau tuea.
« E Wilson vahine, afea tatou e haapii ai no ni‘a i te mau pereoo auahi e te mau moo rarahi roa ? » Ua ui atu ra o Russell.
« Eiaha i teie nei e Russell » pahono maira oia. E taime teie no te tai‘oraa i te hoê aamu ».
« No ni‘a anei i te mau moo rarahi roa ? »
« Aita e Russell ».
I muri a‘e i te aamu ua haapii ratou i te piapa. E ua tae i te taime no te ho‘i atu i te fare.
Ua riri o Russell.
Ua faatuatua oia i te mata a hi‘o ai na te maramarama o te pereoo uta tamarii. Mai te tape‘araa o te pereoo uta tamarii ua horo oia i te fare e ua tomo atu i te uputa fare ma te riri. Ua horo atu i roto i to’na piha taoto e ua tapo‘i i to’na upoo i te ahu taoto.
Ua tomo atu o mama e ua tuu i to’na rima i ni‘a i te upoo o Russell. « Eaha te huru o ta oe mahana haapiiraa matamua ? » ui atu ra oia.
« Mea ino roa. Eita roa vau e haapii mai i te tahi mea, e eita vau e haere faahou i te haapiiraa. Ta matou noa i rave i teie mahana oia ia te hautiraa i te mau afata iti e te tai‘oraa i te mau aamu ».
Na ô atu ra mama « e Russell, e mahana matamua noa teie »,
Ua parahi mai ra o Russell e hi‘o atu ra i ni‘a ia Mama. « E hinaaro vau ia haapii mai no ni‘a i te mau pereoo auahi e te mau moo rarahi roa – i teie nei ihoa ».
Ua parahi o mama i pihai iho ia Russel i ni‘a i te ro‘i. « Eita e nehenehe ia oe ia haapii mai i te mau mea atoa i te hoê noa taime E taime roa to te haapiiraa. Ia rahi ta oe e haapii mai i teie nei e rahi atu â ïa ta oe e haapii mai i muri a‘e ».
« Eaha ia te aura ? » ui atu ra o Russell.
« E ti‘a roa ia haapii mai oe i te piapa na mua oe e nehenehe ai e tai‘o. E e ti‘a ia oe ia haapii i te tai‘o na mua a‘e e nehenehe ai ia oe ia tai‘o i te mau mea o ta oe e anaanatae », ua parau atu ra oia
Ua feruri iho ra o Russell no ni‘a i te reira. Penei a‘e paha te vai ra te tahi atu mau mea ia haapii mai eiaha anae râ te pereoo auahi e te mau moo rarahi roa. Ua parau oia, « e tamata â vau i te haere i te haapiiraa ananahi ».
Ua ataata o mama ia’na.
« E Mama, i to oe mana‘oraa, e nehenehe anei ia taua ia tii i te hoê buka no ni‘a i te moo rarahi roa mai roto mai i te fare buka ? »
« Te mana‘o nei au e nehenehe roa ta taua e na reira ».
Mau faahoho‘araa na Jim Madsen