Te haapiiraa e te feia mo‘a i te mau mahana hopea nei
Te titauraa i te ite o te hoê ïa ohipa mo‘a no te oraraa taatoa, e auhia e to tatou Metua i te Ao ra e tei faafaufaahia e Ta’na mau tavini.
« O oia o te hinaaro i te tomo atu i roto i te ao no te ite e ti‘a ïa ia na reira mai ia Mose i haere atu i te tumu raau iti e ura noa ra ; e ti‘a oia i ni‘a i te vahi mo‘a ; e farii oia i te mau mea mo‘a » te na ô ra te peresideni J. Reuben Clark Tamaiti. (1871–1961), e melo no te Peresideniraa Matamua, i to’na a‘oraa i te oro‘a haamataraa no te hoê peresideni apî no te fare haapiiraa teitei Brigham Young. « E ti‘a ia tatou ia haere i teie nei titauraa no te parau mau—i roto i te mau tuhaa e te mau huru atoa o te ite o te taata, eiaha noa na roto i te faatura, na roto atoa râ i te varua haamori »1
Ei feia mo‘a i te mau mahana hopea nei te ti‘aturi nei tatou i roto i te haapiiraa, e e haapiiraa tumu ta tatou e nahea e no te aha e tia’i ia tatou ia ma‘imi i te reira. Te haapii mai nei ta tatou haapa‘oraa ia tatou e e ti‘a ia tatou ia imi na roto i te Varua e e tiaauraa to tatou i te faaohipa i to tatou ite no te maitai o te taata nei.
Ta tatou titauraa i te parau mau
Ua haapii te Peresideni Young (1880–77) e « Te turai nei [ta tatou] haapa‘oraa ia tatou ia imi ma te itoito i te ite ». « Aita’tu e nunaa ê atu i roto i te oraraa nei tei hau atu i te anaanatae i te hi‘o, i te faaroo, i te haapii mai e te taa i te parau mau ».2
E ti‘a i ta tatou titauraa i te parau mau ia vai aano mai te mau ohipa o to tatou nei oraraa e ia vai hohonu mai te au i te huru o to tatou nei oraraa. E ti‘a i te hoê feia mo‘a i te mau mahana hopea nei tei noaa ia’na te ite ia imi ia taa i te mau pe‘ape‘a faufaa rahi e tupu nei i teie mahana i te pae faaroo, i te pae tino, i te pae sotiare e te pae politita. Ia rahi to tatou ite no ni‘a i te mau ture no te ra‘i e te mau mea no te fenua nei, e rahi atu ïa to tatou mana ta tatou e nehenehe e faaohipa no te maitai o te mau taata na pihaiho ia tatou e rahi atoa tatou i te paruruhia i te mau mana viivii e te ino e nehenehe e faaturorirori e e haamou ia tatou.
I roto i ta tatou titauraa i te parau mau, e ti‘a ia tatou ia imi i te tautururaa a to tatou Metua Here i te Ao ra. E nehenehe ta To’na Varua e arata‘i e e haapuai i ta tatou mau tautooraa no te haapii e no te faarahi i to tatou aravihi i te taa i te parau mau. Aita teie nei haapiiraa na roto i te Varua i taoti‘a-noa-hia i roto i te mau piha haapiiraa aore râ i te faaineineraa noa no te mau hi‘opo‘araa a te fare haapiiraa. E faaohipa-atoa-hia i te mau mea atoa ta tatou e rave nei i roto i te oraraa e i te mau vahi atoa e ohipa ai tatou—i te fare, i te vahi raveraa ohipa, e i te fare pureraa.
A imi ai tatou i te farii e i te faaohipa i te arata‘iraa a te Varua i roto i te hoê ao tei faaterehia e te mau peu e te mau fifi o teie nei tau, te faaruru nei tatou i te hoê faito rahi roa o te mau haamaramarama faufaa ore e te hape i te tahi mau taime, tei tae mai na roto i te mau rave‘a apî no teie nei tau. E riro tatou i te riro mai te au i ta te hoê taata i parau ei mau « ‘taata faraoa monamona’—tei iti i te ite i ni‘a i te mau mea atoa a tuati atu ai tatou ia tatou i ni‘a i taua rave‘a aano ra no te haamaramaramaraa e noaa na roto noa i te taumiraa i te hoê pitopito ».3
Te faaruru atoa nei tatou i te mau taata arata‘i i te mau tau‘araa parau tuiroo i roto i te radio e te afata teata e auhia, te mau aivanaa no te afata teata, te mau ve‘a no te peu o te ahu, e te feia tuatapapa mana‘o i roto i te mau ve‘a, e e nehenehe ho‘i ta ratou mau peu papû ore e to ratou mau mana‘o turorirori e faahuru ê i to tatou mau feruriraa e e faataui i to tatou huru. Ei hi‘oraa, ua parau te peresideni Spencer W. Kimball (1895–1985), « Aita roa’tu e tau i vai na i roto i te ao nei mai teie nei te huru, i riro ai te ti‘araa o te [tane e te vahine] ei tumu o tei ore roa e taa-faahou-hia ».4
I roto i teie hi‘oraa, e nehenehe i te ano‘iraa, te haaparuparuraa, aore râ te feaaraa e haamata i te vavahi i to tatou faaroo e i te haafariu ê atu ia tatou i te Faaora e i te paturaa i To’na ra basileia i ni‘a i te fenua nei. Mai te mea e haamau tatou i ta tatou mau faaotiraa i ni‘a i te mau peu e te mau arata‘iraa a to te ao nei, e riro ïa tatou i te « aueue noa i te mata‘i ra, i tera parau, mai te tamarii ra, i te rave‘a a te taata nei, e te paari i te mau peu atoa o te haavare ra ». (Ephesia 4:14).
Te haapii nei Te Ekalesia a Iesu Mesia i te Feia Mo‘a i te Mau Mahana Hopea nei i te mau ture eiaha râ te mau mana‘o taata. E mea huru rahi te vahi taa ê. Eita te mau peu, te hoho‘a o te ahu, e te mana‘o taata e vai maoro mai. E riro te mau ture ei mau tutau no te oraraa papû, te arata‘iraa, e te parau mau Mai te mea e haamau tatou i to tatou mau mana‘o e to tatou avei‘a i ni‘a i te parau tumu e te mau ture, mai te faaroo i te Fatu ra ia Iesu Mesia e te peeraa i te peropheta, e noaa ïa ia tatou te arata‘iraa papû mau e te taui ore no te mau faaotiraa no to tatou nei oraraa.5
Eiaha tatou e mata‘u. Ua haapii mai te peresideni Henry B. Eyring, tauturu matamua i roto i te Peresideniraa Matamua : «Ua ite te Fatu eaha te mea Ta’na e hinaaro ia outou ia rave e te mea e ti‘a ia outou ia ite. E taata maitai Oia e ua ite Oia i te mau mea atoa. No reira e nehenehe ia outou ia ti‘aturi ma te papû e ua faaineine oia no outou te mau rave‘a no te haapii ei faaineineraa no te taviniraa ta outou e horo‘a. Eita outou e ite maitai roa i taua mau rave‘a ra. … Ia tuu ana‘e râ outou i te mau mea varua na mua i roto i to outou oraraa, e haamaitaihia ïa outou i te ite e te arata‘ihia ra outou i te tahi haapiiraa, e e anaanatae outou i te rave puai atu â i te ohipa ».6
To te taata iho ti‘amâraa
E ti‘a i ta tatou mau tautooraa no te haapii mai ia apitihia’tu i to tatou iho ti‘amâraa ia farii tatou i te arata‘iraa a te Varua Maitai. E ti‘a ia tatou ia ape i te mau mea viivii o te tino, te mau hoho‘a faufau, e te mau raau taero mai te mau mana‘o au ore ia vetahi ê e ia tatou iho. E ti‘avaru te hara i te Varua o te Fatu i rapae au, e ia tupu anae te reira, ua haere ê ïa te faaururaa taa ê a te Varua e e mohimohi te lamepa no te haapiiraa.
I roto i te heheuraa apî te vai nei te hoê fafauraa ia tatou e mai te mea e rotahi to tatou mata i te hanahana o te Atua, e tei roto atoa to tatou ti‘amâraa tata‘itahi, e « faaîhia to outou mau tino paatoa i te maramarama, e e ore roa hoi te pouri i roto ia outou na ; e o te tino o tei faaîhia i te maramarama ra e ite ïa i te mau mea atoa » (PH&PF 88:67).
E nehenehe ta tatou e hi‘opo‘a i teie nei ture mure ore i roto i te ohipa tei tupu noa iho nei ia tatou. A haamana‘o i te hoê taime a riri ai outou, a marô ai outou, aore râ a imi pe‘ape‘a ai outou. E nehenehe anei ta outou e haapii maitai ? Ua farii anei outou i te faarururaa i taua taime ra ?
E haapouri te hara e te riri i te feruriraa. E faatupu te reira i te hoê huru no te aro atu i te maramarama e te parau mau oia te tapa‘o no te ite, o te hanahana ho‘i o te Atua (a hi‘o PH&PF 93:36) No reira, ua riro te tatarahapa, o te nehenehe ho‘i e tamâ ia tatou i te hara na roto i te tusia Taraehara a Iesu Mesia, ei taahiraa faufaa rahi roa i ni‘a i te e‘a no te haapiiraa no te feia atoa e imi ra i te maramarama e te parau mau na roto i te mana haapii o te Varua Maitai.
E mau taata paruparu tatou, e nehenehe râ ta tatou tata‘itahi e tutava ia hau atu i te fana‘oraa i te hoaraa o te Varua, o te faarahi i to tatou ite tata‘itahi e o te faaineine ia tatou ia paruru rahi atu â i te parau mau, ia pato‘i i te mau faahemaraa a to te ao, e ia horo‘a i te mau tautururaa maitai.
Haapiiraa
I roto i ta tatou mau ma‘itiraa no ni‘a i te haapiiraa e ti‘a ia tatou ia faaineine i te turu ia tatou iho e i te mau taata o te ti‘aturi paha i ni‘a ia tatou. E mea titauhia e ia noaa ia tatou te mau aravihi no te ohipa. E mea faahepohia te haapiiraa no to tatou iho parururaa e to tatou iho oraraa maitai.
Te tia‘i nei to tatou Metua i te Ao ra e ia faaohipa tatou i to tatou ti‘amâraa e faaururaa no te hi‘opo‘a ia tatou iho e to tatou mau aravihi e ia faaoti i te huru haapiiraa e ti‘a ia tatou ia pee atu. E mea faufaa rahi ihoa ra no te feia apî tei faaoti i te haapiiraa tua rua e te taviniraa misionare e te faaruru nei i te mau faaotiraa no ni‘a i te haere-faahou-raa i te haapiiraa e te raveraa i te ohipa. No te mea ho‘i e te mau ma‘itiraa e faaruruhia ra e te mau tane e te mau vahine e mea taa ê roa te tahi i te tahi, e haamata ïa tatou i te rave mai i te mau mea ta maua iho i ite, ma te ti‘aturi e o te mau mea atoa ïa e itehia ra i roto i te feia mo‘a i te mau mahana hopea nei e rave rahi.
Elder Oaks : Mai te au i te rahiraa o te feia apî tane, e mea paari roa ta‘u haapiiraa, e mea tamau, e mea tura‘ihia e te hinaaro ia nehenehe ia‘u ia faaamu i te hoê utuafare. I muri a‘e i te haapiiraa teitei o te titauraa ïa i te parau tuite teitei a‘e â. Ua aufauhia te reira na roto i te raveraa i te ohipa taime poto noa e te aitarahuraa i te moni o te ti‘a ia faaho‘ihia na roto i te ohipa maitai a‘e te noaa mai na roto i te haapiiraa teitei. I roto atoa i taua area taime ra ua faaipoipohia vau, e ua haamata maua i te fanau i te tamarii. Na te patururaa a te hoê vahine faaipoipo e te hopoi‘a no te hoê utuafare e tupu noa ra i te rahi i haamaitai i ta‘u ohipa i te fare haapiiraa e i horo‘a mai ia‘u te tura‘iraa puai no te titau i te parau tuite e ia haere i mua i roto i ta‘u nei ohipa i roto i te oraraa. I te hopearaa o ta‘u nei tau haapiiraa, ua horo‘a vau i te tahi taime o to‘u nei taime faafaaearaa ia tamau noa i te haapii i roto i to‘u nei toro‘a e ia tai‘o i te tahi atu â mau buka no ni‘a i te mau tufhaa hinaaro-maoro-hia e au no te aamu no te Ekalesia e te haapiiraa.
Sister Oaks : I te rahiraa o te taime e mea taa ê roa te mau e‘a e te mau ohipa haapiiraa a te mau vahine i to te mau tane. Ua paari au i te hoê tau e au ra e piti ana‘e toro‘a e vai ra i te mau vahine no te paturu ia ratou iho—te toro‘a orometua haapii tamarii e te utuutu ma‘i To‘u « fifi » aita roa’tu vau i feruri i te hoê noa‘e o taua na toro‘a ra. Aita roa vau i mana‘o e e nehenehe aore râ e mea titauhia ia turu vau ia‘u iho i te pae faufaa. E mea au roa na‘u ia haapii mai, e ua ite au nahea i te rave i te ohipa ; oia mau, e mea au na‘u ia rave i te ohipa. E rave rahi ta‘u mau ohipa i te tau faaearaa i te tau mahanahana, e ua manuïa vau i te fare haapiiraa. I te taime a ite ai au e ua ti‘a ia‘u ia turu vau ia‘u iho i te pae faufaa, ua ri‘ari‘a vau, ua fatata vau i te ore e hauti faahou no te mau titauraa ite-ore-hia o te ti‘a mai ra i mua i to‘u nei mata. Aita to‘u e ite taa ê no te rave i te ohipa. Ua faaamu noa ta‘u mau haapiiraa i to‘u nei varua, i teie nei râ e ti‘a ia‘u ia faaî i ta‘u nei pute moni.
Ua haere au i te haapiiraa teitei no te haapii mai i te mau ite no te tururaa ia‘u iho. Ua au vau i te mau minuti atoa no te haapiiraa e ua ite au i te mau mana‘o apî e i to‘u iho mau aravihi. Na mua’tu e mea mamahu roa vau e te ineine ore, i teie nei ua ite au e nehenehe e e maraa ia‘u iho ia ora i to‘u oraraa.
Te mau haamaaraa poromu
Ua ite tatou e aore roa e mea hau atu i te ahoaho maori râ te ite-ore-raa eaha te mea e rave no to oe oraraa no ananahi, e aita râ e mea hau atu i te hoona no outou iho maori râ i te iteraa i to outou iho mau aravihi. A tai‘o i to outou haamaitairaa patereareha, a tuatapapa i to outou iho mau aravihi e mau taleni taata, e a haere i mua A rave i te taahiraa matamua, e e matara mai ïa te mau uputa. Ei hi‘oraa, i te taime a haamata ai te tuahine Oaks i te haapiiraa no ni‘a i te mau papa‘iraa no te reo Peratane, aita roa‘e oia i mana‘o noa a‘e e tae oia i te hoê fare nene‘iraa buka i Boston. I to Elder Oaks haapiiraa i te ohipa numera, aita roa‘e oia i mana‘o e e afa‘i te reira ia’na i roto i te haapiiraa auvaha ture, i te fare haapiiraa teitei no Brigham Young, e i muri iho i te Fare haavaraa teitei no Utaha. Ma te tautururaa a te Fatu, « e haa te mau mea atoa » (Roma 8:28), e te haapiiraa ta tatou e farii e tae au noa mai ïa te hoê tuhaa i muri i te tahi a tere noa’i to tatou oraraa.
« E ti‘a ia tatou ia ma‘iti maite i ta tatou haapiiraa no te mea e vai mure ore mai te haapiiraa e noa’tu eaha te iteraa e faaohipahia aore râ te paari aore râ te mau parau tumu no te ite o te noaa mai ia tatou i roto i teie oraraa nei, e ti‘a ïa te reira e o tatou atoa i roto i te ti‘a-faahou-raa » (PH&PF 130:18)
E mea pe‘ape‘a roa e e rave rahi mau vahine ihoa râ e feaa nei e te uiui nei mai te mea e nehenehe ta ratou e manuïa. I to’na a‘oraa i te mau piahi vahine e haapii ra i te numera, te rave‘a maramarama, e te rave‘a aivanaa, i te ava‘e mati 2005, ua parau te peresideni no BYU o Elder Cecil O. Samuelson tamaiti, e : no te Hitu Ahuru e : «Ua parau mai te hoê o ta outou orometua haapii ia‘u… e te vai nei te tahi o outou e ua iti to outou ti‘aturiraa i roto i to outou iho aravihi e i roto i te mau ohipa e maraa ia outou i te rave i to outou mau piahi tane, noa’tu e te faaite mai nei te parau e ere te reira i te mea tano. E ti‘a ia outou ia ite i to outou mau taleni, aravihi, ite, e puai e eiaha e feaa i te mau horo‘araa ta te Atua i horo‘a ia outou ».7
E nehenehe ihoa râ i te mau vahine ia farii i te mau faahaparaa ia hinaaro ana‘e ratou i te ohipa. Ua papa‘i mai te hoê tuahine apî e tomo ra i te 20raa o to’na matahiti e, e ti‘a ho‘i ia’na ia haapa‘o ia’na iho, no te tahi mana‘o tauturu. Ua faaite mai oia e ua ani oia i te hoê taata faatere no te Ekalesia no ni‘a i te haapiiraa i te ture e aita teie taata faatere i faaitoito ia’na. Aita tatou i ite i to’na aravihi aore râ i to’na mau paruparu; te mana‘o tauturu ta’na i farii ua niuhia paha ïa i ni‘a i te reira aore râ i ni‘a i te faaururaa mai te au i to’na huru oraraa. Ua nehenehe râ i te itehia to’na hinaaro puai na roto i te mau api no ta’na rata, e e mea maramarama roa ia ite e e ti‘a ia’na ia faaitoitohia no te haere atu i te hopearaa o to’na aravihi.
Ei tuhaa no ta’na parau poro‘i i te amuiraa rahi a te Sotaiete Tauturu tei tupu i te 29 no Setepa 2007, ua parau te Peresideni Thomas S. Monson i te mau vahine : « Eiaha e pure no te mau ohipa e au i to outou aravihi, e pure râ no te mau ite e au i ta outou mau ohipa. I reira e ere ïa e semeio te raveraa i ta outou mau ohipa, o outou râ te semeio ».8
Te faaara nei matou e na roto i te titauraa ia faaoti i te haapiiraa e te haamauraa i te oraraa faufaa papû, e nehenehe te mau tane e te mau vahine e faahemahia ia faariro i te faaipoiporaa ei ohipa rû-ore-hia. E ere roa i te mea paari roa ia tapapa i te hoê toro‘a e aita e taime no te faaipoiporaa, te hoê ho‘i faufaa mure ore, no te mea noa ho‘i eita te reira e tano i roto i te talena ohipa, te hoê ho‘i faufaa no te ao nei.
Ua apee te hoê hoa i ta’na tamahine no te hi‘o haere i te mau fare haapiiraa toro‘a i te tuhaa hitiaa o te râ o te fenua Marite. Ua ite teie tamahine anaanatae maitai e tei î i te taleni e ia haere ana‘e oia i te fare haapiiraa numera hoê ta’na i ma‘iti, e titauhia ïa ia’na ia aitarahu i te tahi tuhaa moni rahi no ta’na haapiiraa. I te rahiraa o te taime e hoonahia te moni no te aufau i te haapiiraa maitai roa‘e, i roto râ i teie nei aamu, ua pure ta’na tamahine e ua ite oia e eita te tarahu e tape‘a ia’na ia faaipoipo, e faahepo râ te reira ia’na ia tamau noa i te rave i te ohipa eiaha râ ia faaea i te fare e ta’na mau tamarii. A haapa‘o maitai. E mea taa ê tatou te tahi i te tahi. Mai te mea e imi outou i To’na mana‘o tauturu, e faaite mai ïa te Fatu eaha te mea maitai a‘e no outou.
Te hiaai i te haapii mai
Ua haapii o Elder Jay E. Jensen no te Peresideniraa o te Hitu Ahuru e e ti‘a ia tatou ia « tamau noa i te mau taime atoa te hiaai i te haapii mai ».9 E ti‘a i taua hiaai ra ia faaho‘ihia e te hoê hinaaro ia haapii mai, ma te arata‘ihia e te mau mea faufaa mure ore.
Taa ê noa’tu i te faarahiraa i to tatou aravihi i te pae ohipa, e ti‘a ia tatou ia hinaaro i te haapii nahea e riro ai ei taata tei hau atu i te maitai, tei hau atu i te aravihi i roto i to tatou mau auraa e vetahi ê, e ia riro ei mau metua e ei huiraatira maitai a‘e. E mea iti roa te mau mea hau atu i te faahiahia e te arearea i te haapiiraa mai i te tahi mea apî. E tae mai te oaoa rahi, te mauruuru, e te haamaitairaa pae moni na roto i te reira. Aita te hoê haapiiraa i taoti’a-noa-hia i te haapiiraa i te fare haapiiraa. E nehenehe te haapiiraa i roto i te roaraa o te oraraa e faarahi i te aravihi e te mauruuru e te oaoa i te mau ohipa e te nehenehe o te ao e haati nei ia tatou. E haere teie huru haapiiraa i rapae atu i te mau buka e te hoê faaohiparaa taa ê i te mau rave‘a apî, mai te itenati. Tei roto te mau tutavaraa no te pae o te mau peu peni e te himene. Tei roto atoa te mau ohipa te ravehia e te mau taata e te mau vahi i terehia : te mau tau‘araa parau e te mau hoa, te mau tere mata‘ita‘i i te mau fare vairaa tauhaa tahito e te mau himeneraa, e te mau rave‘a no te taviniraa. E ti‘a ia tatou ia faananea ia tatou iho e ia oaoa i te tere.
E ti‘a paha ia tatou ia aro no te faatupu i ta tatou mau fâ, e horo‘a mai râ ta tatou mau aroraa i te hoê tupuraa rahi e te haapiiraa ia tatou. Te mau puai ta tatou e faatupu na roto i te upooti‘araa i ni‘a i te mau titauraa, e vai mai ïa te reira ia tatou ra e a muri noa’tu. Eita e ti‘a ia tatou ia faahinaaro i te mau taata e oraraa ohie to ratou na roto i ta ratou mau faufaa e to ratou ite. E ere te tumu no te tupuraa i te mea ohie e te mau taata o te farii ohie nei i te mau maitai e ti‘a ïa ia ratou ia ite i to ratou tupuraa na roto i te tahi ê atu mau tusia aore râ ia tuu i te hiti te haereraa i mua o te tumu ho‘i o te oraraa.
Hau atu i te faufaa rahi, e hopoi‘a ïa na tatou ia tamau i to tatou haapiiraa varua na roto i te tai‘oraa i te mau papa‘iraa mo‘a e te mau ve‘a a te Ekalesia e na roto i te haereraa i te pureraa e te hiero. E haafaufaa te oaoaraa i te mau parau ia tatou, e faarahi te reira i to tatou aravihi no te haapii i te mau taata tei herehia e tatou, e e faaineine te reira ia tatou no te ora mure ore.
Te fâ hopea roa o te haapiiraa o te faariroraa ïa ia tatou ei mau metua e e mau tavini maitai a‘e i roto i te basileia. I te pae hopea, o te tupuraa ïa, te ite e te paari tei noaa ia tatou o te faarahi i to tatou mau varua e o te faaineine ia tatou no te oraraa mure ore, e ere râ te mau numera i ni‘a i te mau parau tuite no te fare haapiiraa teitei. Te mau mea no te Varua o te mau mea mure ore ïa, e to tatou mau auraa utuafare tei taatihia e te mana no te autahu‘araa e mau hotu hopea ïa o te Varua. Te haapiiraa o te hoê ïa horo‘araa no ô mai i te Atua ra ; o te ofa‘i tihi ïa no to tatou haapa‘oraa faaroo ia faaohipa ana‘e tatou i te reira no te haamaitai ia vetahi ê.
I te aui : Hoho‘a na Craig Dimond ; i te atau : mau faahoho‘araa na John Luke, Matthew Reier, e Christina Smith
Mau faahoho‘araa na Robert Casey, Marina Lukach, e Craig Dimond
Mau faahoho‘araa na Matthew Reier, Craig Dimond, e Christina Smith
Aita teie nei haapiiraa na roto i te Varua i taoti‘a-noa-hia i roto i te mau piha haapiiraa aore râ i te faaineineraa noa no te mau hi‘opo‘araa a te fare haapiiraa. E faaohipa-atoa-hia i te mau mea atoa ta tatou e rave nei i roto i te oraraa e i te mau vahi atoa e ohipa ai tatou—i te fare, i te ohipa, e i te fare pureraa.
Aita te hoê haapiiraa i taoti‘a-noa-hia i te haapiiraa i te fare haapiiraa. E nehenehe te haapii tamau-noa-raa e faarahi i to tatou aravihi ia mauruuru e ia oaoa i te mau ohipa e te nehenehe o te ao e haati nei ia tatou.