Te mau uiraa e te mau pahonoraa no ni‘a i te faanahonahoraa o te Ekalesia
No te aha te Ekalesia i piihia ai i te i‘oa o Iesu ?
Ua parau o Iesu e ua parauhia i To’na i‘oa no te mea o Ta’na ïa Ekalesia (a hi‘o 3 Nephi 27:8). Ua faanahonaho Oia i te reira no te tauturu ia tatou ia ho‘i atu i te Metua i te Ao ra. O Iesu Mesia te faatere i te Ekalesia.
Eaha te auraa « mahana hopea » ?
Ua parau Iesu, « no te mea o teie te i’oa e topahia i ni‘a i ta‘u ekalesia i te mau mahana hopea nei, oia Te Ekalesia a Iesu Mesia i te Feia Mo‘a i te Mau Mahana Hopea Nei » (PH&PF 115:4). Te auraa o te « Mau Mahana Hopea nei » o te mau mahana hopea ïa, te tau e orahia nei e tatou i teie nei.
Eaha te auraa « Feia Mo‘a ? »
« Te Feia Mo‘a » e melo ïa no te Ekalesia a te Mesia. Te faaite nei te mau papa‘iraa mo‘a no ni‘a i te Feia Mo‘a i roto i te mau tau e rave rahi.
Te tau o te Faufaa Tahito : Deuteronomi 33:3 ; Salamo 30:4
Te tau o te Faufaa Api : 1 Korinetia 1:2
Te tau o te Buka a Moromona : 1 Nephi 14:14 ; Moroni 8:26
Te tau o Iosepha Semita : Te Parau Haapiiraa e Te Mau Parau Fafau 57:1 ; 84:2
I teie mahana, ua parau-atoa-hia te mau melo no te Ekalesia e Feia Mo‘a.
Nahea to Iesu Mesia faanahonahoraa i Ta’na Ekalesia?
Ua faanahonaho o Iesu Mesia i Ta’na Ekalesia a ora ai Oia i ni‘a i te fenua nei, a haere ai Oia i te fenua America e a faaho‘i mai ai Oia i te reira na roto mai i te peropheta o Iosepha Semita. I te mau taime atoa, ua ma‘iti Oia e Ahuru ma Piti Aposetolo aore râ mau pîpî no te tauturu Ia’na i te paturaa i te basileia o te Atua i ni‘a i te fenua nei na roto i te haapiiraa i te evanelia (a hi‘o Mareko 16:14–15; 3 Nephi 12:1).
Ua pii atoa o Iesu i te hoê peropheta no te arata‘i i te Ekalesia. Te Peresideni o te Ekalesia te peropheta. Ua pii te Fatu ia Iosepha semita ei peropheta matamua i te tau hopea nei. O Thomas S. Monson te 16raa o te Peresideni no te Ekalesia. O te peropheta ana‘e te taata e nehenehe e farii i te heheuraa no te taato‘araa o te Ekalesia.
Ahuru ma piti Aposetolo i te tau no te Faufaa Apî
Ahuru ma piti pîpî i te tau no te buka a Moromona
Ahuru ma piti Aposetolo i teie tau
Iosepha Semita, Peresideni matamua no te Ekalesia
Thomas S. Monson, 16raa o te Peresideni no te Ekalesia
Te mau peropheta no te anotau hopea nei.
Nahea to tatou feia faatere o te Ekalesia e tauturu ia Iesu ?
E tauturu te taato‘araa o te feia faatere o te Ekalesia ia Iesu na roto i te taviniraa i te tahi atu mau melo no te Ekalesia
E arata‘i te Peropheta i te Ahuru ma piti Aposetolo
E arata‘i te mau Aposetolo i te mau pŭpŭ Hitu Ahuru
E tauturu te mau pŭpŭ Hitu Ahuru i te mau Aposetolo i te haapiiraa i te mau peresideni tĭtĭ e mataeinaa.
E tauturu te Peresideni Tĭtĭ e te Mataeinaa i te mau episekopo e i te mau peresideni mataeinaa.
I roto i te mau paroita e te mau amaa, e arata‘i te mau episekopo e te mau peresideni mataeinaa i te mau Peresideni no te Sotaiete Tauturu, te mau peresideni no te Feia apî Tamaroa e Feia apî Tamahine, te peresideni no te Paraimere, te mau peresideni no te Haapiiraa Sabati, te mau Taeae Hahaere e te mau Tuahine Hahaere, e te tahi atu mau feia faatere.
I roto i te mau paroita e te mau amaa e tavini te feia faatere e te mau orometua haapii ia tatou paatoa.
Nahea e nehenehe ai ia outou ia tauturu ia Iesu ?
E tauturu outou ia Iesu ia haapa‘o ana‘e outou i Ta’na mau faaueraa. E tauturu outou Ia’na na roto i te peeraa i te peropheta. E tauturu outou Ia’na ia haapii ana‘e outou no ni‘a Ia’na na roto i te haereraa i te mau pureraa e te tai‘oraa i te mau papa‘iraa mo‘a. E tauturu outou Ia’na na roto i te ma‘itiraa i te mea ti‘a. Na roto i te raveraa i teie mau mea, te faaineine ra ia outou ia riro ei taata faatere i roto i Ta’na Ekalesia, te Ekalesia a Iesu Mesia i te Feia Mo‘a i te Mau Mahana Hopea Nei.
A hi‘o i To‘u mau Rima e To‘u mau Avae, na Harry Anderson ; Na Ati Nephi e Toru, na Gary L. Kapp ; faahoho‘araa na Welden C. Andersen ; hoho‘a no Iosepha Semita Tamaiti, na roto i te faati‘araa a te mau hoho‘a tahito a te Autahiraa o te Mesia, Independence, Missouri ; hoho‘a no te Peresideni Monson na David Newman