Haere mai e faaroo i te reo o te peropheta
Te ho‘iraa ma te ati ore i te Metua i te Ao ra
No roto mai i te a‘oraa i te amuiraa rahi no te ava‘e Eperera 2007.
Ua haapii te peresideni Uchtdorf e maoti te Taraehara, e nehenehe ïa ia tatou ia tatarahapa e ia vai noa te ti‘aturiraa.
Te reni no te ho‘iraa ati ore
I roto i ta‘u taime haapiipiiraa ia riro ei tapena no te manureva, titauhia vau ia haapii nahea ia tere na ni‘a i te hoê manureva no te tere atea. Te rereraa na ni‘a‘e i te mau moana rahi, te rereraa na ni‘a’e i te mau medebara aano e te tuatiatiraa i te mau fenua rarahi, titauhia ïa te hoê faaineineraa papû no te haapapûraa i te hoê tapaeraa ati ore. Titauhia 14 hora no te tahi o teie mau tere tape‘a ore, e 9.000 maile i te atea.
Te vai ra te hoê faaotiraa faufaa roa i roto i teie mau tere atea e parauhia te reni no te ho‘iraa ati ore. Titauhia ia rava‘i te mori arahu i roto i te manureva no te haereraa e no te ho‘i-faahou-raa mai i te tauraa manureva matamua. Mai te mea ua mahemo te reni no te ho‘iraa ati ore, ua ere ïa te tapena i teie nei ma‘itiraa e titauhia ïa oia ia tere tamau noa. No reira ïa e parauhia’i e, te tere aita e ho‘iraa.
Aita i taere roa
Hinaaro Satane ia tatou ia mana‘o e, ia hara ana‘e tatou, ua mahemo atu ïa tatou i te « reni aita e ho’iraa » – ua taere roa te tauiraa i to tatou tere. Ua riro te Taraehara a Iesu Mesia ei horo‘araa na te Atua i Ta’na mau tamarii no te faatiti‘aifaro e ia upoti‘a i te mau hopea o te hara. Ua haere mai te Mesia no te faaora ia tatou. Mai te mea ua hape to tatou raveraa i te hoê mea, e nehenehe te Taraehara a Iesu Mesia e haapapû ia tatou e, e ere te hara i te reni aita e ho‘iraa. E mea papû te ho‘iraa ati ore mai te mea e pee tatou i te faanahonahoraa a te Atua no to tatou faaoraraa.
Te vai noa ra te ti‘aturiraa
Noa’tu te vahi i roto i teie tere i roto i te oraraa nei e ti‘ahia ra e outou, noa’tu te huru o te mau tamataraa e farereihia ra e outou, te vai noa ra te hoê vahi no te ho‘iraa hau ; te vai noa ra te ti‘aturiraa. O outou te tapena o to outou oraraa, e ua faaineine te Atua i te hoê faanahonahoraa no te faaho‘i ia outou ma te hau i mua Ia’na, to outou tipaeraa i te ra‘i ra.
Ua horo‘ahia ia tatou te horo‘araa o te Taraehara a Iesu Mesia i te mau taime atoa e i te mau vahi atoa, te mau haamaitairaa no te tatarahaparaa e no te faaoreraa hara. E mea na roto i teie horo‘araa, i nehenehe ai ia tatou ia rave i te reni no te ho‘iraa ati ore i te mau e‘a ati rahi no te hara o te vai nei no tatou paatoa. Te oaoa i roto i teie oraraa e te oaoa mure ore i roto i te hoê oraraa i mua nei e hopea ïa te reira no tatou mai te mea e ma‘iti tatou i te farii e i te faaohipa i teie horo‘araa a to tatou Metua i te Ao ra.
Faahoho‘araa na Scott Greer