Eaha mau te auraa no te Taraehara no outou ?
No roto mai i te hoê a‘oraa tei horo‘ahia i te amuiraa a te mau vahine i te fare haapiiraa teitei no Brigham Young i te 5 no me 2006.
Ua riro te Taraehara ei ohipa no te taata tata‘itahi e ua faatanohia i to tatou iho mau huru oraraa e to tatou mau hi‘oraa.
Ua haapii te peropheta Iosepha Semita, « te mau parau tumu no to tatou haapa‘oraa o te iteraa papû ïa o te mau aposetolo e te mau peropheta, no ni‘a ia Iesu Mesia, e ua pohe Oia, ua tanuhia Oia, e ua ti‘afaahou mai i te toru o te mahana, e ua haere atu i ni‘a i te ra‘i ; e te tahi atu mau mea atoa no ni‘a i to tatou haapa‘oraa e mau hu‘ahu‘a ana‘e ïa no te reira ».1
Ua niuhia teie mau parau tumu faufaa rahi i ni‘a i te Taraehara a Iesu Mesia. Te faataa nei te parau Taraehara «te amui-hoê-raa i te feia tei faataa-ê-hia, e te faaite nei te reira i te faafaroraa te taata i te Atua. Ua riro te hara te tumu no te faataa-ê-raa, e no reira te opuaraa a te Taraehara o te faatiti‘aifaroraa e aore râ te upooti‘araa ïa i ni‘a i te mau hopea o te hara ».2 Te ti‘aturi nei au e nehenehe atoa e atea ê i te Atua no te mau tumu ê atu e rave rahi i te hara.
E mea faufaa rahi e te haati tamau noa ra te mau tumu ia tatou no to tatou atea-ê-raa i to tatou Metua i te Ao ra e i te Faaora. Aua‘e râ, ua faataa-atoa-hia te Taraehara no te taato‘araa o teie mau huru ohipa. No reira Iakoba, te taea‘e o Nephi, i parau ai e te Taraehara « mure ore » (2 Nephi 9:7), oia hoi, ma te oti‘a ore aore râ ma te mau faaheporaa no rapae mai. No reira te Taraehara i riro ai ei mea faahiahia e te mea titauhia. No reira, e ere ïa i te mea maere e tia’i ia tatou ia mauruuru no teie horo‘araa faito ore e ia maramarama maitai tatou no ni‘a i teie parau.
O Iesu Mesia ana‘e te taata o te nehenehe e rave i te Taraehara faahiahia no te mea o Oia ana‘e te taata maitai roa e te Tamaiti Fanau Tahi a te Atua te Metua. Ua farii Oia i Ta’na faaueraa no teie ohipa faufaa rahi no ô mai i To’na ra Metua Tane hou i haamauhia’i te ao nei. Na To’na oraraa tahuti maitai hara ore, te haamaniiraa i To’na toto, To’na mauiui i te ô e i ni‘a i te satauro, To’na pohe na roto i to’na iho hinaaro, e te Ti‘a-faahou-raa o To’na tino mai te menema mai i faati‘a e ia tupu te hoê Taraehara hope no te mau taata i te mau u‘i e te mau tau atoa.
Ua faariro te Taraehara i te Ti‘a-faahou-raa ei ohipa tei tupu mau no te mau taata atoa. Area râ, no ta tatou iho mau ofatiraa ture e ta tatou iho mau hara, te titau nei te mau tuhaa o te Taraehara i to tatou faaroo i te Fatu ra ia Iesu Mesia, i to tatou tatarahaparaa, e to tatou haapa‘oraa i te mau ture e te mau oro‘a no te evanelia.
Te tahuti ore e te ora mure ore
Peneia‘e te irava faahiti-pinepine-hia i roto i ta tatou mau pureraa e ta tatou mau papa‘iraa o teie ïa irava faahiahia e te maramarama no roto mai i te buka a Mose : « Inaha, o teie hoi ta‘u ohipa e to‘u hanahana – ia faatupu i te tahuti ore e te ora mure o te taata nei » (Moses 1:39).
Maori te Ti‘a-faahou-raa, e noaa’i ia tatou paatoa te tahuti ore. Maori te Taraehara, e ite ai e e oaoa ai te mau taata atoa i te ora mure ore, o ratou tei nava‘i te faaroo i te Fatu ra ia Iesu Mesia no te rave i ni‘a iho ia ratou To’na ra i’oa, tei tatarahapa e o tei haapa‘o i Ta’na ra evanelia, tei haapa‘o i te mau fafauraa ta ratou i faaau Ia’na e i To’na ra Metua, e o tei rave i te mau oro‘a faaora e vai nei i roto i te mau rave‘a e te mau vahi mo‘a.
Aita roa’tu e nehenehe ta‘u e haamana‘o i te farereiraa i te hoê taata tei faaite hua i te faaroo rahi ia Iesu Mesia e o tei haape‘ape‘a rahi roa i to’na mana‘o no ni‘a i te Ti‘a-faahou-raa. Oia ïa, e mau uiraa paha ta tatou paatoa no ni‘a i te mau faanahoraa atoa, ua maramarama râ tatou e te fafauraa tumu no te mau taata atoa ïa e e mea papû te reira.
No te mea ho‘i e e ere te ora mure ore i te mea horo‘a-noa-hia e e titauhia to tatou itoito e to tatou haapa‘o, te fifi nei te rahiraa o tatou i te tahi taime, peneia‘e i te mau taime atoa – e tae noa’tu e mea tamau noa – e te mau uiraa no ni‘a i te huru oraraa e ti‘a ia tatou ia ora mai te au i to tatou iteraa. Mai ta Elder David A. Bednar no te Tino Ahuru ma Piti Aposetolo i ui, « te ti‘aturi hape ra anei tatou e e ti‘a ia tatou ia rave i te tere mai te maitai e tae atu i te maitai a‘e e ia riro ei feia mo‘a na roto i to tatou iho puai na roto i te papûraa o te huru, te puai taata, e te haavîraa ? »3
Ahani e ua riro to tatou faaoraraa ei ohipa noa no to tatou iho tautooraa, e fifi roa ïa tatou no te mea e ere tatou paatoa i te taata maitai roa e eita e nehenehe ia tatou ia haapa‘o i te mau mea atoa i te mau taime atoa. No reira, nahea ïa tatou e rave faaoti ai i te tautururaa i titauhia ia tatou ? Ua haamaramarama mai o Nephi i te fifi no te auraa i rotopu i te aroha e te ohipa a faaite ai oia, « ua ite hoi tatou e, na roto i te aroha e ora’i tatou, hope noa’tu to tatou itoito atoa » (2 Nephi 25:23).
Te faahaamana‘o mai nei te titionare Bibilia ia tatou e taua aroha o te hoê ïa rave‘a aore râ tauhaa no te ra‘i o te afa‘i mai i te puai aore râ te tautururaa na roto i te aroha e te here o Iesu Mesia tei horo‘ahia mai na roto i Ta’na Taraehara.4 E mea na roto i te aroha o te Mesia e ti‘afaahou ai tatou, e na to’na aroha, te here, e te Taraehara e tauturu ia tatou ia faaoti i te mau ohipa maitai e te haereraa i mua o te ore roa e tupu ahani e ua vaiho-noa-hia tatou ia faaohipa i to tatou iho mau aravihi e ta tatou iho mau rave‘a.
Te oaoa na roto i te Taraehara
I roto i te mau mea e rave rahi ta‘u e faahiahia i roto ia Nephi o to’na ïa huru. E ere to’na oraraa i te mea ohie, ia faaauhia ihoa ra i te oraraa maitai ta te rahiraa o tatou e faana‘o nei i teie mahana. I ora na o Nephi e to’na utuafare e rave rahi mau matahiti i roto i te medebara hou a tae atu ai i te fenua i fafauhia. Ua faaruru ratou i te mau tau pohe poia, te poiha, e te ati. Ua ti‘a ia Nephi ia tatara i te mau fifi rahi no te utuafare tei faarahihia e Lamana e Lemuela, e i te pae hopea ua faataa ê ia’na iho, e te feia tei pee ia’na, i te feia tei turu ia Lamana e Lemuela.
Ua nehenehe ia Nephi ia parau i mua i te taato‘araa o teie nei mau ereraa e te mau fifi, « parahi ihora matou ma te oaoa » (2 Nephi 5:27).
Ua taa ia’na e te vai nei te hoê hoho‘a no te oraraa o te hope i roto i te oaoa, taa ê noa’tu i te mau fifi, te mau tamataraa, e te mau ohipa tei ore i tupu o te tae mai i roto i to tatou mau oraraa. Ua nehenehe ia’na ia faatumu i ni‘a i te hoho‘a rahi o te opuaraa a te Atua no’na e to’na nunaa e no reira ua nehenehe ia’na ia ape i te mana‘o paruparu o te tupu mai na roto i to’na mau mana‘o maha ore aore râ to’na iteraa e e ere te oraraa i te mea tano. E ere ihoa i te mea tano, noa’tu ra i te reira ua oaoa râ oia e to’na atoa nunaa. Ua taa ia ratou e e tupu mai te hoê Taraehara, e ua ti‘aturi ratou e tei roto atoa ratou i te reira.
Ua ui o Nephi ia’na iho te mau uiraa faufaa rahi e nehenehe ia tatou ia ui ia tatou iho a feruri ai tatou te ti‘araa o te Taraehara a te Mesia i roto i to tatou iho mau oraraa :
« E teie nei, o vau iho i ite i te mau mea rarahi ra ; e ua itehia mai te taata i to te Fatu ra aroha rahi i ta’na haapa‘oraa i te tamarii a te taata nei, eiaha e oto ai tau aau, e e parahi ai ta‘u varua i roto i te peho o te mihi, e e ripâ’i to‘u tino, e e toaruaru ai hoi to‘u puai, no to‘u ra mau ati ?
« Eaha vau e riro ai i te hara, no to‘u nei tino ? Oia ïa, eaha vau e faahemahia’i, e mana’i te mea ino ra i roto i ta‘u aau, ia faaore i to‘u hau, e ia haape‘ape‘a i ta‘u varua ? Eaha vau e riri ai i to‘u enemi » (2 Nephi 4:26-27).
I muri a‘e i to’na hevaraa ua pahono oia i ta’na iho mau uiraa, ma te ite maite i te rave‘a e ti‘a ia’na ia rave no te tatara i to’na mau fifi : « A ara, e ta‘u varua e! Eiaha’tu e taiâ i roto i te hara. A oaoa, e tau aau e, e eiaha’tu e ho atu i te vahi no te enemi o ta‘u varua. … E te Fatu, ua ti‘aturi au ia oe, e e ti‘aturi au ia oe e a muri noa’tu » (2 Nephi 4:28, 34).
Eita anei o Nephi e roo-faahou-hia e te mau fifi ? Ua taa maitai anei ia’na te mau mea atoa e tupu ra i ni‘a iho ia’na ? A haamana‘o i te pahonoraa ta’na i horo‘a’tu i te hoê melahi e rave rahi mau matahiti na mua’tu a uihia’i oia i te hoê uiraa faufaa rahi no ni‘a i te Taraehara a te Mesia, o te tupu i muri mai : « Ua ite au e, ua aroha [te Atua] i ta’na mau tamarii ; area râ, aita râ vau i ite i te auraa o te mau mea atoa » (1 Nephi 11:17).
Eita atoa e nehenehe ia tatou ia ite i te auraa o te mau mea atoa, e nehenehe râ e e ti‘a râ ia tatou ia ite e te here nei te Fatu i Ta’na mau tamarii e e nehenehe tatou e fana‘o i te taato‘araa o te aroha e te Taraehara a te Mesia i roto i to tatou mau oraraa e i roto i ta tatou mau tutavaraa. Oia atoa, e ite tatou e e ti‘a ia tatou ia haamana‘o i te mamae e te ati ia horo‘a ana‘e tatou i te hoê parahiraa no te diabolo i roto i to tatou mau aau.
Noa’tu e maramarama maitai tatou e e faaoti tatou i te ti‘avaru i te ino e te diabolo i rapae au i to tatou mau aau e i to tatou mau oraraa, e topa tatou no te mea e mea pinepine tatou i te riro ei mau tane e e mau vahine « tino nei » (a hi‘o Mosia 3:19). No reira, e ti‘a ia tatou ia haamauruuru e ia faaohipa i te ture no te tatarahaparaa. Noa’tu e te parau pinepine nei tatou e to tatou tatarahaparaa o te hoê noa ia ohipa tei tupu, i te tahi mau taime te reira ihoa te huru, no te rahiraa râ o tatou e rave‘a tamau ïa te reira i roto i te maororaa o te oraraa nei.
Oia mau, te vai nei te mau hara na roto i te rave-ore-raa i te mea e ti‘a ia tatou ia rave e te raveraa i te mea eita e ti‘a ia tatou ia rave, ta tatou e nehenehe e haamata oioi i te tatarahapa. Te vai nei te tahi mau huru hara e te mau hape e nehenehe ta tatou e faarue i teie nei e ia ore e rave faahou. Ei hi‘oraa, nehenehe ta tatou ia riro ei feia aufau ti‘a i te tuhaa ahuru no te toe‘a o to tatou mau mahana, noa’tu e aita tatou i na reira na. Te vai nei râ te tahi atu mau tuhaa o to tatou oraraa e titau nei ia tamau noa tatou i te haamaitai e i te haapa‘o maitai, mai to tatou oraraa varua, to tatou aroha, to tatou haapa‘oraa i te hinaaro o vetahi ê, te haapa‘oraa i te mau melo no te utuafare, te tau’araa i to tatou mau taata tupu, te iteraa i te auraa o te mau papa‘iraa mo‘a, te raveraa i te ohipa i roto i te hiero, e te faito maitai o ta tatou mau pure tata’itahi.
E nehenehe tatou ia mauruuru i te mea e, no to’na ite maitairaa i to tatou mau huru hau atu i to tatou iteraa ia tatou iho, ua haamau te Fatu i te oro‘a ia nehenehe ia tatou ia faaapî tamau noa i ta tatou mau fafauraa na roto i te raveraa i te mau tapa‘o mo‘a ma te faaotiraa ia rave i To’na ra i‘oa mo‘a ia ni‘a iho ia tatou, ia haamana‘o noa Ia’na, e ia haapa‘o i Ta’na ra mau faaueraa. Ia pee ana‘e tatou i te e‘a o te faati‘a ia tatou ia « parahi ma te oaoa », e riro ïa ta tatou tatarahaparaa e ta tatou mau ohipa e mea maitai a’e, e e rahi atu â ïa te faito o to tatou aravihi i te taa maitai e i te mauruuru no te Taraehara.
Te tatarahaparaa e te haapa‘oraa
I te mau hepetoma na mua noa‘e i te faati‘a-raa-hia te Ekalesia i te matahiti 1830, ua farii te peropheta Iosepha Semita i te hoê heheuraa faahiahia o te faarahi i to tatou ite no ni‘a i te Taraehara no te mea o te Faaora Iho o tei parau mai e tei haapii mai. Ua faaite Oia Ia’na iho mai te « Faaora no to te Ao nei » (PH&PF 19:1), ua faaite oia e ua pee Oia i te hinaaro o te Metua, e ua parau oia, « Te faaue atu nei au ia oe ia tatarahapa, e ia haapa‘o hoi i te mau faaueraa ta oe i farii » (PH&PF 19:13).
Ua riro mau teie hi‘oraa ohie no te tarahaparaa e no te haapa‘oraa ei niu no te « parahi ma te oaoa ». Ua ite tatou e teie te mea e ti‘a ia tatou ia rave, noa’tu e mo‘ehia ia tatou i te tahi mau taime te tumu. Na roto i teie mau parau i muri nei no roto mai i taua ihoa heheuraa ra, te faahaamana‘o mai nei te Fatu ia tatou te tumu :
« No te mea inaha, ua faaoroma‘i au, o te Atua, i teie nei mau mea no te taato‘a, ia ore ratou ia roohia i te mamae mai te mea e e tatarahapa ratou ;
« Tera râ mai te mea e aita ratou e tatarahapa ia roohia ratou i te mamae rahi e tia’i ia au i ta‘u i faaoroma‘i ;
« Na te reira mamae rahi i faatupu i roto ia‘u, oia o te Atua, o tei hau a‘e i te mau mea atoa ra, i te rurutaina no te mauiui, e ua tahe mai ra te toto na te mau poa’toa, e ua mauiui i te tino e te varua atoa hoi – e ua hinaaro hoi ia ore au ia inu i te au‘a maramara e oriorio atu –
« Area râ, ei hanahana to te Metua, e ua inu vau e ua faaoti hoi i ta‘u mau faaineineraa i te tamarii a te taata nei » (PH&PF 19:16–19).
Aue ïa haapiiraa faahiahia e. Ua papû ia‘u e aita roa te hoê o tatou e nehenehe e feruri i te auraa e te puai o te mauiui o te Fatu a faatupu ai Oia i te Taraehara rahi. Aita vau i papû mai te mea ua noaa ia Iosepha Semita i taua taime ra te taato‘araa o te auraa o te mamae o te Faaora, noa’tu e ua noaa i te peropheta i te mauruuru e te maramarama rahi a‘e mai roto mai i to’na iho mau tamataraa e mau mauiui i te mau matahiti i muri mai. A feruri i te haapiiraa a‘o tei horo‘ahia e Iesu Iho a a‘o ai e a tamahanahana ai Oia ia Iosepha i te taime hepohepo roa no to’na tape‘a-raa-hia i roto i te fare tape‘araa no Liberty. I muri iho ua parau noa mai te Fatu : « Ua haere roa’tu te Tamaiti a te Taata i raro a‘e i teie mau mea atoa ra. Ua hau anei oe ia’na ra ? » (PH&PF 122:8).
Teie uiraa ia Iosepha o te hoê atoa ïa uiraa ia tatou tata‘itahi i roto i ta tatou mau aroraa e ta tatou mau tamataraa taa ê. Eita e ti‘a i te hoê noa‘e o tatou ia feaa noa‘e i te pahonoraa ti‘a. Eita e ti‘a i te hoê noa‘e o tatou ia feaa noa‘e i te pahonoraa ti‘a.
No te mea ua faaruru o Iesu i te mea Ta’na i faaruru, e ere no te mea aita i nehenehe Ia’na ia ape i te reira no te mea râ ua here Oia ia tatou, ua riro mau ïa te reira ei mea mana‘ona‘o-roa-hia. Ua here e ua faahanahana atoa o Iesu i To’na ra Metua ma te mana‘o hohonu e te parau-ti‘a o ta tatou e nehenehe noa e feruri. Mai te mea e mana‘o to tatou i te faahanahana e i te here atoa i te Faaora, e ore roa ïa e ti‘a ia tatou ia haamo‘e e ua rave Oia i te mea Ta’na i rave no tatou ia ore tatou e mauiui mai ta’na i mauiui, o ta te parau-ti‘a ana‘e hoi e titau ia tatou.
Na te ta‘iriraa, te mau faaereraa, te hamani-ino-raa, te mau naelo, e te mana‘o hepohepo e te mamae eita e noaa i te feruri i arata‘i Ia’na ia faaruru i te mamae u‘ana e ore roa e nehenehe e faaoroma‘ihia e te hoê taata mai te mea aita To’na mau mana e Ta’na faaotiraa ia tamau noa e ia faaoroma‘i i te mau mea atoa tei ravehia i ni‘a iho Ia’na.
Te aanoraa o te Taraehara
A feruri ai tatou i te aanoraa o te Taraehara e te hinaaro o te Faaora ia mauiui no ta tatou mau hara atoa, e ti‘a ia tatou ia ite ma te mana‘o mauruuru e ua rahi atu â te mau mea ta te tusia Taraehara i tapo‘i ! A feruri na i teie mau parau a Alama i te mau taata haapa‘o no Gideona fatata hoê tenetere hou a tupu ai te Taraehara :
« E e haere atu [Iesu], ma te faaoroma‘i i te mauiui, e te ati, te mau huru faahemaraa atoa ra ; e e na reira oia ia faati‘ahia te parau tei na ô mai ra e, e rave oia i te mauiui e te mau ma‘i o ta’na mau taata ia’na iho.
« E e faaoroma‘i oia i to’na poheraa, i tatara‘i oia i te mau tape‘a o te pohe i ruuruuhia’i to’na ra mau taata; e e rave oia i to ratou paruparu i ni‘a ia’na iho ia faaîhia to’na ra aau i te aroha i au i te tino, ia ite oia na roto i te tino i te rave‘a e faaora‘i i to’na mau taata i to ratou paruparuraa ra.
« E teie nei, ua itea i te Varua te mau mea atoa ra ; e faaoroma‘i te Tamaiti a te Atua i te mamae tino nei, ia rave oia i te mau hara a to’na ra mau taata i ni‘a ia’na iho, ia parai oia i ta ratou mau hapa mai te au i te mana o to’na faaora ; e teie nei, inaha, teie te ite vai ai i roto ia‘u nei » (Alma 7:11-13).
A feruri na i te hoê raau hopea e te maitai no to tatou mau mauiui, to tatou mau ati, to tatou mau faahemaraa, to tatou mau ma‘i, ta tatou mau hara, to tatou mau mana‘o oto, e ta tatou mau ofatiraa ture. E nehenehe anei ia tatou ia feruri i te tahi atu rave‘a mono i te Taraehara a Iesu ? I te reira a amui atu te Ti‘a-faahou-raa faau-ore-hia, i reira ia tatou e haamata ai i te maramarama e ia himene, «te maere nei au i to Iesu nei aroha ».5
Eaha te auraa no te parau no te Taraehara no outou e no‘u nei ? O te mau mea atoa ïa. Mai ta Iakoba i tatara mai, e nehenehe ia tatou ia « au outou [i te Metua] na roto i te Taraehara a te Mesia, i To’na ra Tamaiti Fanau Tahi » (Iakoba 4:11). Oia hoi e nehenehe ïa ia tatou ia tatarahapa, ia hoê roa e ia fariihia e Ana, e ia ape i te mau hape e te mau taa-ore-raa o te « huna i te aroha o te Mesia, e te faaore hoi i te Taraehara na’na, e te mana o to’na ra ohipa faaora» (Moroni 8:20).
E ape tatou i te tu‘ino e te faatura ore i te Taraehara a te Faaora na roto i te haapa‘oraa i te a‘o a Helamana, o te vai faufaa rahi noa ra i teie nei mahana mai te mau matahiti na mua noa’e i te taeraa mai o te Fatu i ni‘a i te fenua : « A haamana‘o, a haamana‘o e ta‘u na tamarii… aita’tu â rave‘a e ora‘i te taata nei, maori râ o te toto Taraehara no Iesu Mesia ra, o te haere mai ; e e haamana‘o e, e haere mai oia e faaroa i to teie nei ao » (Helamana 5:9).
Tei roto mau te ao nei i Ta’na Taraehara e te mau taata atoa mai te haamataraa e tae atu i te hopea. Eiaha na râ tatou e haamo‘e e i roto i to’na aanoraa e to’na hoperaa e ohipa atoa ïa na te taata tata’itahi e ua faaauhia te reira no te faatano e no te tatara maite i to tatou iho mau huru oraraa tata‘itahi. Ua hau a‘e to te Metua e to te Tamaiti ite no ni‘a ia tatou tata‘itahi i to tatou iho ite ia tatou iho e ua faaineine raua i te Taraehara no tatou tei tuea i to tatou mau hinaaro, i ta tatou mau tamataraa e te mau mea e maraa ia tatou i te rave.
Mauruuru i te Atua no te horo‘araa no Ta’na ra Tamaiti, e mauruuru i te Faaora no Ta’na Taraehara. E parau mau te reira e te ohipa nei te reira e e arata‘i te reira ia tatou i te vahi ta tatou e hinaaro nei i te haere.
I te aui : Te Pure i Getesemane, na Del Parson
Te Tamaraa Hopea, na Simon Dewey, courtesy of Altus Fine Art, American Fork, Utah
Faahoho‘araa na Frank Helmrich