Reni i ni‘a i te reni

Iakobo 1:5-6

Ua haapii te aposetolo Iakobo ia tatou te taviri no te fariiraa i te paari no ô mai i te Atua ra.

5 Te ere râ te hoê o outou i te ite, e ani oia i te Atua ra, o tei horo‘a hua mai i te maitai i te taata atoa ra, ma te pato‘i ore ; e e horo‘ahia mai ta’na.

6 E ani râ oia ma te faaroo, eiaha e feaa, o tei feaa ra e au ïa i te aru miti i patuhia e te mata‘i e fetoitoi a‘e ra.

A Ani i te Atua

Na te tai‘oraa i teie nei irava i arata‘i ia Iosepha Semita ia pure i roto i te uru raau mo‘a, i reira to’na iteraa i te Orama Matamua (a hi‘o Iosepha Semita – Aamu 1:11-17). E nehenehe anei ta oe e feruri i te mau hi‘oraa no roto mai i to oe utuafare aore râ i te tahi ohipa tei tupu i roto i to oe iho oraraa i reira te hoê taata te imi ra i te ite i farii ai i te pahonoraa i te hoê pure ? A papa‘i i te reira i roto i ta oe buka aamu.

O tei horo‘a hua mai i te taata atoa ra

« E haamaitairaa na te mau tamarii a te Atua ia haere atu i te Atua ra e ia farii i te heheuraa. … E ore te Atua e haapa‘o i te huru o te taata, e hoê â haamaitairaa to tatou paato‘a ».

Te peropheta Iosepha Semita, Te mau Haapiiraa a te mau Peresideni o te Ekalesia : Iosepha Semita (Buka Haapiiraa na te Autahu‘araa a Melehizedeka e te Sotaiete Tauturu, 2007), 132

Hua

Hua – ma te ti‘amâ, te horo‘a rahi, ma te rahi.

Pato‘i

Pato‘i – tahitohito, tama‘i, faahapa. Oia hoi, e pahono te Atua ia oe e e ore roa oia e riri ia oe no to oe pureraa Ia’na no te hoê pahonoraa i te hoê uiraa.

E e horo‘ahia mai

E faaroo e e pahono te Metua i te Ao ra i ta oe mau pure. E tae mai Ta’na mau pahonoraa i Ta’na iho taime e na roto i te mau rave‘a huru rau – ei hi‘oraa, i roto i te huru tereraa o to oe oraraa, na roto i te mau hamani-maitai-raa ia vetahi ê, aore râ na roto i te reo mărû e te ha‘iha‘i o te Varua Maitai. Teie te tahi mau rave‘a e nehenehe ia oe ia faaineine no te farii i te arata‘iraa na roto i te Varua (no roto mai i te « Heheuraa », True to the Faith [2004], 141-43) :

A pure ia arata‘ihia.
Ia vai faatura.
Ia vai haehaa.
A haapa‘o i te mau faaueraa.
A rave i te oro‘a ma te ti‘amâ.
A tai‘o i te mau papa‘iraa mo‘a i te mau mahana atoa.
A rave i te taime no te feruri hohonu.
Ia imi ana‘e i te arata‘iraa taa ê, a tuatapapa te ohipa i roto i to oe feruriraa.
A imi i te hinaaro o te Atua ma te faaoroma‘i.

A ani ma te Faaroo.

« Ua parau te peropheta [Iosepha Semita] e i muri a‘e i te tai‘oraa i teie nei irava ua ite papû oia e e ti‘a ia’na ia tamata i te Fatu e ia ani Ia’na aore râ ia ma‘iti i te faaea noa i roto i te pouri e a muri noa’tu. … Ua tai‘o oia i te papa‘iraa mo‘a, ua taa ia’na te papa‘iraa mo‘a, ua ti‘aturi oia i te Atua to’na Metua Mure Ore ; e i teie nei ua tuturi e ua pure oia, ma te ite e e horo‘a mai te Atua ia’na te maramarama ta’na i tutava u’ana. Ua haapii mai te peropheta Iosepha Semita ia tatou te parau tumu no te faaroo – na roto i te hi‘oraa ».

Peresideni Thomas S. Monson, « The Prophet Joseph Smith: Teacher by Example », Tambuli, Tiunu 1994, 5 ; Ensign, tiunu 1994, 4.

Faaiteraa no roto mai te taea‘e Iosepha, na David Lindsley ; hoho‘a na David Newman