Te Hoa i te Hoa
Te mau fafauraa a te hoê peropheta
« A ma‘imi i teie nei mau faaueraa, no te mea e parau mau te reira o te ti‘a ia ti‘aturi, e e faatupu-mau-hia te mau tohuraa e te mau fafauraa te itehia i roto i te reira » (PH&PF 1:37).
I roto i te roaraa o to‘u oraraa, ua haapii mai au e ia pee ana‘e tatou i te mau haapiiraa a to tatou mau peropheta, e farii ïa tatou i te mau haamaitairaa tei fafauhia. I te amuiraa rahi no te ava‘e Eperera 1986, ua fafau te peresideni Ezra Taft Benson (1899-1994) e mai te mea e tai‘o tamau amui noa te mau utuafare i te mau papa‘iraa mo‘a, e faaîhia to ratou nohoraa i te Varua.1
Ua faaoti maua to‘u hoa here ia pee i taua a‘oraa ra. Ua fataa maua i te hoê fâ ia tai‘o hoê pene i roto i te Buka a Moromona i te mahana e ta maua na tamarii e toru – Jorge, 10 ; Susi, 9 ; e o Luis, 3 matahiti. Ua tai‘o matou i te mau mahana atoa, hoê pene hoê taata e tae noa’tu i te hopea. Noa’tu e aita o Luis i nehenehe i te tai‘o, ua hinaaro ra oia ia tai‘o atoa. E parahi oia i ni‘a i to‘u turi avae, ma te hi‘o mai ia‘u, e te Buka a Moromona i ropu ia maua. Ia tae ana‘e i to‘u taime no te tai‘o, e pee maua e piti atoa ra i to‘u rima rii a faaite ai au i te parau tata‘itahi, e e tai‘o o Luis na muri ia‘u i te parau tata‘itahi ta‘u e tai‘o a hi‘o ai oia i taua mau parau ra o tei hurihia te pae ni‘a i raro.
Na mua noa’e i te paeraa o to’na matahiti, ua ani o Luis, « ahea to‘u taime no te tai‘o ? »
Ua haamaramarama maua ia’na e ia huru paari a‘e oia, e haere ia oia i te fare haapiiraa no te haapii i te tai‘o.
Ua pahono mai oia, « ua ite a‘e na vau i te tai‘o! »
Ma te maere, ua horo‘a’tu vau ia’na te Buka a Moromona. Ua tatara oia i te buka te pae ni‘a i raro, hi‘o atu ra i te ni‘araa, e ua haamata ihora i te tai‘o maitai. Ua haapii oia i te tai‘o na roto i te apeeraa i roto i te Buka a Moromona !
I te onoraa o to’na matahiti, ua hare mai o Luis i te tahi mau taime na muri ia‘u no te farerei i te mau melo no te Ekalesia. Ua ani au ia’na ia faaite i to’na iteraa papû e te hoê parau poro‘i poto no roto i te papa‘iraa mo‘a o ta‘u i haapii ia’na. Ia tai‘o ana‘e oia i roto i te Buka a moromona, e tape‘a oia i te buka ma te huri te ni‘araa i raro e e hi‘o oia mai ni‘a mai.
Te faaite papû nei au ia outou e mai te mea e haamata outou i te tai‘o i te mau papa‘iraa mo‘a mai te taime e tamarii-rii â outou, e rahi atu â to outou maramarama i te mau fafauraa a te Fatu e e ite outou i te mea Ta’na e hinaaro nei ia outou. Ia tae i te hoê mahana e riro mai outou ei metua e e noaa ta outou iho mau tamarii-rii. A haapii ia ratou ia tai‘o i te mau papa‘iraa mo‘a, e e ite ïa outou i te tupuraa o te fafauraa i roto i te Maseli 22:6. « E haapii i te tamaiti i te e‘a ia haere ra ; e ia paari oia ra, e ore e faarue i taua e‘a ra ».
I teie nei te faaoti nei o Luis i ta’na haapiiraa i te fare haapiiraa teitei e te rave nei oia i te ohipa Noa’tu eaha te maororaa e tapae mai oia i te fare na te ohipa mai, te fare haapiiraa, aore râ te hoê ohipa i te fare pureraa, te tai‘o noa nei â oia hoê pene i roto i te Buka a Moromona na mua a‘e oia e taoto ai. Ua tupu mau ihoa te fafauraa a te peropheta : ei hopea no to matou tai‘oraa i teie buka mo‘a, ua haamaitai-rahi-hia to matou utuafare e ua rahi atu â to matou tahoêraa.
Te ani nei au ia outou ia tai‘o i te mau papa‘iraa mo‘a i te mahana tata‘itahi. Mai te mea e nehenehe a tai‘o amui e to outou utuafare. Te faaitoito nei au ia outou te mau tamaroa ia faaineine no te tavini i te hoê misioni. Te ani nei au ia outou ia rave i te hoê fâ no te taatiraa i roto i te hiero no te oraraa mure ore. E ei faaotiraa te hinaaro nei au ia haamana‘o outou i te a‘oraa a te peresideni Gordon B. Hinckley (1910-2008), o tei parau mai ia tatou : « E ti‘a ia outou ia titau i te haapiiraa atoa e nehenehe e noaa ia outou … I roto anei te tata‘iraa i te mau afata faatoetoeraa, aore râ te ohipa a te hoê taote tapu aravihi, e ti‘a ia outou ia haapiipii ia outou ».2
E ta‘u mau tamarii here e, a faaroo i to outou mau orometua haapii, a haapa‘o maitai i roto i te mau piha haapiiraa, a faaitoito, e a haapii i te mau mea atoa ta outou e nehenehe e haapii mai. Te vai ra te mau haamaitairaa rahi roa ta te Fatu i faataa no outou e to outou mau utuafare. Ta tatou hopoi‘a o te « peeraa ïa i te peropheta ; ua ite oia i te e‘a ».3
I te 16raa te matahiti, i muri noa‘e i to’na bapetizo-raa-hia.
Ta’na tamaiti Luis e maha matahiti.
Mau hoho‘a na roto i te faati‘araa a Elder Octaviano Tenorio ; faahoho‘araa na Robert A. McKay