Parau poro‘i na te Peresideniraa Matamua
Te haapiiraa mai i te haapiiraa tumu mau
I tupu na te hoê tama‘i i rotopu i te maramarama e te pouri, i rotopu i te maitai e te ino, mai te haamani-raa-hia o te ao nei. E te u‘ana noa ra te tama‘i, e au ra e te rahi noa’tura â te mau pepe. Te vai nei to tatou paatoa mau melo no te utuafare ta tatou e here nei e tei tupaipaihia e te mau mana a Satane, o te hinaaro nei ia roohia te mau tamarii atoa a te Atua i te ati. E rave rahi mau pô aita tatou e taoto. Ua tamata tatou i te amui i te mau puai atoa no te maitai i te mau mana e ohu haati nei i te mau taata e aro nei i te mau mana no te pouri. Ua here tatou ia ratou. Ua horo‘a tatou i te hi‘oraa maitai roa‘e. Ua ti‘aoro tatou no ratou na roto i te pure. Ua horo‘a mai te hoê peropheta paari ia tatou i te hoê a‘oraa no ni‘a i te tahi atu â puai o ta tatou e haafaufaa ore nei i te tahi mau taime e e faaohipa iti nei.
E taata arata‘i o Alama no te hoê nunaa e faaruru ra i te haamouraa a te mau enemi taehae. I mua i taua ati ra, aita i nehenehe ia’na ia rave i te tahi mea, no reira ua ma‘iti oia. Ua nehenehe ia’na ia faati‘a i te mau patu aore râ ia faaineine i te mau nuu aore râ ia hamani i te mau mauhaa tama‘i. Ta’na ana‘e râ ti‘aturiraa ia upooti‘a o te titauraa ïa i te tautururaa a te Atua, e no reira ua ite oia e e ti‘a roa i te nunaa ia tatarahapa. No reira ua ma‘iti oia i te tamata i te hoê ohipa varua na mua roa : « E teie nei, no te mea e mana rahi to te a‘oraa i te parau a te Atua ia arata‘i i te taata ia rave i te ohipa ti‘a ; oia ïa, ua hau to reira mana i ni‘a i te aau o te taata i to te ‘o‘e, e to te tahi mau mea atoa te tae ia ratou ra ; no reira i mana‘o ai Alama e, e mea maitai ia tamata i te mana o te parau a te Atua » (Alama 31:5).
Haamatararaa i te mau feruriraa e te mau aau
Te parau a te Atua o te haapiiraa tumu ïa tei haapiihia e Iesu Mesia e Ta’na atoa mau peropheta. Ua ite Alama e e mana rahi to te mau parau no te haapiiraa tumu. E nehenehe te reira e haamatara i te feruriraa o te taata ia ite i te mau mea varua e ore e itehia e te mata taata. E nehenehe atoa te reira e haamatara i te mau aau i te mau faaiteraa o te aroha o te Atua e te hoê here i te parau mau. Ua faaohipa te Faaora i na tumu toopiti no te mana, no te haamatararaa i to tatou mau mata e te mau aau, i roto i te tuhaa 18 no Te Parau Haapiiraa e Te Mau Parau Fafau a haapii ai Oia i Ta’na ra haapiiraa i te feia Ta’na i hinaaro ia tavini Ia’na ei mau misionare. A faaroo ai outou, a haamana‘o na i taua tamaiti apî ra e vai ra i roto i to outou utuafare o te faataupupu nei i te faaineine ia’na no te hoê misioni. Nahea te Fatu i te haapiiraa i Ta’na na tavini e piti e nahea outou e nehenehe ai e haapii i Ta’na ra haapiira tumu i te feia api tane ta outou e here nei :
« E i teie nei, e Olive Kaudere, te parau atu nei au ia oe, e ia Davida Uitima atoa hoi, na roto i te faaueraa; no te mea, inaha, te faaue nei au i te taata atoa i te mau vahi atoa ia tatarahapa, e te parau atu nei au ia orua, mai ta‘u i na reira’tu ia Paulo, o ta‘u ïa aposetolo, ua parauhia hoi orua hoe â huru parauraa i parauhia ia’na ra.
« A haamanao na e e faufaa rahi to te mau varua taata i to te Atua hi’oraa mai » (PH&PF 18:9-10)
Ua haamata oia ma te parau i To’na ti‘aturiraa rahi ia raua. I muri iho ua ume mai Oia i to raua na aau Ia’na ma te parau i te rahi o te here o To’na Metua e To’na iho here i te mau varua atoa. I muri iho ua haere Oia i te niu o Ta’na haapiiraa tumu. Ua faaite Oia i te tumu rahi no to tatou here Ia’na :
« No te mea, inaha, ua faaoroma‘i te Fatu o to orua Faaora i te pohe o to’na tino ; no reira ua faaoroma‘i hoi oia i te mamae rahi o te mau taata atoa, ia ti‘a i te mau taata’toa ia tatarahapa e ia haere mai ia’na ra.
« E ua ti‘afaahou maira oia mai te pohe maira, ia ume mai oia i te taata atoa ia’na ra, na roto i te tatarahapa.
« E aue hoi te rahi o to’na oaoa i te varua taata ia tatarahapa ra ! » (PH&PF 18:11-13).
I muri a‘e i to’na horo‘araa i te haapiiraa tumu no ni‘a i Ta’na ra misioni no te haamatara i to raua na aau, ua horo‘a Oia ia raua i Ta’na ra faaueraa : « No reira, ua parauhia orua ia ti‘aoro atu i te parau tatarahapa i teie nei feia » (PH&PF 18:14).
I te pae hopea, ua haamatara Oia i to raua na mata no te ite atu i tera’tu pae i te paruru. Ua afa‘i Oia ia raua e ia tatou atoa i roto i te hoê oraraa i mua atu, tei faaitehia i roto i te opuaraa rahi no te faaora, i reira tatou e vai ai. Ua faaite Oia ia tatou i te mau auraa faahiahia ta tatou e fana‘o, ei faahoonaraa i ta tatou mau faatusiaraa atoa.
« E mai te mea e hope to orua pue mahana i te pororaa i te parau tatarahapa i teie nei mau taata, e ia arata‘i mai orua i te hoê noa a‘e varua taata ia‘u nei, aue hoi to orua oaoa rahi i pihai iho ia’na i roto i te basileia o to‘u Metua !
« E i teie nei, mai te mea ua rahi to orua oaoa i te varua taata hoê a‘e o tei arata‘ihia mai e orua ia‘u nei i roto i te basileia o to‘u Metua, eaha’tura â ïa te huru o to orua oaoa rahi ia rahi noa’tu â ta orua varua taata e arata‘i mai ia‘u nei ! » (PH&PF 18:15-16).
I roto i taua mau irava ra, ua haapii Oia i te haapiiraa tumu no te haamatara i to tatou mau aau i To’na ra here. E ua haapii Oia i te haapiiraa tumu no te haamatara i to tatou mau mata no te ite i te mau ohipa varua e tupu mau nei, tei ore e itehia e te hoê noa‘e feruriraa tei ore i turamahia e te Varua no te parau mau.
Nahea e ti‘ai ia tatou ia haapii
Te faaite mai nei te hinaaro i te haamatara i te mau mata e te mau aau ia tatou nahea e ti‘ai ia tatou ia haapii i te haapiiraa tumu. E noaa i te haapiiraa tumu to’na mana ia haapapû ana‘e te Varua Maitai e e parau mau te reira. E faaineine maitai tatou i te feia ta tatou e haapii ia farii i te mau parau hau o te reo iti ha‘iha‘i e te mărû. E titauhia te tahi maa faaroo ia Iesu Mesia E titauhia te tahi maa haehaa, te tahi maa hinaaro ia farii i te hinaaro o te Faaora no tatou nei. E mea iti paha te faaroo e te hinaaroo i roto i te taata ta outou e tauturu ra, e nehenehe râ ta outou e ti‘aoro ia’na ia faatupu i te hinaaro ia ti‘aturi. Hau atu i te reira, e nehenehe ta outou e ti‘aturi i te tahi atu o te mau mana no te haapiiraa. E nehenehe ta te parau mau e faaineine i to’na iho haerea. E nehenehe te faaroo-noa-raa i te mau parau no te haapiiraa tumu e tanu i te huero no te faaroo i roto i te aau. E titau atoa te hoê huero ha‘iha‘i roa no te faaroo ia Iesu Mesia i te Varua.
E rahi a‘e to tatou mana i ni‘a i ta tatou iho faaineineraa. E oaoa tatou i te parau a te Atua i roto i te mau papa‘iraa mo‘a e te tai‘oraa i te mau parau a te mau peropheta ora. E haapae tatou i te maa e e pure tatou no te ani i te Varua no tatou iho e no te taata ta tatou e haapii atu.
No te mea ho‘i e e hinaaro tatou i te Varua Maitai, e ti‘a ïa ia tatou ia ara maitai e ia haapa‘o maitai ia ore tatou e haapii i te tahi mea taa ê atu i te haapiiraa tumu mau. Ua riro te Varua Maitai ei Varua no te parau mau. E anihia ta’na haapapûraa na roto i te aperaa i te mana‘o-noa-raa aore râ na roto i ta tatou iho tatararaa. E mea fifi paha ia na reira. Ua here outou i te taata ta outou e tamata ra i te haapii atu. Aita paha oia i tau‘a i te haapiiraa tumu tei faaroohia na mua’tu. E faahemahia tatou i te tamata i te tahi mea apî aore râ te tahi mea faahiahia. E ani râ tatou i te Varua Maitai ei hoa no tatou ia haapa‘o ana‘e tatou i te haapii noa i te haapiiraa tumu mau.
Te hoê o te mau rave‘a papû roa‘e no te ape i te piri atu i te haapiiraa tumu hape o te ma‘itiraa ïa ia haapii ohie noa i roto i ta tatou huru haapiiraa. E noaa te parururaa na roto i taua ohieraa ra, e mea iti roa te mea e mo‘e. Ua ite tatou i te reira no te mea ua parau mai te Faaora ia tatou ia haapii i te haapiiraa tumu faufaa rahi roa i te mau tamarii rii. A faaroo na i Ta’na ra faaueraa : « E teie faahou â, mai te mea e tamarii ta te mau metua i Ziona, e aore râ i roto i te hoe o to’na ra mau tîtî i haamauhia ra, o te ore ho‘i e haapii atu ia ratou ra ia ite papû roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa no te horo‘a no te Varua Maitai na roto i te tuuraa rima, ia tae i te vau o te matahiti ra, tei ni‘a iho ïa te hara i te upoo o te mau metua » (PH&PF 68:25).
E nehenehe atoa ta tatou e haapii i te hoê tamarii rii ia ite i te haapiiraa tumu a Iesu Mesia. No reira e nehenehe, na roto i te tautururaa a te Atua, ia haapii ohie noa i te haapiiraa tumu no te faaora.
A haamata i te apîraa ra
Tei ia tatou ra te rave‘a rahi roa‘e i pihaiho i te feia apî. Te taime maitai roa‘e no te haapii o te apî-roa-raa ïa, a vai paruru-noa-hia ai te mau tamarii i te mau faahemaraa a to ratou enemi tahuti e na mua roa‘e i te taime e riro ai te mau parau mau e mea paari no ratou ia faaroo i rotopu i ta ratou iho mau aroraa.
E ore roa te hoê metua paari e ma‘iri i te hoê taime no te haaputuputu i te mau tamarii no te haapii i te haapiiraa tumu a Iesu Mesia. E mea varavara roa taua mau taime ra ia faaauhia i te mau tutavaraa a te enemi. No te hoê noa hora e faaitehia te mana no te haapiiraa tumu i roto i te oraraa o te hoê tamarii, te vai nei paha ïa e hanere mau hora no te mau parau poro‘i e mau hoho‘a o te pato‘i ra aore râ o te tau‘a ore ra i te mau parau mau no te faaora.
Eita e ti‘a ia ui e mai te peu e ua rohirohi roa anei tatou i te faaineine i te haapii i te haapiiraa tumu aore râ e mea maitai anei ia huti mai te hoê tamarii na roto noa i te faarearea aore râ te haamata ra te tamarii i te mana‘o e ua rahi roa ta tatou mau a‘oraa. Teie râ te uiraa e ti‘a ia uihia, « no te poto o te taime e no te varavara o te taime tano, eaha te mau parau no te haapiiraa tumu mai roto mai ia‘u o te nehenehe e haapuai ia ratou i mua i te mau aroraa i ni‘a i to ratou faaroo o tei papû roa e tae mai ihoa ? » E riro paha te mau parau ta outou e parau i teie nei mahana e mau parau ta ratou e haamana‘o. E eita e maoro roa e hope atu teie mahana.
Te tere nei te mau matahiti, e haapii tatou i te haapiiraa tumu mai te au i to tatou aravihi, e te vai nei â te tahi aita e pahono mai. Te vai nei te oto i roto i te reira. Te vai nei râ te ti‘aturiraa i roto i te buka papa‘iraa mo‘a a te mau utuafare. A haamana‘o na ia Alama te tamaiti e ia Enosa. I roto i to raua tau hepohepo, ua haamana‘o raua i te mau parau a to raua na metua tane, te mau parau no te haapiiraa tumu a Iesu Mesia (a hi‘o Enosa 1:1-4 ; Alama 36:16- 19). (a hi‘o Enosa 1:1-4 ; Alama 36:16–19). Na te reira i faaora ia raua. Ta outou haapiiraa i taua mau haapiiraa tumu mo‘a ra e haamana‘ohia ïa te reira.
Te mau haamaitairaa e vai maoro mai o te haapiiraa
E tupu mai paha e piti mana‘o feaa i roto i to outou feruriraa. E uiui paha outou mai te mea ua nava‘i anei to outou ite no ni‘a i te haapiiraa tumu no te haapii atu i te reira. E mai te mea ua tamata a‘ena outou i te haapii i te reira, e ui paha outou no te aha râ aita i rahi te maitai ta outou e ite nei.
Te vai nei i roto i to‘u iho utuafare te aamu no te hoê tamahine apî tei itoito i te haamata i te haapii i te haapiiraa tumu i te taime e melo faafariu apî oia e e mea iti roa to’na ite. No te mea ho‘i e aita te mau maitai no ta’na haapiiraa i hope atu ra na te reira ïa i horo‘a mai ia‘u te faaoroma‘i no te tia’i i te hotu no ta‘u iho mau tautooraa.
O Mary Bommeli te mama o to‘u papa ruau. Aita roa‘e au i farerei a‘ena ia’na. Ua faaroo ta’na mootua ia’na i te faaiteraa i to’na iho aamu e ua papa‘i i te reira.
Ua fanauhia o Mary i te matahiti 1830. Ua haapii te mau misionare i to’na utuafare i te fenua Helevetia i te 24raa o to’na matahiti. Te ora noa ra oia i te fare, ma te natinati e te hoo i te ahu no te tauturu i to’na utuafare e ora ra i ni‘a i to ratou fenua faaapu na‘ina‘i. I to te utuafare faarooraa i te haapiiraa tumu no te evanelia a Iesu Mesia tei faaho‘ihia mai, ua ite ratou e e parau mau te reira. Ua bapetizohia ratou. Ua piihia te mau taeae o Mary i te misioni, ua haere ratou ma te pute moni ore. Ua hoo te toe‘a o te utuafare i ta ratou mau tao‘a no te tere atu i Amerika no te amui atu i te feia mo‘a.
Aita i nava‘i te moni ia haere te taato‘araa. Ua faaoti o Mary na roto i to’na iho mana‘o ia faaea mai no te mea ua ite oia e nava‘i te moni e noaa ia’na na roto i te natinatiraa i te ahu no te turu ia’na e no te haaputu i te moni no to’na tere. Ua tere atu oia i Berlin e i te fare no te hoê vahine tei tarahu ia’na no te natinati i te ahu no te utuafare. Ua ora oia i roto i te piha taotoraa o te tavini vahine e ua haamau oia i ta’na matini natinatiraa i roto i te piha faafaaearaa o te utuafare.
Aita te ture i faati‘a i taua taime ra ia haapiihia te haapiiraa tumu a te Ekalesia a Iesu Mesia i te Feia Mo‘a i te Mau Mahana Hopea nei i Berlin. Aita râ i nehenehe ia Mary ia tape‘a noa te parau apî na’na ana‘e ra. E amui mai te vahine no te utuafare e to’na mau hoa ma te haati i te matini natinatiraa no te faaroo i te tamahine no Helevetia ia haapii. Ua paraparau oia no ni‘a i te fâraa mai o te Metua i te Ao ra e o Iesu Mesia ia Iosepha Semita, te fâraa mai o te mau melahi, e te Buka a Moromona. I to’na taeraa i te aamu no Alama, ua haapii oia i te haapiiraa tumu no ni‘a i te Ti‘a-faahou-raa.
Ua faatupu te reira i te tahi mau fifi i ta’na natinatiraa. E rave rahi mau tamarii e pohe nei i to ratou apîraa ra i taua mau mahana ra. Ua pohe te mau tamarii a te mau vahine e haati nei i te matini natinatiraa, e e rave rahi tamarii a te tahi o te mau vahine. I to Mary haapiiraa i te parau mau e e fatu ai’a te mau tamarii-rii i te basileia tiretiera e e nehenehe taua mau vahine ra e parahi faahou i pihaiho i ta ratou mau tamarii e i pihaiho i te Faaora e to tatou Metua i te Ao ra, ua tahe te mau roimata na ni‘a i te hoho‘a mata o te mau vahine. Ua ta‘i atoa o Mary. Ua rari roa te ahu ta Mary e natinati ra i taua mau roimata ra.
Ua faatupu te haapiiraa a Mary i te tahi fifi hau atu â i te rahi. Noa’tu ua taparu o Mary i te mau vahine eiaha e paraparau no ni‘a i te mau mea ta’na i parau ia ratou, ua paraparau ratou. Ua faaite ratou i te haapiiraa tumu oaoa i to ratou ra mau hoa. No reira i te hoê pô ua patotohia mai i te opani. O te muto‘i ïa. Ua afa‘i ratou ia Mary i te fare auri. I to raua haereraa, ua ani oia i te muto‘i i te i‘oa o te haava ta’na e farerei atu i te po‘ipo‘i a‘e. Ua ani oia mai te mea e utuafare anei to’na. Ua ani oia mai te mea e metua tane maitai e e tane faaipoipo maitai oia. Ua ata te muto‘i a faaite ai oia e e taata te haava o te au i te mau mea no teie nei ao.
I te fare tape‘araa ua ani o Mary i te hoê peni tara e te tahi api parau. Ua papa‘i oia i te hoê rata i te haava. Ua papa‘i oia no ni‘a i te Ti‘a-faahou-raa o Iesu Mesia mai tei faaitehia i roto i te Buka a Moromona, no ni‘a i te ao varua, e te maororaa e ti‘a i te haava ia feruri e ia hi‘opo‘a i to’na iho oraraa hou a ti‘a atu ai i mua i te haavaraa hopea. Ua papa‘i oia e ua ite oia e e ti‘a ia’na ia tatarahapa i te mea o te haamauiui i te aau o to’na utuafare e o te hopoi mai ia’na te oto rahi. Ua papa‘i oia i te maororaa o te pô. I te po‘ipo‘i ua ani oia i te muto‘i ia hopoi atu ta’na rata i te haava ra. Ua na reira oia.
I muri mai ua titauhia te muto‘i na te haava ia haere mai i to’na piha ohiparaa. Ua riro mau te rata ta Mary i papa‘i ei tapa‘o faaite papû e te haapii ra oia i te evanelia e te ofati ra oia i te ture. Area râ, aita i maoro roa ua ho‘i mai te muto‘i i te piha tape‘araa a Mary. Ua parau oia ia’na e ua faaorehia te mau faahaparaa atoa e ua ti‘amâ oia no te haere. Ua haamatara ta’na haapiiraa tumu i te haapiiraa no ni‘a i te evanelia a Iesu Mesia tei faaho‘ihia mai i te mau mata e te mau aau e ua nava‘i te reira no te tuu atu ia’na i roto i te fare tape‘araa. E na ta’na faaiteraa i te haapiiraa tumu no ni‘a i te tatarahaparaa i te haava i faahaere atu ia’na i rapae au i te fare tape‘araa.1
Te haamaitairaa i to outou mau huaai
E rave rahi atu â te mau taata ta te haapiiraa a Mary Bommeli i haamaitai taa ê hau atu i taua mau vahine ra o tei haati i te matini natinatiraa e i te haava. Ua paraparau mai to‘u metua tane, ta’na mootua, ia‘u i te mau pô hou a pohe ai oia. Ua paraparau oia no ni‘a i te mau farereiraa oaoa o te faatata i te tupu i roto i te ao varua. Ua faatata vau i te ite i te anaana o te mahana e te mau ata i taua vahi ra o te paradaiso a faahiti ai oia no ni‘a i te reira ma te ti‘aturiraa rahi.
I te hoê taime ua ani au ia’na mai te mea te vai nei te tahi tatarahaparaa e ti‘a ia’na ia rave. Ua ataata oia. Ua ata marû noa oia a parau ai oia, « aita, e Hal, ua tatarahapa noa na vau i te taato‘araa o to‘u nei oraraa » Ua riro te haapiiraa no ni‘a i te paradaiso ta Mary Bommeli i haapii i taua mau vahine ra ei parau mau no ta’na mootua tamaroa. E ua riro te haapiiraa ta Mary i haapii i te haava ei haamaitairaa i te oraraa o to‘u nei metua tane. E ere te reira te hopearaa o te haapiiraa a Mary Bommeli. E faaite te buka no ta’na mau parau i te haapiiraa mau i te mau u‘i no to’na utuafare tei ore â i fanauhia. No te mea ua ti‘aturi oia e e ite rii to te hoê faafariu apî i te parau haapiiraa no te haapii atu i te reira, e iritihia te mau varua e te mau aau o to’na mau huaai, e riro ratou i te puai atu no te aroraa.
E haapii ïa ta outou mau huaai i te haapiiraa tumu i te tahi e te tahi no te mea ua haapii outou i te reira. E rave rahi atu â te ohipa ta te haapiiraa tumu e faatupu i te haamatara-noa-raa i te mau feruriraa i te mau mea no te pae varua e i te mau aau i te here o te Atua. Ia afa‘i ana‘e mai te haapiiraa i te oaoa e te hau, e mana atoa to’na no te haamama i te mau vaha. Mai te au i taua mau vahine ra i Berlin, eita e nehenehe ta to outou mau huaai ia tape‘a i te parau api na ratou ana‘e.
Te mauruuru nei au no te oraraa i te hoê tau e te vai nei ia tatou e i to tatou mau utuafare te îraa o te evanelia tei faaho‘ihia mai. Te mauruuru nei au no te misioni aroha a te Faaora no tatou e no te mau parau no te ora Ta’na i horo‘a mai na tatou. Te pure nei au e ia nehenehe ia tatou ia horo‘a i taua mau parau ra i te mau taata tei herehia e tatou. Te faaite papû nei au e te ora nei te Atua to tatou Metua e te here nei oia i te taato‘araa o Ta’na mau tamarii. O Iesu Mesia Ta’na Tamaiti Fanau Tahi i te tino nei e to tatou Faaora. Ua ite au e ua ti‘afaahou Oia, e ua ite au e e nehenehe tatou e tamâhia na roto i te haapa‘oraa i te mau ture e te mau oro‘a no te evanelia a Iesu Mesia.
Mau Faahoho‘araa na Michael T. Malm
Hoho‘a na Christina Smith