Eiaha e ara maoro i te pô no te rave i te ohipa
Ia tae mai te taime no te farii i te parau tuite na te fare haapiiraa teitei, ua ite au e ua haamaitai te mau parau tumu no te evanelia i to‘u nei oraraa pae tino—e to‘u atoa oraraa—pae varua.
I to‘u apîraa ei tamahine apî, te rahiraa o ta‘u mau piiraa i roto i te Ekalesia o te haapiiraa ïa i te mau tamarii Paraimere, e na te reira i tura‘i i ta‘u faaotiraa ia titau i te hoê parau tuite no te haapii i roto i te fare haapiiraa tua tahi. Te ma‘itiraa i te hoê parau tuite e ere ïa te reira te hoê ana‘e rave‘a i tauturu ai te mau haapiiraa a te Ekalesia i ta‘u nei haapiiraa. Ua ite-mau-hia te reira a faaineine ai au i te faaoti i te haapiiraa teitei.
Te ohipa hopea ta‘u e ti‘a ia rave o te hoê ïa parau papa‘i ta‘u e ti‘a ia paruru atu i mua i te hoê hi‘opo‘araa i mua i na haava e toru. Te mau haava o te tahi ïa o te mau orometua haapii tei haapii i ta‘u mau piha haapiiraa.
Ia oti maitai ta‘u parau i te papa‘ihia, ua haere atu vau i pihai iho i te utuafare o to‘u hoa tamaroa i te ahiahi hou te hi‘opo‘araa. I te taime a ho‘i ai au i te fare, ua parau mai to’na metua vahine e te ti‘aturi nei oia e e manuïa te mau mea atoa e ua faahiti oia « mai te mea ua vai ineine noa outou e ore outou e măta‘u ». (PH&PF 38:30).
Ua tae mai te mahana i muri mai. E rave rahi mau haamana‘oraa tei tere na roto i to‘u nei feruriraa. Ua haamana‘o vau e nahea to‘u faaotiraa i te faarue i te oire i reira to‘u paariraa no te faananea i ta‘u haapiiraa ; ua haamana‘o vau i te mau tusia atoa ta to‘u utuafare i rave no te aufau i te reira. Eita e ti‘a ia‘u ia faainoino ia ratou. E ti‘a roa ia‘u ia manuïa i ta‘u nei hi‘opo‘araa hopea.
Te tia‘i atoa ra to‘u mau hoa piahi no te rave i ta ratou mau hi‘opo‘araa. Ua pe‘ape‘a pauroa matou no ni‘a i te mau uiraa ta te mau haava e ui mai, ua vai hau noa râ vau no te mea ua pure au no te tauturu e no te mea ua ite au e ua ite te Atua i te tautooraa ta‘u i rave no te faanaho, no te ma‘imi e no te papa‘i i ta‘u nei parau papa‘i.
Ua tae mai to‘u taime. I muri a‘e i to‘u tatararaa i ta‘u parau i te tomite hi‘opo‘a, ua haamata vau i te pahono i te mau uiraa. I muri a‘e i te uiraa i te mau uiraa e rave rahi no ni‘a i te tumu parau ta‘u i hohora, ua ui te hoê o te mau haava, « e hea rahiraa o te taime ta oe i horo‘a no te papa‘i i ta oe parau ? »
Ua pahono vau, « e mea huru rahi ». « Ua horo‘a vau i te mau mea atoa ta‘u i ite no te mea ua hinaaro vau ia hohora i te mau mana‘o apî ».
« Ua ara anei oe i te maororaa pô no te papa‘i i ta oe parau ? »
Ua pahono atu vau e « aita, aita vau e ara nei i te pô no te rave i ta‘u ohipa haapiraa ». « E faanaho vau i ta‘u ohipa i te taime ao ia nehenehe ia‘u e rave faaoti i ta‘u ohipa ».
Ua hiti mahuta te hoho‘a mata o te mau haava. Ua parau mai taua â haava ra, « te maere nei au e ua haapapû oe e aita oe e ara nei i te maororaa pô. Ua ite matou e ua na reira to oe mau hoa piahi e rave rahi mau pô ».
Ua parau ihora te hoê o te mau haava, « e parau atu vau ia outou no ni‘a i teie nei piahi. E taime to’na no te mau mea atoa. E nehenehe ta‘u e parau i te reira no te mea ua matau vau ia’na. E taime to’na no ta’na mau haapiiraa, to’na mau hoa, to’na utuafare e te haere atoa nei oia i te pureraa ».
« Oia mau aneI ? » ua maere faahou â te tahi atu haava. « Eaha ta oe ekalesia e haere nei ? »
« E melo vau no te Ekalesia a Iesu Mesia i te Feia Mo‘a i te Mau Mahana Hopea nei ».
« E, oia, ua ite au eaha taua ekalesia ra », pahono maira te hoê.
« E ua haapiihia matou ia haere oioi e taoto ia nehenehe ia matou ia î i te itoito e te ora ite mahana i muri mai ».
Ua ite au i te hau e te pe‘ape‘a ore no te paraparau no ni‘a i te evanelia, noa’tu e ua hitimahuta vau i te uiui-raa-hia no ni‘a i te pae faaroo i roto i te hoê hi‘opo‘araa no te ohipa.
« Ua papa‘ihia ta oe parau ma te mana‘o papû. E mea maitai roa te reira. Te mana‘o nei au ua ravehia te reira na roto atoa i te mau rave‘a tei haapiihia ia oe i roto i ta oe ekalesia ».
« Oia mau » pahono atu ra vau. « Ua haapiihia vau i te fare pureraa nahea ia haapii i te mau tamarii, e ua tauturu mau te reira ia‘u e ta‘u nei parau tuite ».
« E mea maitai roa ta oe raveraa mai te i‘a i roto i te pape » parau ata mai ra te hoê o te mau haava. « Te ti‘aturi nei matou eita oe e faaea i te haere i te pureraa, no te mea ua fana‘o rahi oe i te mau faufaa tei noaa ia oe i reira ».
Ua faahaerehia’tu vau i rapae au i te piha ia nehenehe i te mau haava ia rave i te hoê faaotiraa. E piti minuti i muri mai ua pii faahou ratou ia‘u ia tomo atu.
« Aita matou i fifi no te raveraa i te hoê faaotiraa. No to oe hi‘oraa maitai, ta oe mau numera maitai roa, e te parau ta oe i paruru i teie nei mahana, ua hoê matou paatoa i te horo‘a i ta oe parau tuite na roto i te haapoupouraa. Ia haapoupouhia oe ! »
I to‘u faaiteraa i to‘u utuafare, ua ta‘i ratou i te oaoa.
Te faaite papû nei au e a faaue ai te Metua i te Ao ra ia tatou « ia haere vave atu i ni‘a i to ro‘i, ia ore outou e rohirohi ; a ti‘a vave mai i ni‘a i te po‘ipo‘i ra, ia faaitoitohia to outou mau tino e to outou mau feruriraa hoi » (PH&PF 88:124), ua na reira Oia ma te opuaraa i te haamaitai ia tatou. Te haamauruuru nei au Ia’na no to’na faati‘araa i te evanelia ia hopoi mai i te oaoa ia matou i roto i te mau tuhaa atoa o to matou oraraa.
Faahoho‘araa na Christina Smith