Taime faaiteiteraa

O Iesu To‘u Faaora

Na Cheryl Esplin

« O vau te e‘a, e te parau mau, e te ora : aore roa e taata e tae i te Metua ra, maori râ ei ia‘u » (Ioane 14:6).

Na mua a‘e to te Metua i te Ao ra tonoraa mai ia tatou i ni‘a i te fenua, ua ma‘iti oia ia Iesu Mesia ei faatere e ei Faaora no tatou. Ua ma‘iti outou ia pee ia Iesu Mesia hou to outou fanau-raa-hia.

I to Iesu haereraa mai i te fenua nei, ua haapii Oia i te evanelia e ua faati‘a i Ta’na Ekalesia. Ua tape‘a Oia i Ta’na fafauraa ia riro ei Faaora no tatou. Ua mauiui e ua pohe Oia e ua ti‘afaahou ia nehenehe ia tatou ia ti‘a-faahou e ia ora faahou â i pihai iho i te Metua i te Ao ra e to tatou mau utuafare.

Te haapii nei te mau papa‘iraa mo‘a ia tatou i te rahiraa o te mau haamaitairaa e noaa ia tatou na roto ia Iesu Mesia. Te haamana‘o ra anei outou i te aamu no te orama a Lehi ? Ua ite Lehi i te hoê tumu raau. Te tumu raau o te here ïa o te Metua i te Ao ra e o Iesu Mesia.

Te vai ra i ni‘a i te tumu raau te hotu o te faaoaoa i te taata. Ua tamata o Lehi i te hotu, e ua î oia i te oaoa rahi. Ua hinaaro o Lehi i te taato‘araa o to’na utuafare ia tamata i te hotu. (a hi‘o 1 Nephi 8:10–12).

Te hotu o te tumu raau o te mau haamaitairaa ïa ta tatou e farii maori o Iesu Mesia e Ta’na Taraehara. E tamata tatou i te hotu ia ti‘aturi ana‘e tatou ia Iesu Mesia, ia bapetizohia tatou e ia farii i te Varua Maitai, e ia ora tatou i te evanelia e ia ite i te here o to tatou Faaora.

Faaoaoaraa

A iriti te api H5, e a hamani i ni‘a i te parau paari. A tapû i te mau pute i roto i te tumu raau na ni‘a i te mau reni uouo, e a tapû mai te hotu. No te hotu tata‘itahi, a hi‘o i roto i te papa‘iraa mo‘a, a imi i te haamaitairaa ta te Metua i te Ao ra i horo‘a mai ia tatou, e a papa‘i te reira i ni‘a i te reni. A tuu te tapa‘o o te hotu i roto i te hoê pute i ni‘a i te tumu raau.

Mau mana‘o no te taime faaiteiteraa

I roto i te ao varua, ua ma‘iti au i te pee ia Iesu Mesia. A ani i te mau tamarii ia faaite mai i te tahi o te mau ma‘itiraa ta ratou i rave i taua mahana ra (eaha te ahu, eaha te amu, e te tahi atu â). A papa‘i i te mau pahonoraa i ni‘a i te iri papa‘i. A haamaramarama e ua horo‘a te Metua i te Ao ra ia tatou te ti‘amâraa, te ti‘araa ia ma‘iti. A haapii no ni‘a i te Apooraa i te Ra‘i ra, a hohora mai ai te Metua i te Ao ra i Ta’na faanahonahoraa. A haamaramarama e te faaohiparaa i to tatou ti‘amâraa e tuhaa ïa te reira no taua faanahonahoraa ra. A tauturu i te mau tamarii ia ite e ua hinaaro o Satane ia taui i taua faanahonahoraa ra e ia tape‘a i to tatou ti‘araa ia ma‘iti. Ua hinaaro o Iesu Mesia ia apee i te faanahonahoraa a te Metua i te Ao ra e ua pûpû oia Ia’na iho ia riro ei Faaora no tatou. A haapapû i te mau tamarii e ua ma‘iti ratou ia pee ia Iesu Mesia (a hi‘o Paraimere 6, haapiiraa 2). A papa‘i i te mau uiraa o te tauturu i te mau tamarii ia hi‘o faahou i te mea ta ratou i haapii mai. A tuu te mau uiraa i roto i te hoê farii. A ma‘iti i te hoê tamarii no te huti mai i te hoê uiraa e ia pahono i te reira. A ani i taua tamarii ra ia ma‘iti i te hoê atu tamarii no te huti i te hoê uiraa e ia pahono i te reira. A na reira noa ia au i te taime e toe ra. A faaite i te iteraa papû no ni‘a i te faufaa rahi i te tamau-noa-raa i te pee ia Iesu Mesia.
E ti‘afaahou â vau e to‘u utuafare. Na mua roa e ma te parau faati‘a a te episekopo aore ra peresideni amaa, a titau manihini i te hoê melo o tei farerei i te ati pohe o te hoê melo herehia ia faaite i to’na iteraa papû no ni‘a i te auraa o te ti‘a-faahou-raa. A faanaho i teie mau hoho‘a i muri nei mai teie te huru i ni‘a iho roa te hoho‘a 227 (Te pure ra o Iesu i Getesemane), 228 (Te hoo-raa-hia o Iesu), 230 (Te faasatauroraa), 231 (Te hunaraa o Iesu), 233 (Maria e te Fatu tei Ti‘afaahou mai), 234 (Te faaite ra Iesu i To’na mau puta), e 316 (Te haapii ra o iesu i te fenua Marite). A hauti ai te taata hauti i te piana, a vaiiho i te mau tamarii ia horo‘a i te tahi e te tahi te hoê ofa‘i iti. A parau ia ratou e faahoho‘araa te reira i te ofa‘i tei tura‘ihia i mua i te uputa o te menema o te Mesia. Ia faaea ana‘e te pehe, a ani i te tamarii e mau ra i te ofa‘i ia rave i te hoho‘a matamua e ia paraparau mai no ni‘a i te reira aore râ ia ani i te tahi atu tamarii no te tauturu. A na reira noa i te mau hoho‘a i muri mai ma te faaea rii i muri i te 234 no te tai‘o amui i te Luka 24:39. A tauturu i te mau tamarii ia maramarama e, i muri a‘e i to Iesu ti‘a-faahou-raa, ua nehenehe i te mau aposetolo i te tape‘a i To’na na rima mai ta te mau tamarii e nehenehe e tape‘a i to ratou iho nau rima. A na reira noa no te toe‘a o te mau hoho‘a. A haapii e maoti te Taraehara a Iesu Mesia, e ti‘afaahou te mau taata atoa i ora i ni‘a i te fenua nei. A vaiiho râ i te manihini ia faaite i to’na iteraa papû.

Faahoho‘araa na Brad Teare