Te rave-hau-atu â i te mea tei titauhia
I te tahi mau taime e faatupu te tahi maa tautooraa i te mau mea rarahi.
I te 15raa o to’na matahiti, e ere o Stein Arthur Andersen i te mea itoito i roto i te Ekalesia. E to’na atoa utuafare. Ua taui ratou i te vahi faaearaa e rave rahi mau taime i Norevetia. I teie taime te ora ra ratou i Stavanger. O te maharaa ïa o te oire rahi roa‘e i te fenua e tei te pae tatahi apatoerau tooa o te râ. Ua haere o Stein i te fare pureraa i Stavanger te tahi mau taime e ua farerei oia i te tahi o te feia apî no te Ekalesia i taua vahi ra. Ua putapû roa oia na roto i te huru o te hoê ihoa râ taurearea tane---to’na i‘oa o Tor Lasse Bjerga.
I roto i te hoê o taua mau haereraa-pinepine-ore i te fare pureraa to Stein farereiraa ia Tor Lasse. Ua parau o Stein « e piti matahiti paari a‘e oia ia‘u, e ua maere roa vau i to’na huru ». « Ua farii au i te hoê varua maitai ia faaea ana‘e au i pihai iho ia’na, e ua mana‘o vau e e taata faahiahia teie ». Ahani e aita o Stein i faahiahia ia Tor Lasse, eita paha oia e hinaaro i te faaroo ia’na a haere ai o Tor i te fare o Stein na roto i te hoê aniraa taa ê.
Ua tae mai taua aniraa ra i te afaraa o te mau matahiti 1970, a faahaerehia’i te faanahonahoraa haapiiraa evanelia i Norevetia e ua piihia o Tor Lass ei orometua haapii matamua no te haapiiraa evanelia. No te mea ho‘i e e 18 matahiti noa to’na i taua taime ra, ua mata‘u rii o Tor Lasse no te raveraa i taua huru hopoi‘a rahi ra. Ua haamana‘o oia e « ua pure rahi au no ni‘a i te reira ». Te hoê mea ta’na i ite papû oia ia to’na hinaaro i te toro atu i te rima i te feia apî paruparu i roto i to’na vahi nohoraa. Ua parau o Tor Lasse e, « ua nehenehe ia‘u ia ite i te reira ihoa taime e e ti‘a ia‘u ia haere e farerei ia Stein Arthur ».
Ua parau o Stein « o vau paha te hoê o te mau i‘oa i ni‘a i te hoê tabula ». No Tor Lasse râ, e ere noa o Stein i te hoê noa i‘oa i ni‘a i te hoê tabula. Ua haamana‘o o Tor Lasse i to’na maere i te maramarama o Stein e to’na huru hau e te papû. No reira o Tor Lasse i faaoti ai i te haere roa’tu e farerei no te ani ia Stein ia haere i roto i te faanahoraa apî no te haapiiraa evanelia.
Hou oia a haere ai ua niuniu o Tor Lasse na mua roa e ua aparau i te mau metua no Stein no te haapapû e tei te fare oia no te tere farerei. No te haere atu i te fare o Stein, e titauhia ia Tor Lasse ia tere na ni‘a i te pereoo uta taata e 35 minuti te maoro e tapae atu ai i te pahi faauta pereoo uira. I muri iho e rave oia i te hoê tere na ni‘a i te pahi faauta pereoo uira e 45 minuti te maoro. I te pae hopea e haere avae faahou oia e 30 minuti. Te parau ra o Stein « ua feruri noa vau no ni‘a i te reira i te taato‘araa o te taime ». « Te mea ta Tor Lasse i rave o te rave-hau-atu â ïa i te mea tei titauhia ».
Te haamana‘o maitai noa ra na taata toopiti i te Varua ta raua i ite i roto i taua farereiraa fatata e 35 matahiti i teie nei. A parahi ai raua i roto i te piha tamaaraa, ua haere te feruriraa o Stein i ni‘a i te mau mea atoa ta’na e rave ra i taua taime ra. « Mea rahi roa ta‘u ohipa e te tueraa popo e te ohipa scout e te hautiraa i te fata‘i pû, e te rave nei au i te mau huru ohipa atoa. E taata ohipa roa vau ».
Ua hi‘o mai o Tor Lasse ia‘u a paraparau ai oia no ni‘a i te haapiiraa evanelia, e ua parau mai oia e, ‘e Stein Arthur, e haere mai anei oe i te fanahonahoraa no te haapiiraa evanelia e ia haamata i te tai‘o i te mau papa‘iraa mo‘a e matou nei ?’ Te parahi ra vau i pihaiho i te pae auahi e ua parau atu ra vau ‘e’. Ia feruri-maitai-hia ana‘e, ua ti‘a ia‘u ia parau atu ia’na e ‘aita’ no te mea aita to‘u e taime. Ua parau râ vau ‘e’. E o te reira te haamataraa te taato‘araa o te ohipa ».
I roto i te « taato‘araa o te ohipa » o te ti‘araa ïa i ni‘a i te mau po‘ipo‘i atoa no te tai‘o i te mau papa‘iraa mo‘a e ta’na mau haapiiraa evanelia ona ana‘e i te fare. E e ruru amui te pŭpŭ iti e maha e tae atu e pae piahi i te mau hebedoma atoa. Ua parau o Stein e « ua haamata vau i te ite i te Varua i taua mau aahiata ra, te tai‘oraa o vau ana‘e, e te ti‘araa i ni‘a i te mau po‘ipo‘i atoa. « I muri mai ua ite au e au ra aita te mahana i manuïa maitai mai te mea aita vau i tai‘o i te po‘ipo‘i. E ua haamata vau i te farii i te hoê iteraa papû ma te ite ore e te noaa ra ia‘u te hoê iteraa papû ».
Ua tatara mai o Stein e « i muri mai ua ite au eaha mau taua mau mana‘o ra. Ua oaoa vau i te mau mea ta‘u e haapii mai ra, e ua ite au i te mana o te Varua. Ua ite au e e mea ti‘a te reira. E ua ite au e teie te tahi mea ta‘u i hinaaro ia patuhia to‘u nei oraraa i ni‘a i te reira ».
E aha râ ïa o Stein i parau ai ‘e’ i te taime ua rahi roa ta’na ohipa ? Ua parau oia e « i to‘u mana‘oraa ua haa te mana o te Varua Maitai i ni‘a iho ia‘u. « Ua faaineinehia paha vau. No reira i te taime a haere mai ai o Tor Lasse ma te faaroo, ua rave oia i te piti o te maile, e ua ineine au i te farii i ta’na aniraa. Tera te rave‘a e rave ai te Fatu i te ohipa ».
E hoê matahiti i muri mai, ua faaoti o Tor Lasse e haere i te misioni e ua piihia oia ia tavini i te fenua no Norevetia. I roto i taua taime ra ua tamau noa o Stein i te haapuai i to’na iho iteraa papû no te evanelia. Te na ô ra o Stein e « i to Tor ho‘iraa mai mai ta’na misioni, na te reira i tura‘i ia‘u ia feruri atoa no ni‘a i te hoê misioni. « Ua faaoti au e e ti‘a ia‘u ia haere no te mea ua hinaaro vau i te taivini i te Fatu, e ua mana‘o vau e mai te mea aita vau e haere, e tatarahapa ïa vau no te reira i te toe‘a o to‘u nei oraraa ».
Ua haamana‘o o Stein e i muri a‘e i to’na aparauraa i to’na feia faatere no te autahu’araa no ni‘a i te haereraa i te misioni, ua ite oia e mai te mea ra e no to’na oaoa aita to’na avae e taahi ra i ni‘a i te fenua a ho‘i ai oia i te fare. Hou oia a haere ai i ta’na misioni (i Norevetia atoa), ua farerei o Stein i te vahine o te riro mai ei vahine na’na, o Hilde, i te hoê amuiraa a te feia apî i Oslo. Ua papa‘i raua i te rata i te tahi e te tahi i roto i ta’na tau misioni, e i muri a‘e i to’na ho‘iraa mai, ua faaipoipohia raua. I teie nei e maha ta raua tamarii: e piti tamaroa, tei faaipoipo-toopiti-hia i te hiero, e e piti na tamahine apî te faaea noa ra i te fare e te itoito ra i roto i te haapiiraa evanelia.
Ua parau o Stein e « i taua pô ra a haere mai ai o Tor Lasse i to matou nei fare – na te reira i taui roa i te taato‘araa o to‘u nei oraraa. Na taua tere farereiraa ra i faahaere ia’na na ni‘a i te e‘a i reira oia i farerei ai i ta’na vahine faaipoipo, i tavini ai oia i te hoê misioni, i haamata ai oia i te hoê utuafare, ma te hoê iteraa papû no ni‘a i te evanelia. « Ua tavini na vau ei peresideni amaa, peresideni mataeinaa, episekopo – teie mau mea atoa no te mea ïa ua haere mai o Tor Lasse i to matou fare e ua haamata vau i te faanahoraa no te haapiiraa evanelia ». Ua tupu teie mau mea atoa no te mea ua hinaaro o Tor Lasse ia haere i te piti o te maile.
Mau faahoho‘a raa na Greff Thorkelson
Hoho‘a na Paul VanDenBerghe
Ida Andersen (i te atau) e to’na tuahine, Ane, e to’na na metua, Hilde e Stein