Parau poro‘i na te mau Tuahine Hahaere

Imi maite i te mau papa‘iraa mo‘a

A haapii i te mau papa‘iraa mo‘a e te mau faahitiraa parau o te tauturu i te mau tuahine ta outou e hahaere ra ia maramarama i teie mau tumu parau. A ani ia ratou ia faaite mai i te mea ta ratou i farii e i haapii mai.

No te aha e ti‘a ai ia imi maite i te mau papa‘iraa mo‘a ?

Peresideni Howard W. Hunter (1907-95) : « Te faaite atu nei au ia outou i te mau heheuraa a te Atua ei hoho‘a no te oraraa o ta tatou e ora e ei faito no te mau faaotiraa e te mau ohipa atoa. No reira, ia farii ana‘e outou i te mau pe‘ape‘a e te mau ati, a faaruru i te reira na roto i te fariuraa’tu i te mau papa‘iraa mo‘a e te mau peropheta (« Fear Not, Little Flock », in 1988-89 Devotional and Fireside Speeches [1989], 112).

Peresideni Ezra Taft Benson (1899–1994) : « Te manuïraa i roto i te parau ti‘a, te puai no te ape i te mana‘o inoino e i te pato‘i i te faahemaraa, te arata‘iraa i roto i to tatou oraraa i te mau mahana atoa, te faaoraraa i te varua— e mau tuhaa rii noa teie no te fafauraa ta te Fatu i horo‘a i te feia e haapa‘o i Ta’na Parau … E itehia te tahi mau haamaitairaa i roto ana‘e ra i te mau papa‘iraa mo‘a, na roto i te tai‘oraa i te parau a te Fatu e i te tape‘a-maite-raa i te reira …

« … A rave faahou â i te faaotiraa ia tai‘o i te mau papa‘iraa mo‘a. A horo‘a i te taato‘araa o outou iho i roto i te reira i te mahana tata‘itahi ia noaa ia outou te mana o te Varua ia parahi i pihai iho ia outou i roto i to outou mau piiraa. A tai‘o i te reira i roto i to outou mau utuafare e a haapii i ta outou mau tamarii ia here e ia faafaufaa i te reira » (« The Power of the Word », Ensign, Me 1986, 82).

Peresideni Spencer W. Kimball (1895-1985) : « Ia matau ana‘e outou i te mau parau mau no te mau papa‘iraa mo‘a, e rahi roa’tu â ïa to outou maitai i te haapa‘oraa i te piti o te ture rahi, oia ho‘i, e aroha’tu oe i to taata tupu mai to aroha ia oe iho na. Ia riro outou ei feia aivanaa no te mau papa‘iraa mo‘a— eiaha no te faafaufaa ore ia vetahi ê, no te faateitei râ ia ratou ! O vai ho‘i te vahine e hinaaro rahi nei i te ‘tape‘a maite’ i te mau parau no te evanelia (o ta ratou ho‘i e nehenehe e hi‘o atu i te mau taime hinaarohia) maori râ te mau vahine e te mau metua vahine o te aupuru e te haapii rahi nei ? (« The Role of Righteous Women », Ensign, Novema 1979, 102).

Nahea va‘u i te faaherehere i te mau papa‘iraa mo‘a ?

2 Nephi 4:15 : « No te mea ua au to‘u varua i te parau mo‘a i papa‘ihia ra, e te feruri nei to‘u aau i te reira, e te papa‘i nei hoi i te reira ei haapiiraa e ei faufaa na to‘u mau tamarii ».

Julie B. Beck, Peresideni rahi no te Sotaiete Tauturu : « Te hoê rave‘a maitai no te haamata i te tai‘o i te mau papa‘iraa mo‘a o te ‘faaauraa’ ia ratou ia tatou (a hi‘o 1 Nephi 19:23). E haamata te tahi mau taata ma te ma‘iti i te hoê parau tumu i roto i te Topical Guide o ta ratou e hinaaro ia rahi atu â to ratou ite no ni‘a i te reira. Aore râ e haamata ratou ia imi i te mau haapiiraa taa ê mai te omuaraa mai o te hoê buka. …

« Noa’tu te huru haamataraa ta te hoê taata e rave no te tai‘oraa i te mau papa‘iraa mo‘a, te taviri no te tatara i te ite faufaa rahi o te tamau-noa-raa ïa i te tai‘o. E ore roa vau e rohirohi i te imi e ia ite i te mau tao‘a rahi no te parau mau i roto i te mau papa‘iraa mo‘a no te mea te haapii nei te reira « i te parau papû, oia mau, i te parau papû roa (2 Nephi 32:7). Te faaite nei te mau papa‘iraa mo‘a i te Mesia (a hi‘o Ioane 5:39). Te faaite nei te reira ia tatou i te mau mea e ti‘a ia tatou ia haapa‘o (a hi‘o 2 Nephi 32:3). E ‘haapaari te reira ia [tatou] e tae noa’tu i te ora’ (2 Timoteo 3:15).

« Na roto i ta‘u tai‘oraa i te mau papa‘iraa mo‘a e te mau pure e apee nei i ta‘u nei tai‘oraa, ua noaa ia‘u te ite o te afa‘i mai i te hau ia‘u nei e o te tauturu ia‘u ia faahaere noa i to‘u nei puai i ni‘a i te mau mea faufaa mure ore. No te mea ho‘i e ua haamata vau i te tai‘o i te mau papa‘iraa mo‘a i te mau mahana atoa, ua haapii mai au no ni‘a i to‘u Metua i te Ao ra, Ta’na Tamaiti o Iesu Mesia, e te mea e ti‘a ia‘u ia rave ia riro mai ia raua ra te huru (« Te oaoa nei to‘u aau i te mau papa‘iraa mo‘a », Liahona e Ensign, Me 2004, 108–9).

Peresideni Thomas S. Monson : « Te faa‘una‘una nei te mau papa‘iraa mo‘a i ta tatou mau vairaa buka. A haapapû e te horo‘a nei ratou i te maa no to tatou mau feruriraa e te arata‘iraa no to tatou mau oraraa » (« The Mighty Strength of the Relief Society », Ensign, Novema 1997, 95).

Faahoho‘araa na Craig Dimond ; i muri mai na Shannon Gygi Christensen