Te reo o te Tiai Mamoe Maitai
Ei vahine faaamu animala i te rahiraa o to‘u mau 70 matahiti, te faariro nei au ei tao‘a rahi te parabole no te tia‘i mamoe maitai, tei iteha i roto i te Ioane 10:1–18 no te mea ua ora vau i te reira huru oraraa. E puai taa ê to teie mau mea tei tupu i muri nei no te haafaufaaraa i teie nei parabole i roto i te oraraa.
I roto i te tau no te bibilia e pii te tia‘i mamoe tata‘itahi ma to’na reo i ta’na iho nănă mai roto mai i te mau nănă e rave rahi tei amui mai i roto i te hoê haaputuputuraa i te taime pô(a hi‘o te mau irava 3–4). Mea na reira atoa ia faaatea ana‘e au i ta‘u mau mamoe, e pii noa vau, e e pee mai ratou.
E rave rahi mau matahiti i ma‘iri a‘e nei, ua roohia to‘u nei hoa itoito e te peepee o Alice e 96 matahiti to’na, o te faaamu atoa nei i te mamoe, i te ma‘i i te taime haafanauraa o te mau mamoe, no reira ua haere atu vau e rave i ta’na haafanauraa i te pô. I to‘u tomoraa’tu i roto i te « vahi haafanauraa » i te pô matamua, te taotooto hau noa ra e 100 ufa mamoe paari a Alice. I to‘u râ fâraa’tu, ua ite oioi roa ratou e te vai nei te hoê taata ê i rotopu ia ratou. No to ratou mata‘u rahi, ua imi vitiviti ratou i te vahi paruruhia ma te horo amui i roto i te hoê poro atea (a hi‘o irava 5).
Ua tamau noa teie ohipa e rave rahi mau arui. Noa’tu eaha te huru o to‘u tomo-hau-noa-raa’tu, ua ri‘ari‘a te mau mamoe e ua horo ratou. Ua paraparau maru noa vau i te mau arenio fanau apihia e i te mau ufa a atuatu ai au ia ratou. I te pae o te arui aita ratou e horo faahou ia haa vau i rotopu ia ratou. Ua ite ratou i to‘u nei reo e ua ti‘aturi ratou ia‘u.
I te tahi taime i muri mai ua parau atu vau ia Alice e e faaamu vau i ta’na tatini arenio otare i ta ratou mau mohina û. (Te hoê arenio otare o te hoê ïa arenio e ua pohe to’na metua vahine aore râ eita e noaa ia’na i te horo‘a i te û). Ua pee au i te raveraa a Alice ma te pii i ta’na mau arenio, « A haere mai, Baba ! Haere mai, Baba ! » Ua tia‘i au i te mau arenio ia horo poia noa mai i ni‘a ia‘u mai ta ratou i na reira ia Alice. Aita roa’tu hoê a‘e arenio i hi‘o noa mai a‘e. Ua haere atu ra o Alice i rapae au i te uputa no ta’na fare tutu e ua pii. No to ratou faarooraa i to’na ra reo, ua horo vitiviti noa ratou ia’na ra, ma te titau i ta ratou û na roto i te mani‘ani‘a.
No to maua maere, ua rave maua o Alice i te hoê tamataraa. Ma te ti‘a noa i roto i ta‘u nei aua mamoe, ua pii Alice na roto i te faaohiparaa i ta‘u ta‘iraa reo : « I ŏ nei, arenio, arenio, I ŏ nei, arenio, arenio! » e aita roa’tu e pahonoraa. I to‘u râ piiraa na roto i taua iho mau parau ra, ua haati vitiviti mai ta‘u mau mamoe ia‘u. Noa’tu e e hoê â parau ta maua i faaohipa no te pii i te mau mamoe, aita roa to maua mau reo matau-ore-hia i faaroohia. Ua faaroo noa te mau mamoe i to ratou iho tia‘i mamoe mau (a hi‘o irava 4).
Ua faataa maite o Ioane 10i te hoê tia‘i mamoei te hoê tia‘i mamoe tarahuhia. Te hoê tia‘i mamoe e na’na iho te mau mamoe, e haape‘ape‘a oia ma te here ia paruruhia ratou. Te hoê râ tia‘i mamoe tarahuhia o te hoê noa ïa « taata tarahuhia » e « o te ore e haapa‘o » (irava 13). Te haapii atoa nei te parabole e a horo ê ai e a faarue ai te taata tarahuhia i ta’na mamoe (a hi‘o irava 12), e ineine ïa te tia‘i mamoe i te horo‘a i to’na iho ora no ta’na mamoe (irava 11). E mea mau roa te reira i to tatou Tia‘i Mamoe Maitai – to tatou Faaora, Iesu Mesia – tei horo‘a ma te here i To’na iho ora no tatou (a hi‘o te mau irava. 15, 17–18)
Ua haapapû mai teie nei mau ohipa tei tupu ia‘u i te hoê o te mau parau poro‘i faufaa rahi roa no te parabole : te tutavaraa ia ite tata‘itahi tatou i to tatou Tia‘i Mamoe Maitai e na te ite vitivitiraa i To’na ra reo e paruru ia tatou ia pee hape noa i te taata tarahuhia. Na roto i te haapa‘oraa i te reo o to tatou Tia‘i Mamoe Maita i – eiaha ra to te tahi atu taata – e araita‘ihia ïa tatou i te parururaa mure ore.
O te Fatu To‘u Tia‘i Mamoe, na Simon Dewey, courtesy of Altus Fine Art, American Fork, Utah