Usa ka Gasa nga Angay sa Dugang Pag-amping
Uban sa tanang mga panalangin nga gihatag sa atong modernong panahon ngari kanato, dili nato hunungon ang mga butang nga nagpasiugda og mga buhat sa Espiritu Santo.
Mga labaw na sa 50 ka tuig ang milabay, apan klaro kaayo nakong mahinumdoman ang buntag sa Pasko sa 1959. Uban sa binata nga pagpaabut, ako naghandum gayud og usa ka bag-ong bisekleta. Ang akong magulang nga mga lalaki ug babaye ug ako nagpulihanay og gamit sa sama nga bisikleta, usa ka karaan nga 24 ka pulgada (61 cm) nga kada usa namo naggamit aron sa pagkat-on sa pagmaneho. Dugay na kining wala sa uso, ug ako mihangyo sa akong mga ginikanan og usa ka bag-o nga bisikleta. Naghinumdom, medyo maulaw ko nga wala kaayo magtagad sa presyo sa ingon nga regalo alang sa usa ka pamilya nga may limitado nga kinitaan.
Miabut ang buntag sa Pasko, ug gilayat nako ang mga ang-ang sa hagdanan gikan sa among lawak-katulgan sa basement. Nagdagan-dagan ngadto sa sala, nakawang ang akong pagpangita alang sa usa ka bisekleta. Nasubo ko sa dihang akong nabantayan ang usa ka gamay nga regalo ubos sa akong medyas, ug naningkamot ko sa pagkontrol sa akong kahigawad.
Samtang naglingkod kami isip usa ka pamilya sa sala, ang akong papa misugo kanako sa pagkuha og kutsilyo diha sa tapad nga kusina aron among maablihan ang karton nga adunay regalo alang sa akong igsoon nga lalaki. Misulod ko sa gamay nga kusina ug mikapkap sa switch sa suga aron makakita sa akong agianan. Sa pagsiga sa suga mibalik ang akong kadasig. Sa akong atubangan nagbarog ang usa ka nindot nga itom nga 26 ka pulgada (66 cm) nga bisikleta! Sulod sa daghang mga tuig misakay ko niadto nga bisekleta, miamping niini, mibantay niini, ug mipangga niini—usa ka gasa nga dugay nang gihangup ug gimahal.
Usa ka Mas Labaw nga Gasa
Mga tulo ka bulan sa wala pa kadto nga Pasko, nahatagan ako og laing gasa nga labaw ka importante ug mahinungdanon kaysa usa ka bisikleta. Nabunyagan ko ug nahatagan sa gasa sa Espiritu Santo. Niadtong nanglabay nga mga tuig ug tingali daghan pang mga tuig sukad niadto, sama ako sa mga Lamanite nga gihulagway sa Manluluwas nga “gibunyagan uban sa kalayo ug uban sa Espiritu Santo, ug sila wala masayud niini” (3 Nephi 9:20).
Si Jesus mihatag og gibug-aton sa dili mabanabana nga bili sa bunyag ug sa gasa sa Espiritu Santo. “Sa pagkatinuod, sa pagkatinuod, magaingon ako kanimo, gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5). Ug sa pagpagaan sa kalisud sa Iyang pagpahibalo ngadto sa Iyang mga disipulo nga Siya mobiya kanila sa dili madugay, ang Manluluwas misaad kanila niining langitnong gasa: “Siya akong ipadala [ang Manlalaban] kaninyo” (Juan 16:7).
Kini usa ka gasa nga dako kaayo og gahum. Gikan sa mga kasulatan kita makakat-on unsa ang madala niining gasa niadtong kinsa andam sa pagdawat niini: “Ang Espiritu Santo … nagpamatuod sa Amahan ug sa Anak” (D&P 20:27; tan-awa usab ang 1 Mga Taga-Corinto 12:3; 3 Nephi 28:11; D&P 42:17). Ang Espiritu Santo nagtudlo kanato sa tanang mga butang ug magpahinumdom kanato sa tanang mga butang (tan-awa sa Juan 14:26). Siya ang mogiya kanato sa kamatuoran ug mopakita kanato sa umaabot nga mga butang (tan-awa sa Juan 16:13). Siya molamdag sa atong mga hunahuna ug mopuno sa atong kalag uban sa hingpit nga kalipay (tan-awa sa D&P 11:13). Pinaagi sa Iyang gahum kita masayud sa kamatuoran sa tanang butang (tan-awa sa Moroni 10:5). Siya mopadayag sa mga misteryo sa Dios ngari kanato (tan-awa sa 1 Nephi 10:19).
Siya mopakita kanato unsa ang angay nga buhaton (tan-awa sa 1 Nephi 4:6; D&P 8:2). Siya modasig niadtong atong gitudloan (tan-awa sa 2 Nephi 33:1). Mas importante, ang kapasayloan sa mga sala moabut pinaagi sa Pag-ula “pinaagi sa bunyag, ug pinaagi sa kalayo, oo, gani sa Espiritu Santo” (D&P 19:31; tan-awa usab sa 2 Nephi 31:17), nagtugot kanato nga malimpyohan pinaagi niining gasa ug mobarug nga walay lama diha sa atubangan ni Kristo sa katapusang adlaw (tan-awa sa 3 Nephi 27:20).
Kining gasa sa makanunayong panag-uban sa Espiritu Santo anaa lamang niadtong kinsa nabunyagan ug nakumpirmahan nga mga miyembro sa Ang Simbahan ni Jesukristo sa mga Santos sa Ulahing mga Adlaw.1 Ang Espritu Santo makaimpluwensiya panagsa sa tanang nagpangita sa kamatuoran, apan ang gasa sa Espiritu Santo gitagana sa kahingpitan niini niadtong kinsa midala sa ilang mga kaugalingon sa mga pakigsaad sa gipahiuli nga ebanghelyo.2 Kini nga gasa tinuod. Kini usa ka langitnong panalangin ngadto sa mga miyembro sa Simbahan.
Ang Espiritu Santo dili usa ka gasa nga gitagana lamang sa pipila—sa patriarch, sa mahalarong visiting teacher, sa madasigong higala—apan kini gisaad alang kanatong tanan kon kita makugihong mangita sa atong dalan pabalik ngadto sa atong langitnong panimalay. Si Presidente Wilford Woodruff (1807–98) mihatag og gibug-aton sa panginahanglan sa matag Santos alang sa Espiritu Santo: “Kita molihok sa pagbaton sa Espiritu Santo. … Kini mao ang Espiritu nga kinahanglang anaa kanato sa pagdala sa mga katuyoan sa Dios dinhi sa yuta. Nagkinahanglan kita niana og labaw pa kaysa bisan unsa nga gasa. … Kinahanglan kitang mag-ampo sa Ginoo hangtud kita makabaton sa Maghuhupay. Kini mao ang gisaad ngari kanato kon kita mabunyagan. Kini mao ang espiritu sa kahayag, sa kamatuoran, ug sa pagpadayag, ug maanaa kanatong tanan sa sama nga higayon.”3
Ang Panginahanglan sa Personal nga Inspirasyon
Kita nagpuyo sa panahon nga ang transportasyon, komunikasyon, ug paggamit sa impormasyon nga hilabihan ka moderno ikompara sa nangagi. Apan ang moral nga mga isyu sama sa pagkamatinuoron, pagkaputli, pagsunod sa Igpapahulay, responsibilidad sa pamilya, ug gani sa pagkabalaan sa kinabuhi—mga isyu nga dugay nang parehong gihuptan sa kalibutan ug sa mga Santos sa Ulahing mga Adlaw—karon makita nga gihubad sa bisan unsang paagi ug bukas ngadto sa paglantugi (tan-awa sa D&P 1:16).
Samtang ang mga kalamboan sa teknolohiya ug komunikasyon kanunayng moduot sa modernong kalibutan ngari kanato, ang pagpuyo sa kalibutan apan dili kalibutanon nagkinahanglan nga kita mohimo og makanunayon nga mga pagpili ug mga desisyon (tan-awa sa Juan 17:14). Ang espirituhanong pag-ila importante kaayo. Isip mga disipulo ni Kristo, kinahanglan natong himoong kabahin kada adlaw ang gasa sa Espiritu Santo sa atong mga kinabuhi. Si Presidente Boyd K. Packer, Presidente sa Korum sa Napulog Duha ka mga Apostoles, miingon, “Walay usa kanato ang maluwas sa kalibutan karon, mas mosamot pa kon unsa kini sa umaabut, kon walay personal nga inspirasyon.”4
Unsaon nato sa paggamit niining langitnong gasa isip usa ka importante nga kompas sa atong matag adlaw nga mga buhat? Kita kinahanglan nga motuo nga bisan sa atong mga kahuyang, ang ligdong, hinay nga tingog nga atong mabati naggikan sa atong Amahan. Kita kinahanglang mag-ampo ug mangayo ug mangita ug dayon dili mahadlok kon ang mga tubag moabut sa atong kasingkasing ug hunahuna. Tuohi nga kini balaan. Kini tinuod.
Niadtong Pebrero 1847 ang Propeta nga si Joseph Smith nagpakita ngadto ni Brigham Young pinaagi sa usa ka damgo o sa panan-awon. Si Presidente Young nangutana sa Propeta kon siya aduna bay mensahe alang sa mga Santos. Ang Propeta miingon: “Sultihi ang mga tawo nga magpaubos ug magmatinud-anon ug magsiguro sa pagbaton sa Espiritu sa Ginoo ug kini mogiya kanila sa matarung. Pag-amping ug dili mobaliwala sa hinay ligdong nga tingog; motudlo kini kaninyo [unsay inyong] buhaton ug asa paingon; makahatag kini sa mga bunga sa gingharian. Sultihi ang mga kaigsoonan sa pag-abli sa ilang mga kasingkasing sa pagtuo aron nga kon ang Espiritu Santo moabut nganha kanila, ang ilang mga kasingkasing maandam sa pagdawat niini.”5
Ang pagtuo nga ang pagpadayag moabut kaninyo ingon man usab sa uban moabli sa inyong kasingkasing sa pagtuo.
Mga Buhat sa Espiritu Santo
Ang mga ehemplo kon sa unsang paagi ang Espiritu Santo molihok matag adlaw diha sa mga kinabuhi sa mga miyembro sa Simbahan daghan ug makadasig. Kadaghanan hilum ug personal, makita lamang nga mahinuklugon kon atong lantawon ang mga kausaban nga nahimo niini. Paghunahuna og inyong kaugalingong mga kasinatian samtang kamo mobasa og panig-ingnan sa mga kasinatian nga gipakigbahin ngari kanako.
-
Usa ka babaye kanunay nga naghunahuna kabahin sa pipila ka mga kapilian nga trabaho nga mahimo niyang buhaton samtang ang iyang mga anak mobalik sa pag-eskwela. Samtang naglingkod siya sa sakrament miting, ang presidente sa stake mibarug aron sa pagpamatuod: Siya mibasa og usa ka kasulatan: “Ayaw pangitaa ang mga katigayunan ni ang mga kawang nga mga butang niini nga kalibutan; kay tan-awa, ikaw dili makadala kanila uban kanimo” (Alma 39:14). Ang bersikulo mituhop pag-ayo sa iyang kasingkasing nianang adlaw sa Igpapahulay isip usa ka espiritwal nga kumpirmasyon sa mga butang nga kinahanglan niyang tinguhaon sa moabut nga tuig.
-
Usa ka otso anyos nga bata nabunyagan ug dayon nakumpirmahan isip usa ka miyembro sa Simbahan, nakadawat sa gasa sa Espiritu Santo sa mga kamot sa iyang amahan ug apohan. Samtang ang batang lalaki malipayong mibarug aron sa pagpakigbahin sa iyang pagpamatuod, wala niya damhang mibati og ingon nga emosyon nga siya naglisud sa pagpamulong. Usa ka brother naghinumdom niana nga kasinatian miingon, “Mibati ko sa mga pagbati sa Espriritu nga hilabihan ka kusog nianang higayona.”
-
Usa ka misyonaryo ug ang iyang kompanyon mituktok sa pultahan sa usa ka investigator nga ilaha nang nahatagan og Basahon ni Mormon. Sa pag-abli sa pultahan sa tigulang nga babaye, ang misyonaryo mibati og hilabihan ka kusog sa pagbati nga misanap kaniya. Ang babaye miabi-abi sa mga misyonaryo ug mipasabut nga siya nakabasa ug nagtuo unsa ang ilang gitudlo kaniya. Ang batan-ong misyonaryo natandog pa-ayo sa iyang gibati nga siya nag-ampo, “Pinanggang Amahan, palihug ayaw itugot nga ako malimot sa pagbati nga akong gibati karon.”
-
Usa ka batan-ong estudyante sa kolehiyo nga nahilayo sa panimalay misugod sa pagbati og tumang kamingaw. Siya nangamuyo sa iyang mga pag-ampo nga siya unta makadawat og tabang sa iyang kalisud. Usa ka buntag diha sa klase, siya mibati og talagsaong pagbati sa kahupay. Miabut sa iyang hunahuna: “Wala gayud ikaw mag-inusara.” Ang iyang mga pag-ampo natubag, ug ang iyang pagbati sa pagkamingaw nawala.
-
Usa ka matinud-anong amahan nagpadulong sa pagtabang sa usa ka anak nga lalaki kinsa nakahimo og sayop nga mga pagpili nga karon moantus sa mga sangputanan sa iyang mga pagpili. Diha sa taas nga hilum nga mga oras sa pagpapangita sa iyang anak nga lalaki, ang amahan nag-ampo samtang siya naa sa tumang kaguol sa mga sayop sa iyang anak nga lalaki. Dayon misantup sa hunahuna niini nga amahan nga klaro ug tino nga: “Siya usab Akong anak nga lalaki.”
-
Usa ka 16 anyos nga Laurel milingkod sa klase sa Sunday School naminaw sa usa ka magtutudlo. Panahon kadto sa pasko sa Pagkabanhaw, ug ang magtutudlo nakaandam og leksyon kabahin sa Pag-ula. Nag-istorya kabahin sa pag-antus nga gilahutay sa Manluluwas, siya naghisgut kon unsa ang gipasabut sa pagpaagas sa dugo sa matag lungag sa panit, pagalatigohon, ug pag-antus diha sa krus. Ang batan-ong babaye wala pa gayud nakahunahuna sa Pag-ula sa ingon ka detalye. Adunay misulod sa iyang hunahuna ang usa ka imahe. Sobra sa 25 ka tuig ang milabay, siya namulong sa emosyonal nga paagi kabahin sa kasinatian: “Nianang adlawa ang Espiritu Santo mipamatuod ngari kanako nga si Jesus mao ang Kristo.”
Ang Kaimportante sa Pagkamasulundon
Kita nagpuyo sa usa ka panahon diin ang labing makadaut nga mga elemento sa yawa nagpalibut kanato. Ang teknolohiya sa komunikasyon, diin makadala og daghang talagsaong mga butang sa atong mga kinabuhi, moatake usab sa atong mga komunidad—ug gani sa atong mga panimalay kon kita dili magmabinantayon—uban niana kita dili na diha-diha mobati sa mga gasa sa Espiritu Santo. Kita kinahanglang magmabinantayon sa mga butang nga atong gitugotan nga makaimpluwensiya sa atong espiritu.
Kon kamo gusto nga mas makaklaro sa pagsabut ug pagtuo sa ligdong, hinay nga tingog, wala nay laing mas maayo nga medisina kaysa pagkamasulundon. Si Jesus miingon ngadto sa Iyang mga disipulo, “Kon adunay buot mosunod kanako, kinahanglan magdumili sa iyang kaugalingon, ug magpas-an sa iyang krus, ug magsunod kanako” (Mateo 16:24).
Si Presidente James E. Faust (1920–2007), ang Ikaduhang Magtatambag sa Unang Kapangulohan, misugyot og yano nga solusyon alang sa pagpili og saktong tingog nga sundon: “Paminaw ug sunod sa tingog sa Espiritu. Mao kini ang karaang solusyon, gani mahangturon, ug tingali dili inila sa katilingban nga kanunayng nagpangita og butang nga bag-o. Nagkinahanglan kini og pailub diha sa kalibutan nga gusto og dihadiha dayon nga katagbawan. Kini nga solusyon hilum, malinawon, ug pino diha sa kalibutan nga ganahan nianang banha, walay hunong, paspas, bastos, ug binagis. Kini nga solusyon nagkinahanglan nga kamo mapalandungon. … Kini nga solusyon nagkinahanglan nga kita maglakaw pinaagi sa pagtuo sa usa ka kalibutan nga gidumala sa unsay makita.”6
Hilum nga Panahon sa Pagpamalandong
Nakahunahuna ako og mga higayon kon unsa kalahi ang kinabuhi sa akong mga anak kaysa sa akong kaugalingong pagtubo diha sa usa ka gamayng umahan sa pamilya sa habagatang Idaho niadtong mga 1950 ug mga 1960. Dugay nga mga adlaw sa pagtukod og koral uban sa akong amahan, hilum nga mga oras sa pagbalhin og tubo sa irigasyon ngadto sa mga umahan sa patatas, usa ka panimalay nga may usa ka telebisyon nga makadawat lamang og tulo ka channel, walay computer, walay mga MP3, walay cellphone, mga pipila ka biyahe unahan sa silingang mga lungsod, mga pipila ka mga kasamok, ug daghang panahon uban sa pamilya—kini mao ang mga pundasyon sa pagtukod [building blocks] sa daghan nakong henerasyon.
Sa kalibutan karon kita kinahanglang adunay hilum, mapalandungon nga mga panahon uban sa atong mga anak ug sa pagtudlo kanila unsaon sa pagpaminaw ngadto sa ligdong, hinay nga tingog. Uban sa tanang mga panalangin nga gihatag sa atong modernong panahon ngari kanato, dili nato hunongon ang mga butang nga nagpasiugda og mga buhat sa Espiritu Santo: panahon nga mag-inusara sa pag-ampo, mamalandong, ug mobasa sa mga kasulatan; ug panahon uban sa pamilya nga dili madisturbo sa saba, mga kasamok, ug daghan kaayong mga kalihokan.
Pagtubag ngadto sa mga Pag-aghat
Pinaagi sa pagsunod sa mga pagbati nga moabut ngari kanato, kita nagkat-on sa pagsalig nga kini gikan sa atong Amahan. Kita “nagtubo” (D&P 109:15) sa pagkat-on sa pag-ila niini nga tingog.
Si Presidente Thomas S. Monson mitambag kanato nga dili maglangay-langay sa usa ka pag-aghat. “Kita magbantay. Kita magpaabut. Kita maminaw nianang ligdong, hinay nga tingog,” siya miingon sa kinatibuk-ang komperensya. “Kon kini mosulti, ang maalamong mga tawo mosunod. Kita dili maglangay-langay sa pagsunod sa mga pag-aghat sa Espiritu.”
Si Presidente Monson dayon mipakigbahin og kasinatian kabahin sa usa ka higala nga ginganlan og Stan, kansang sakit nakapahimo sa katunga sa iyang lawas nga paralisado. Bisan pa sa labing maayo nga pag-atiman sa medikal ug mga pag-ampo sa pamilya ug mga higala, si Stan nagpabiling naglubog sa higdaanan ug nagkasugod sa pagkadesperado.
“Usa ka hapon ako naglangoy sa Deseret Gym, naglantaw sa kisame samtang nag-backstroke balik-balik sa isigka kilid,” mihinundom si Presidente Monson. “Sa hilum nga paagi, ug klaro gayud kaayo, ako nakahunahuna: ‘Dinhi ikaw naglangoy-langoy nga hayahay, samtang ang imong higala nga si Stan nagluya sa iyang higdaanan sa ospital, dili makalihok.’ Akong nabati ang pag-aghat: ‘Adto sa ospital ug hatagi siya og panalangin.’
“Mihunong ako sa paglangoy, nag-ilis, ug nagdali-dali sa pag-adto sa lawak ni Stan sa ospital. Ang iyang higdaanan walay tawo. Usa ka nurse ang miingon nga siya anaa sa iyang wheelchair sa swimming pool, nag-andam alang sa therapy. Nagdali-dali ako ngadto sa dapit, ug didto si Stan, nag-inusara, sa kilid sa lawom nga bahin sa pool. Mitimbaya kami sa usag-usa ug mibalik sa iyang lawak, diin gihatag ang usa ka panalangin sa priesthood.”
Sa katapusan si Stan nakabaton og balik sa kusog ug makalihok sa iyang mga paa ug nakakat-on pag-usab sa paglakaw. Si Presidente Monson mipadayon: “Alang sa uban [si Stan] nagpakita sa bati kaayo nga paghunahuna gumikan sa depresyon nga miputos kaniya nianang hapona samtang siya milingkod sa iyang wheelchair sa kilid sa pool, gisilutan, mora og, ngadto sa usa ka kinabuhi sa pagkadesperado. Siya naghisgut kon giunsa niya pagpamalandong ang kapilian. Sayon kaayo nga magpahulog sa gikalagutang wheelchair ngadto sa malinawong tubig sa lawom nga pool. Ang kinabuhi dayon matapos. Apan nianang tukmang higayon nakit-an ko niya, iyang higala. Nianang adlawa si Stan mikat-on sa literal nga paagi nga kita wala mag-inusarang maglakaw. Ako, usab, mikat-on og usa ka leksyon nianang adlawa: Ayaw, ayaw, ayaw langaya ang pagsunod sa usa ka pag-aghat.”7
Ang Ginoo, naghisgut kabahin sa Iyang Ikaduhang Pag-anhi, mihatag og gibug-aton nga ang gasa sa Espiritu Santo kinahanglang gamhanang aktibo diha sa Iyang mga Santos: “Kay sila mga maalamon ug nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw” (D&P 45:57).
Kita nagpuyo og usa ka talagsaong panahon sa oportunidad, pagkat-on, ug paglambo. Apan uban niining mga katingalahan moabut usab ang makapakunhod nga pagpangilad sa kaaway, naningkamot pag-ayo sa pagsulod sa matag parte sa atong kinabuhi, gani nagsulay sa pagkut-kot og lungag sa luwas nga kapanalipdan sa atong mga panimalay. Kon atong dawaton ang Espiritu Santo isip atong giya ug magmaalamon sa pagkahibalo, pagbantay, ug pagtukod niining gasa, dili kita mailad. Ug samtang ang kadautan nagtubo dinhi sa kalibutan, adunay paigong gahum sa gasa sa Espiritu Santo alang sa matarung.
Ug samtang kita maghatag og mas dakong pag-atiman niining balaanong gasa, kita “makauban niana nga adlaw” ug makapuyo pag-usab uban sa atong Langitnong Amahan.
Ang Gasa, ni Walter Rane, dili mahimong pakopyahan
Painting pinaagi ni Walter Rane
Tudloi Sila sa Pagsabut, ni Walter Rane, sa maayong kabubut-on sa Church History Museum