Ang Mormon.org nga Gidesinyo og Usab Nagkonektar sa mga Miyembro ug sa mga Investigator

Sukad sa pagsugod niini niadtong 2001, ang Mormon.org nakatabang sa mga tawo nga makakuha og diretso, matinuoron nga mga tubag sa ilang mga pangutana mahitungod sa Simbahan. Kadto nga mga tubag nagagikan gayud mismo sa headquarters sa Simbahan.

Ang Mormon.org nga labing bag-o—lakip ang kompletong pagdesinyo og usab—naghatag pa gihapon og daghang mga tubag ug paagi sa pagkontak sa mga misyonaryo. Apan karon, salamat sa bag-ong online profile feature, daghang mga tubag ang nagagikan sa mga miyembro sa Simbahan sa tibuok kalibutan.

Ang mga mobisita sa bag-o nga site—nga makit-an og sugod sa daghang pinulongan gawas sa Iningles inig tunga-tunga sa 2011—makapangita sa mga profile sa liboan ka mga miyembro sumala sa sekso, edad, etniko, kaagi sa relihiyon [religious background], ug uban pa nga mga paagi sa pagpangita sa mga miyembro sa Simbahan nga susama kanila. Sa higayon nga anaa na sa pahina sa profile, ang mga tiggamit makabasa sa mga pagpamatuod, makapangutana og dugang mga pangutana, ug sa laing paagi, makakonektar sa mga miyembro sa Simbahan diha sa mga social networking Web site. Kini nga kontak sa magkapareho og edad nagtugot sa mga investigator nga makakuha og pamahayag nga nagagikan sa dili opisyal sa Simbahan.

“Kon ang mga tawo mosiksik sa Internet alang sa impormasyon, mas hatagan nila og gibug-aton ang mga opinyon sa ilang ka-edad kay sa unsay isulti sa organisasyon mahitungod niini, ilabi na kon mahitungod sa organisado nga relihiyon,” miingon si Elder Richard G. Hinckley, Executive Director sa Missionary Department. “Mao kana nganong ang mga profile sa mga miyembro ingon niana ka mahinungdanon nga bahin sa bag-ong Mormon.org.”

Ang bag-ong Mormon.org gibahin sa upat ka dagkong mga area, matag usa nag-focus sa pagtudlo mahitungod sa piho nga aspeto sa Simbahan: Atong Katawhan, Atong mga Mithi, Atong Pagtuo, ug Kanunayng Gipangutana nga mga Pangutana.

Atong Katawhan

Kini nga seksyon naglangkob sa mga profile sa miyembro, nagtugot sa mga investigator nga mas masayud pa mahitungod sa ebanghelyo pinaagi sa “pakighimamat” niadtong kinsa nakabaton og mga pagpamatuod sa gipahiuli nga ebanghelyo.

“Ang usa ka butang nga makatabang sa mga tawo nga makorhian ang mga sayop nga pagtuo mahitungod sa Simbahan mahitabo kon sila adunay oportunidad nga makaila og usa ka Mormon,” miingon si Ron Wilson, ang manager sa Internet ug marketing sa Missionary Department. “Sila makaamgo nga ang negatibo nga mga butang nga tingali ilang nadunggan mahitungod sa Simbahan wala matakdo sa kinabuhi nga gipuy-an sa ilang Mormon nga mga higala.”

Atong mga Mithi

Ang seksyon sa Atong mga Mithi nagtudlo kon unsa ang gibuhat sa mga miyembro agig resulta sa ilang mga gituohan. Nagpasabut kini sa pipila ka mga prayoridad sa Simbahan, lakip ang humanitarian aid, mga pamilya, edukasyon, serbisyo, ug family history. Kini nga seksyon makatabang sa mga investigator sa pagkonektar sa doktrina sa Simbahan ngadto sa pamaagi sa pagpakabuhi sa mga miyembro.

Atong Pagtuo

Ang seksyon sa Atong Pagtuo nagpasabut sa sukaranang mga doktrina sa Simbahan. Ang tanan niini nga seksyon sa site makatubag sa pangutana, “Unsa man ang gituohan sa mga Mormon?” Kini nga seksyon makahatag usab sa kinatibuk-ang kahulugan alang sa uban nga bahin sa site. Ang mga mobisita sa site makakat-on mahitungod sa atong pagtuo kang Jesukristo isip atong Manluluwas, sa Pagpahiuli sa ebanghelyo, ni Joseph Smith, sa plano sa kaluwasan, sa Basahon ni Mormon, ug uban pa nga mga hilisgutan.

Kanunayng Gipangutana nga mga Pangutana

Ang mga miyembro sa Simbahan ang nagmugna sa sulod niini nga seksyon pinaagi sa pagtubag sa mga pangutana diha sa ilang personal nga mga profile. Ilang tubagon ang mga KGP [Kanunayng Gipangutana nga mga Pangutana] sa ilang kaugalingong mga pulong, nagtabang sa mga mobisita nga masayud mahitungod sa Simbahan gikan sa mga miyembro niini.

Ang gidesinyo pag-usab nga Mormon.org makita og sugod sa dugang nga mga pinulongan inig tunga-tunga sa 2011.