Gidepensahan nako si Propeta nga si Joseph

Maria Brando, Italy

Niadtong 1978 aduna akoy halandumon nga damgo diin duha ka tawo ang nagpakita kanako. Samtang ako nakigsulti kanila niini nga damgo, ako mibati og usa ka talagsaon nga pagbati sa hingpit nga kalipay. Ang malipayong pagbati nagpadayon bisan human sa akong pagbangon pagkasunod buntag.

Niana gyud nga adlaw duha ka mga misyonaryo sa Santos sa Ulahing mga Adlaw nanuktok sa among pultahan ug nanghangyo kon mahimong bang mopakigbahin sila og mensahe. Naghinumdom sa akong damgo, ako misugot ug midapit kanila sa pagsulod. Ang akong bana dili gusto, apan siya misugot sa dihang ako siyang giingnan nga dili ko makahimo sa pagpahawa kanila nga dili makig-istorya kanila.

Gawas sa ubang mga butang, ang mga misyonaryo mitudlo kanako kabahin sa mga propeta niana nga adlaw. Pamilyar ko sa mga propeta sa Biblia, sama nila ni Abraham ug Moises, ug ang mga misyonaryo mitudlo usab kanako kabahin sa usa ka modernong propeta, si Joseph Smith. Sa katapusan sa among leksyon, ang mga elder nangutana kon sila makabalik ba alang sa dugang nga mga diskusyon. Miingon ko og oo.

Human sa dugang nga mga diskusyon ang mga misyonaryo midapit kanako sa pagpabunyag. Ganahan ko unsa ang akong nakat-unan, apan sa dili pa mabunyagan, gusto ko nga makabaton og pagpamatuod ni Joseph Smith. Sa tanang mga butang nga gitudlo kanako sa mga misyonaryo, ang iyahang istorya mao ang labing lisud nga dawaton para kanako. Apan nasayud ako nga kon ako magmatinud-anon sa pagpangita og ingon nga pagpamatuod, ang Langitnong Amahan mokumpirma sa kamatuoran ngari kanako.

Nakigkita ako og usa ka sakop sa kaparian sa simbahan diin ako nagtubo. Miingon ako kaniya sa mga gipangtudlo kanako sa mga misyonaryo ug mipahayag og dakong tinguha sa pakigkita kanila og usab. Sa wala pa gani ako makasulti og bisan unsa nga butang, siya miingon kanako nga si Joseph Smith usa ka boang, nga siya usa ka tighimo-himo og panan-awon.

Sa kalit lang, ako nakadungog og usa ka tingog nga miingon kanako, “si Joseph Smith usa ka tinuod nga propeta.” Ang akong kasingkasing misugod sa pagpitik og kusog kaayo, ug bisan tuod wala pa ako mabunyagi sa Simbahan, akong nakita ang akong kaugalingon nga nagdepensa sa Propeta sa Pagpahiuli.

Ang pagbati sa kumpirmasyon gani mas mikusog samtang ako mibiya sa opisina sa pari. Nakadawat ako sa akong tubag ug nasayud asa nga simbahan nga kinahanglang padak-on ang akong anak nga mga lalaki.

Nabunyagan ako sa wala madugay, ug mibati ako og dakong tinguha sa pagpakigbahin unsa ang akong nakaplagan. Nakadawat ako og espiritwal nga kumpirmasyon kabahin sa Propeta nga si Joseph Smith, ug gusto usab ko nga ang uban makasinati sa hingpit nga kalipay nga anaa sa akong kinabuhi isip resulta. Ang akong bana nakasinati sa samang hingpit nga kalipay sa iyang kaugalingon sa dihang siya nagpamiyembro sa Simbahan duha ka tuig human kanako.

Mapasalamaton ako sa pagpuyo og panahon sa dihang kita usab adunay mga propeta sa yuta. Tungod sa ilang paggiya, ako adunay siguradong dalan nga akong sundon.