Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Usa ka Gasa nga Angay sa Dugang Pag-amping,” pahina 26: Si Elder Neil L. Andersen nagpakigbahin og pipila ka mga ehemplo kon sa unsang paagi nga ang Espiritu Santo naggiya sa mga tawo. Ikonsiderar ang pagbasa sa pipila niini ka mga ehemplo ug dayon paghangyo sa mga sakop sa pamilya sa pagpakigbahin og mga kasinatian sa dihang ilang nabati ang Espiritu Santo.

Alang sa mas gagmay nga mga anak, mahimo kamong mopakita og mga butang nga nagrepresentar sa mga panalangin sa Espiritu Santo. Pananglitan, ang Espiritu Santo sama sa usa ka habol tungod kay Siya mohupay kanato (tan-awa sa Juan 14:26), usa ka kompas tungod kay Siya mogiya kanato (tan-awa sa 2 Nephi 32:5), ug sabon tungod kay Siya makatabang kanato nga masayud nga kita malimpyohan pinaagi sa Pag-ula (tan-awa sa 2 Nephi 31:17; 3 Nephi 27:20).

“Mga Tradisyon sa Pasko sa Seventy,” pahina 32: Basaha ang pipila sa mga tradisyon nga gilista sa artikulo, dayon pangutan-a ang mga sakop sa pamilya kon unsa ang ilang paborito nga mga tradisyon sa Pasko. Aduna bay bag-o nga mga tradisyon nga gusto ninyong sundon?

“Usa ka Espesyal nga Bisita,” pahina 68: Sama sa pamilya diha sa istorya, mahimo ninyong handumon ang adlawng natawhan ni Propeta Joseph Smith pinaagi sa pagkat-on mahitungod sa Unang Panan-awon. Mahimo usab kamong mobasa gikan sa pakigpulong sa komperensya mahitungod ni Joseph Smith (tan-awa, pananglitan, Tad R. Callister, “Joseph Smith—Propeta sa Pagpahiuli,” Liahona ug Ensign, Nob. 2009, 35–37).

Pagdayeg sa Misyon sa Manluluwas

Usa sa among paborito nga mga family home evening nakatabang kanamo nga mas makadayeg sa kinabuhi ug misyon sa Manluluwas. Among gihangyo ang matag sakop sa pamilya sa pagpangita sa mga kasulatan mahitungod sa mga kamot, mga mata, mga tiil, o ba-ba sa Manluluwas. Dayon ang matag usa kanamo mipakigbahin niadto nga mga kasulatan. Pananglitan, ang mga kamot sa Manluluwas miayo sa sanglahon, ang Iyang mga tiil milakaw ibabaw sa tubig, ang Iyang mga mata mihilak didto sa lubnganan ni Lazaro. Gihisgutan usab namo ang mga samad sa lawas ni Jesus ug ang pagkahingpit sa Iyang sakripisyo. Ang among panaghisgut mahitungod sa kinabuhi ug mga buhat ni Jesukristo midapit sa Espiritu ug nagtugot sa matag sakop sa pamilya sa paghatag og pagpamatuod mahitungod sa atong Manluluwas.

David R. Anderson, Utah, USA