Giunsa Nako sa Pagkasayud
Sama sa Matam-is nga Gatas
Kon kamo modawat ug mogamit sa tinuod nga ebanghelyo sa Ginoo, makapatam-is kini sa inyong kinabuhi sama sa asukar nga mopatam-is sa gatas.
Nagtubo ako isip usa ka seryoso, responsable nga tawo kinsa misunod sa mga baruganan nga gitudlo kanako sa akong mga ginikanan, uban sa ilang limitado nga kahibalo sa relihiyon. Bisan pa niana, human sa kamatayon sa akong papa niadtong 2005, sa dihang 15 pa ang akong edad, nahimo akong usa ka tawo nga lahi. Tingali mao kadto ang paagi sa pagpadayag sa akong kasakit nga wala makapanamilit kaniya. Nagbasol gayud ako nga wala mohalok kaniya sa wala pa siya moadto sa ospital.
Human sa iyang kamatayon nagsugod ako sa pagkuyog sa mga tawo nga walay maayong mga hiyas. Nagbuhat ako sa mga butang nga sa akong hunahuna OK ra ug gibuhat sa tanan, apan karon ako nakasabut nga kadto wala ikahimuot sa Ginoo. Nalingaw ako, sumala sa mga sumbanan sa kalibutan mahitungod sa kalingawan, pero sa tinuod dili ako malipayon. Haw-ang ug adunay kulang, apan wala ako makahibalo kon unsa. Dili na kaayo maayo ang akong grado sa eskwelahan. Ang grabe nga bahin mao nga ako walay ideya unsaon sa pagpangita og kalipay sa akong kinabuhi. Nianang higayona wala ako makakita kon unsa ka dako ang nawala kanako uban sa akong pamilya ug sa akong mama, kinsa mao ang tawo nga akong gimahal pag-ayo.
Sa gabii mag-ampo ako sa Dios. Walay usa nga nagtudlo kanako kon unsaon sa pag-ampo, pero akong gibati nga Siya naminaw. Mihangyo ako Kaniya sa pagtabang kanako nga magmalipayon ug pahibaloon ko nga OK ra ang akong papa. Nahadlok kaayo ko nga nag-antus siya sa usa ka dapit. Ang akong pangamuyo milungtad og daghang mga gabii.
Ang tubag sa katapusan miabut. Sa akong hunahuna nga ako makadawat og tubag pinaagi sa usa ka damgo, pero miabut hinoon kini pinaagi sa duha ka mga elder. Miabut sila sa among balay sa Disyembre 2006. Wala ako makasabut nga sila mao ang tubag sa akong mga pag-ampo, ug ako dili gusto nga maminaw bisan sa usa sa ilang mga panaghisgutan. Ang akong mama naminaw ug nakahukom nga moadto sa simbahan. Wala na siya mohunong sa pag-adto sukad niadto. Nabunyagan siya, ug pipila ka mga semana ang milabay ang akong mga pag-umangkon ug ang akong igsoong babaye nabunyagan. Nakamatikod ako og dakong kausaban sa akong mama human sa iyang bunyag, hangtud nga ingon og mibata siya ug mas malipayon. Ang iyang kalipay ug kalinaw nga dili masukod mipuno sa among balay; sa panahon nga adunay mosulod mabati dayon niya ang kalainan.
Akong namatikdan unsay nahitabo ug nakahukom nga mosimba. Usa kadto ka katingalahan nga kasinatian; sukad wala gyud ako matagad nga mabination kaayo kaniadto. Ang mga sister mahigalaon ug mitagad nako pag-ayo nga gibati nako nga komportable didto sa simbahan. Sa hinay-hinay ako nakombinser nga ang Simbahan tinuod, ug nakahukom nga maminaw sa mga leksyon gikan sa mga elder.
Nabunyagan ako niadtong Pebrero 3, 2007, sa Uribe Ward, Veracruz Mexico Stake, sa duha ka talagsaong mga elder. Mahinumdom ako nila kanunay, ug giisip nako sila nga among mga anghel. Ang akong bunyag mao ang adlaw nga dili gayud nako makalimtan. Nalimpyohan ako gikan sa tanang mga sala. Ang akong mga kasaypanan napapas tungod sa Pag-ula ni Jesukristo. Akong gikalimtan ang akong depresyon, ug ang kahaw-ang nga akong gibati nawala na. Napulihan kini sa tumang kalipay sa akong kalag.
Ang tinuod nga ebanghelyo nakahatag sa akong pamilya ug kanako sa hilabihan nga kalipay. Nakakaplag ako og mahangturong mga higala. Nagpadayon ako sa pagpakigbatok sa kalibutan, apan karon ania na kanako ang tinuod nga ebanghelyo ug ang Espiritu nga nakahatag kanako og kalipay ug kalinaw kada adlaw. Karon nasayud ako sa tubag sa pangutana nga akong gipangutana sa Ginoo sa dugay nang panahon. Kon ang akong papa midawat sa mga ordinansa nga among gihimo alang kaniya didto sa templo, nasayud ako nga siya malipayon ug malinawon. Nagtuo ako nga siya midawat sa ebanghelyo ug naghulat kanamo.
Usahay mahinumdom ako ug nakaamgo nga pagkabulahan nako. Akong nakita nga adunay mas dako nga kalipay kay sa gitanyag sa kalibutan ug sa mga kahilayan ug mga kalingawan niini. Ang tinuod nga kalipay nagagikan sa ebanghelyo ni Jesukristo. Ang tanan nga gitudlo sa ebanghelyo alang sa atong kaayohan.
Sa makausa nakadawat ako og usa ka e-mail diin ang usa ka mama mipasabut ngadto sa iyang batan-ong anak nga lalaki nga ang Dios sama sa asukar nga imong idugang sa imong gatas. Dili ninyo kini makita, pero naghatag kini og katam-is sa tanan. Sa samang paagi, dili ninyo makita ang tinuod nga ebanghelyo sa Ginoo, apan kon kamo modawat ug mogamit niini, makapatam-is kini sa inyong kinabuhi sama sa asukar nga mopatam-is sa gatas.
Detalye gikan sa Christ at Emmaus, ni Carl Heinrich Bloch, gigamit pinaagi sa pagtugot sa National Historic Museum sa Frederiksborg sa HillerØd, Denmark; litrato sa gatas pinaagi ni Robert Casey