Sila Namulong Kanato
Ayaw Kalisang
Gikan ni Maria ug Jose atong makat-unan nga dili kita angay nga malisang; kay sa kada problema, adunay solusyon.
Si Maria ug si Jose nakakat-on og sayo sa ilang kinabuhi nga sa kada problema ang Dios adunay solusyon. Ngadto ni Maria, ang anghel miingon: “Ayaw kalisang. … Kay sa Dios walay butang nga dili mahimo” (Lucas 1:30, 37).
Usahay ang mga young adult mag-atubang og usa ka problema nga ingon og sama sa Bukid sa Everest. Nagtuo sila nga kini taas ra kaayo ug lisud kaayo nga tungason. Tungod kay wala sila makakita og solusyon, mawad-an sila og paglaum—gani tingali negatibo ug dili malaumon—mahitungod sa ilang mga kaugmaon. Apan, sama ni Maria ug Jose, makakat-on kamo nga bisan og dili masulbad ang mga problema sa kinabuhi, ang Dios sa kanunay adunay solusyon.
Sa dihang nakahibalo si Maria sa iyang balaan nga tawag nga manamkon sa Anak sa Dios, sa walay duha-duha daghang mga panghitabo ug mga kabalaka ang misulod sa iyang hunahuna. Human sa tanan, siya ipaasawa ngado ni Jose—unsay iyang mahunahuna? Ang anghel gikan sa langit mitambag, “Ayaw kalisang” (Lucas 1:30). Sa dihang nakahibalo si Jose sa pagmabdos ni Maria, siya walay makita nga maayong solusyon kay sa pagpakigbulag. Apan mitambag pag-usab ang anghel, “Ayaw kalisang” (Mateo 1:20). Mao gihapon kadto ang sama nga langitnong direksyon nga gihatag kaniadto ngadto ni Zacarias (tan-awa sa Lucas 1:13) ug nga pagkahuman gihatag ngadto sa mga magbalantay sa karnero: “Ayaw na kamo kalisang: kay tan-awa, gidad-an ko kamog maayong balita sa dakong kalipay”(Lucas 2:10).
Adunay dakong kalisang sa kalibutan karon—sa pagminyo, pagbaton og mga anak, paghimo og mga pasalig, pagbarug sa sakto, pag-atubang sa mga pagpamugos sa ka-edad (peer pressure). Adunay mga kalisang sa ekonomikanhong mga kondisyon ug natural nga mga katalagman. Apan ang tambag sa Ginoo alang kanato karon susama sa gihatag ngadto ni Maria ug Jose: “Busa paglipay, ug ayaw kahadlok, kay Ako ang Ginoo anaa uban kaninyo” (D&P 68:6; emphasis gidugang).
Ang tambag sa anghel alang kang Maria ug Jose nga “ayaw kalisang” mas labaw pa kay sa gipahaum nga panudlo alang sa ilang indibidwal nga mga problema. Usa kini ka kinatibuk-ang pag-ila alang sa tanang mga tawo tungod kay si Maria ug si Jose adunay talagsaong tahas diha sa pagpangalagad sa Manluluwas, kansang pagpangalagad maoy nakapaposible sa pagwagtang sa tanang mga kalisang sa tanang mga tawo sa tanang kapanahunan.
Tungod sa pagkatawo, kinabuhi, ug Pag-ula sa Manluluwas, walay dili masulbad nga mga problema. Dayag nga adunay temporaryong mga katalagman ug mga kalisdanan, apan dili kini permanente o dili mabuntog. Mahunahuna ba ninyo ang usa ka tawo nga adunay problema nga dili masulbad sa Dios? Siya adunay solusyon kanunay nga maoy makapalambo sa atong mahangturong kauswagan. Mao kana ang rason alang ug ang lintunganay sa Pag-ula. Mao kana nganong si Mormon miingon, “Kamo magbaton og paglaum pinaagi sa pag-ula ni Kristo” (Moroni 7:41).
Walay pangutana mahitungod sa kapasidad sa Pag-ula sa paghatag og mga solusyon alang sa atong mga problema. Ang mga kasulatan klaro kaayo niini nga punto. Ang tinuod nga mga isyu mao kini: Dawaton ba nato kadto nga mga solusyon? Mopili ba kita sa tubag sa kalibutan o sa tubag sa Dios? Maghinulsol ba kita o mangatarungan, mangayo sa grasya sa Dios sa pagbuntog sa atong mga kahuyang o “kita lang ang mosulbad niini,” moila sa gugma sa Dios sa panahon sa katalagman o mosalikway Kaniya sa tanang kalisdanan sa kinabuhi?
Ang Pag-ula mao ang paagi sa pagsulbad sa dagkong mga problema sa kinabuhi. Uban sa Pag-ula, ang Dios mipahimutang kanato sa lingkuranan sa drayber sa atong balaan nga kapalaran, basta kita mosunod sa Iyang kabubut-on. Si Maria mao ang hingpit nga ehemplo niini nga pagkamasulundon. Ngadto sa anghel siya miingon, “Matuman unta kanako kanang imong giingon”(Lucas 1:38). Walay pagpangatarungan, walay paglangan, walay pagbagulbol—ang mapaubsanong pagsunod lamang sa kabubut-on sa Dios. Si Jose sama usab ka masulundon. Bisan og ang mga gahum sa pagrason tingali nagpasabut nga si Maria dili unta matinud-anon, “nagbuhat siya sa gisugo kaniya sa anghel sa Ginoo, nangasawa siya kaniya” (Mateo 1:24).
Si Maria ug si Jose nakakat-on og usa sa labing gamhanan nga mga leksyon sa kinabuhi: kon kamo nagtuo sa Pag-ula ug mobuhat sa kabubut-on sa Dios, dili kamo angay nga malisang tungod kay adunay solusyon kanunay sa inyong mga problema.
Ang mga tigpanaway dinhi sa kalibutan wala gayud makat-on niini nga leksyon. Angkunon ko, sila maalamon ug mabinantayon. Sila nakakita sa pundok ug sa kalisud sa mga problema nga atong giatubang, apan sila sa kasagaran nawad-an sa paglaum tungod kay sila wala makakita og solusyon. Tungod kini kay sila wala makasabut sa Pag-ula. Ilang nakita ang dako kaayong problema nga ilang giatubang, apan ang ilang panan-aw migamay. Kini ingon og bong-bong nga mibabag sa ilang panan-aw sa posibilidad; ang tanan nilang nakita mao ang problema. Isip resulta, sila nahimong maduha-duhaon ug matahapon ug negatibo. Ang ilang panglantaw gihulagway sa diagram 1.
Diagram 1: Mga tigpanaway
natural nga mga mata
mga problema
mga solusyon
Sa laing bahin, adunay daghan kinsa matukion sa espirituhanong paagi nga dili masawayon. Sila usab maalamon ug mabinantayon. Sila usab nakakita sa daghan ug lisud nga mga problema sa kinabuhi, pero sila adunay hingpit nga lahing panan-aw. Walay bong-bong nga nagbabag sa ilang panan-aw. Hinoon, sila adunay mga lente sa teleskopyo nga makatabang nila nga makakita dili lamang sa mga problema apan lapas pa usab niini. Sa laing mga pulong, ilang nakita usab ang mga solusyon nga gitanyag sa Pag-ula. Ang ilang panglantaw sa kinabuhi gihulagway sa diagram 2.
Diagram 2: matukion sa Espirituhanong paagi
espirituhanong mga mata
mga problema
mga solusyon nga gitanyag sa Pag-ula
Isip resulta, kini nga mga tawo adunay gamay lang, kon aduna man gani, nga mga kahadlok. Positibo sila ug malaumon ug malipayon mahitungod sa kinabuhi tungod kay sila nasayud gayud nga sa kada problema adunay espirituhanong kasulbaran. Ang Manluluwas mipahayag, “Apan sumalig kamo; gidaug ko na ang kalibutan” (Juan 16:33). Busa, walay luna alang sa pagkanegatibo diha sa Simbahan ni Kristo. Ang pagkanegatibo ug pagkamatahapon gikan kang Satanas. Ang pagkamalipayon ug pagkamalaumon gikan ni Kristo.
Ang tanang mga problema sa kalibutan ingon og nabahin sa upat ka punoang mga kategoriya, ang kada usa nga gikunsaran ug gibuntog sa Manluluwas, mao nga Siya misugo nga “magmasaligon.”
-
Una, kamatayon. Ang mga kasulatan nagpahayag, “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi” (1 Mga Taga-Corinto 15:22).
-
Ikaduha, sala. Ang anghel misulti ni Jose nga si Jesus “moluwas sa iyang katawhan gikan sa ilang mga sala” (Mateo 1:21).
-
Ikatulo, kahuyang. Ang Manluluwas mitudlo ni Moroni nga ang Iyang “grasya [ang gahum sa Pag-ula] igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).
-
Ikaupat, komon nga mga sakit sa kinabuhi nga tingali walay kalabutan sa sala (sama sa sakit, pagsalikway, depresyon, pagkataktak sa trabaho, ug uban pa). Si Isaias nanagna nga ang Manluluwas “mobugkos sa mga dugmok og kasingkasing,” “paglipay niadtong tanan nga nagbalata,” ug “paghatag kanila og purongpurong nga bulak” (Isaias 61:1–3; tan-awa usab sa Alma 7:9–13).
Kay sa matag kasakit nga gihatag sa kalibutan kanato, ang Manluluwas adunay tambal sa mas labaw nga gahum sa pag-ayo. Dili ikatingala nga si Maria mituaw, “Ang akong kalag nagadayeg sa Ginoo, ug ang akong espiritu nagakalipay diha sa Dios nga akong Manluluwas” (Lucas 1:46–47). Siya ang Manluluwas tungod kay Siya makaluwas gayud nato gikan sa kamatayon ug sa sala ug sa kahuyang ug sa ordinaryong mga sakit sa kinabuhi.
Ang atong Langitnong Amahan buot nga sila si Maria ug Jose mosugod sa walay kasiguroan nga dalan sa kinabuhi nga walay kalisang, nga nahibalo nga ang Iyang Anak anaa uban sa tanan Niyang makaluwas nga mga gahum. Gusto usab Siya nga kita makat-on niini nga leksyon sayo sa kinabuhi. “Ayaw kalisang. … Kay sa Dios walay butang nga dili mahimo” (Lucas 1:30, 37).
Sumala sa Imong Pulong, ni Elspeth Young, dili mahimong pakopyahan; mga paghulagway pinaagi ni Steve Kropp
Ngadto ni Maria, ang anghel miingon: “Ayaw kalisang. … Kay sa Dios walay butang nga dili mahimo.”
Siya ang Manluluwas tungod kay Siya makaluwas gayud nato gikan sa kamatayon ug sa sala ug sa kahuyang ug sa ordinaryong mga sakit sa kinabuhi.
Dili ang Akong Kabubut-on, Apan ang Imoha, Ang Matuman, ni Harry Anderson © Pacific Press Publishing Association, dili mahimong pakopyahan; paghulagway sa litrato pinaagi ni Matthew Reier