Hangtud Kita Magkita Pag-usab
Pasko sa Ubasan
Unsa kaha ang nakapaagni sa mga Santos sa Ulahing mga Adlaw sa pagbiya sa ilang mga panimalay sa Pasko alang sa usa ka adlaw nga bug-at nga trabaho. Ang ilang tinguha sa pagserbisyo Kaniya kansang pagkatawo atong gisaulog.
Sa ulahing bahin sa Disyembre usa ka mabugnaw nga gabon ang mitabon sa mga balagon sa ubas sa wala pa ang kaadlawon. Hilom ang ubasan gawas sa usa ka seksyon, nga napuno sa mga tingog ug sa usa ka mahayag, nagpiti-piti nga daub. Pasko kini sa buntag, ug bisan asa niini nga walog, ang mga tawo anaa gihapon sa mainit nga mga higdaanan o nagpundok libut sa mga Christmas tree nga nagtan-aw sa malipayong mga anak. Apan dili sa gamay nga grupo didto sa ubasan. Miabut sila aron sa paghatag og regalo.
Aron masabtan ang kahulugan sa regalo, kinahanglang makahibalo kamo nga kini nga ubasan sa Madera, California, USA, kabahin sa sistema sa produksyon sa welfare sa Simbahan. Kada tuig makahimo kini og mga 400,000 ka mga libra (180,000 kg) sa mga pasas. Katunga sa ani maadto sa butanganan sa mga bishop storehouse. Ang uban gamiton alang sa pagtubag sa humanitarian service sa tibuok kalibutan. Ang mga ward ug mga branch gikan sa walo ka mga stake gihatagan og mga buluhaton aron kompletohon ug atimanon ang mga laray sa mga ubasan.
Usa sa delikado nga buluhaton mao ang pagpul-ong sa mga balagon sa ubasan. Ang nagkasapidsapid sa miaging pagtubo kinahanglang putlon, magbilin og pipila lamang ka mga punoan nga motubo aron adunay makuha sa sunod nga ting-ani. Kon wala kining panahon sa pagpul-ong sa walay bunga nga mga punoan, ang ubasan magpatuyang og tubo. Kon daghan kaayong mga balagon sa ubas maapektohan ang abilidad sa pagtubo sa mga gamot niini. Gamay ra kaayo ang bunga, ug ang ani mokunhod pag-ayo.
Ngano nga kini nga trabaho sa adlaw man sa Pasko? Tungod kay daghan sa mga miyembro sa ward mga trabahante sa umahan, ang pagpul-ong sa mga kaubasan ug mga prutasan mao ang ilang panginabuhi. Motrabaho sila og pito ka adlaw sa usa ka semana niining panahona sa tuig, mao nga kining adlaw lamang nga sila walay trabaho sa daghang mga semana. Pasko na—ug nagtrabaho sila dinhi sa ubasan sa Simbahan. Gani, mianhi sila dinhi og ka 8 sa miaging 15 ka mga Pasko. Alang niining mga miyembro sa Madera Third Ward nga ang sinultihan Kinatsila, kini mao ang ilang regalo sa El Niño—ngadto sa bata nga si Kristo.
Usa ka trabahante, si Miguel Chavez, mipasabut nga usa kini ka paagi sa paghatag og balik alang sa tanang mga panalangin nga ilang nadawat gikan sa Ginoo: “Naghatag kami og usa ka butang sa timawa nga mga pamilya. Ang among gamay nga kontribusyon nahimong dako nga panalangin ngadto sa ubang mga tawo.” Laing miyembro sa ward yanong miingon, “Mao kini ang labing maayo nga trabaho nga among mahimo tungod kay kini mao ang ubasan sa Dios.”
Ug mao nga, niining maong adlaw sa Pasko, kon kini nga mga miyembro sa Madera Third Ward mahuman sa pagpamul-ong, pagputos, ug paghigot sa ilang mga ubasan, ilang humanon ang mga bahin sa duha ka mga laray sa silingang mga ward. Usa kini ka regalo nga angay alang sa usa ka Hari.
Gilitratohan ni Howard Collett