Ang mga Miyembro sa Simbahan Nagpakigbahin sa Ebanghelyo diha sa Internet
Ang mga misyonaryo sa tibuok kalibutan nag-atubang og usa ka problema sa bag-ohay nga mga katuigan: human lamang sa usa o duha ka pagbisita, ang usa ka investigator kinsa mipakita og tinuod nga interes dili na mopadayon. Nahibaloan sa mga tigsiksik nga kadaghanan niadtong mga investigator adunay usa ka butang nga komon: mawala ang ilang interes human nila makita ang negatibo, dili sakto nga impormasyon mahitungod sa Simbahan diha sa Internet.
Unom ka tuig ang milabay 80 porsyento sa mga resulta sa search engine alang sa termino nga “Mormon” sa Iningles mga negatibo o dili sakto. Karon ang sitwasyon mas maayo na. Sa pipila ka mga nasud, ang mga resulta sa pagsiksik sa Internet alang sa “Mormon” karon moabut na og 80 porsyento nga positibo.
Nganong dako man kaayo ang kausaban? Agig dugang sa opisyal nga mga Web site sa Simbahan, ang dili opisyal nga mga Web site nga nagpakigbahin og positibo nga impormasyon mahitungod sa Simbahan nagkatap sa tibuok Web. Ang mga indibidwal naggamit og mga blog aron sa pagpakigbahin sa ilang mga mithi, ug ang mga mensahe sa ebanghelyo makita diha sa mga social networking site.
Sa laktud, tungod sa paagi sa paggamit sa mga miyembro niini, ang Internet nakatabang usab sa pagdala sa mga tawo ngadto sa full-time nga mga misyonaryo.
Daghang mga miyembro sa Simbahan ang nadasig sa tambag ni Elder M. Russell Ballard sa Korum sa Napulog Duha ka mga Apostoles, kinsa miingon, “Hangyoon ko kamo sa pag-apil sa pag-istoryahanay pinaagi sa pagsalmot diha sa Internet sa pagpakigbahin sa ebanghelyo ug sa pagpasabut sa yano ug klaro nga mga pulong ang mensahe sa Pagpahiuli.”1
Ania ang pipila ka mga paagi nga gigamit sa mga miyembro sa Simbahan ang Internet aron sa pagpakigbahin sa ebanghelyo sa yano, apan sa makahuluganon nga mga paagi.
Ang Bag-o nga Mormon.org
Ang Mormon.org, usa ka opisyal nga Web site sa Simbahan ug usa ka maayo nga pagka-establisar nga himan sa misyonaryo, gidesinyo pag-usab aron sa pagkonektar sa mga tiggamit direkta ngadto sa mga miyembro sa Simbahan gamit ang personal nga mga profile.
Ang bag-o nga Mormon.org mosugod sa pagpakita sa nagkalain-laing mga pinulongan inig tunga-tunga sa 2011, nga sugdan sa Spanish ug Portuguese. Magtugot kini sa mga miyembro sa paghimo og mga profile nga nagpasabut sa ilang mga gituohan ug pamaagi sa kinabuhi. Ang mga mobisita makatan-aw niini nga mga pahina sa profile ug makakat-on pa og dugang mahitungod sa Simbahan nga direkta mismo sa mga miyembro niini.
“Gusto namo nga ang mga mobisita makailaila sa mga miyembro sa Simbahan ug makig-interact kanila,” miingon si Ron Wilson, ang manager sa Internet ug marketing sa Missionary Department sa Simbahan.
(Alang sa dugang nga impormasyon mahitungod niining mga profile ug uban nga mga feature mahitungod sa bag-o nga Mormon.org, tan-awa sa kauban nga istorya.)
Ang More Good Foundation
Ang More Good Foundation usa ka dili pangnegosyo nga organisasyon nga gimugna sa mga miyembro sa Simbahan nga naningkamot sa paghatag sa Simbahan og positibo nga presensya diha sa Internet. Bisan tuod ang foundation wala dumalaha o pasiugdahi sa Simbahan, nakahimo kini og mahinungdanong bahin sa pagpalambo sa presensya sa Simbahan diha sa Internet.
Ang mga tigpasiugda sa More Good Foundation misugod sa pagtuon sa mga search engine ug giunsa nila sa pagpili ang mga resulta. Ilang nasayran nga ang Google, usa ka sikat nga Internet search engine, nagtugot sa usa ka site nga mabutangan lamang og duha ka mga luna diha sa pahina sa mga resulta. Nagpasabut kana nga bisan kon ang LDS.org adunay gatusan ka mahinungdanon nga mga pahina, duha lamang ang makita isip mga resulta sa pagsiksik. Naghatag kana og daghang abli nga luna alang sa negatibo nga mga site, ug ang mga tawo daw maadto sa mga site nga walay kalabutan sa Simbahan isip usa ka institusyon.
“Mangita sila sa mga panglantaw sa ilang mga kagrupo kay sa mosalig sa mga organisasyon,” miingon si Jonathan Johnson, presidente sa More Good Foundation. “Kon kita makasabut niana nga baruganan, atong masabtan kon nganong ang atong mga lider nag-ingon nga kita isip mga miyembro mahimong mas epektibo. Atong malikayan ang mga ali nga namugna kon ang mga tawo makakita og usa ka tawo nga anaa sa opisyal nga kapasidad.”
Ang More Good Foundation nakaangkon og mga katungod [rights] sa sobra sa 1,400 ka mga URL ug nag-awhag sa mga miyembro sa Simbahan sa pagmugna og mga Web site nga naghisgut og mga baruganan sa ebanghelyo. Nakapalambo sila og 320 ka mga site sa ingon ka daghan sa 12 ka mga pinulongan. Nagbutang usab sila og sobra sa 1,900 ka mga video diha sa YouTube, naghatag sa mga tawo nga nagsiksik sa Simbahan og dugang nga mga kahigayunan sa pagkakaplag sa kamatuoran.
Mga Blog
Alang sa mga miyembro nga walay panahon o mga kahanas sa pagmugna og tibuok nga Web site, ang pag-blog nagtanyag og tukma nga alternatibo. Ang mga blog (minubo sa “weblogs”) mga yano nga mga Web site nga sayon i-maintain ug kasagaran walay bayad.
Gatusan ka mga miyembro sa Simbahan sa tibuok kalibutan naggamit sa ilang mga blog sa pagpakigbahin sa ebanghelyo ngadto sa pamilya ug mga higala. Normal lang sa mga blogger nga mopaambit sa mga butang nga importante ngadto kanila, busa natural kini nga dapit nga hisgutan ang ebanghelyo.
Usa ka batan-ong inahan kinsa nagpakigbahin sa iyang pagtuo diha sa Internet nakapalambo og tigsuporta. Si Stephanie Nielson nagsugod og usa ka blog, nieniedialogues.blogspot.com, diin iyang giasoy ang iyang kinabuhi isip usa ka inahan nga anaa ra sa balay. Siya mipadayon sa pag-update sa iyang blog human maluwas sa usa ka paghagsa sa eroplano niadtong 2008 nga nagbilin kaniya og klaro kaayo nga uwat apan mas mapahinunguron sa espirituhanong paagi.
Si Stephanie nagpakigbahin sa ebanghelyo diha sa iyang blog pinaagi sa iyang mga post ug naglakip sa dakong button uban sa link ngadto sa LDS.org. Nagtanyag usab siya sa mga bisita og libre nga kopya sa iyang “paborito nga basahon”—ang Basahon ni Mormon—nga iyang ipadala “bisan asa sa kalibutan … bisan asa!”
Social Media nga mga Web Site
Minilyon sa mga tawo ang nakakonektar diha sa Facebook, Twitter, ug YouTube, ug ang mga miyembro sa Simbahan nagpakigbahin usab sa ebanghelyo diha.
Ang impormasyon adunay kahigayunan nga mokatap sa paspas ug sayon nga paagi diha sa mga social network, nga nakapahimo niining usa ka maanindot nga paagi sa pagpakigbahin sa ebanghelyo. Diha sa LDS.org, ang tanang mga aytem sa seksyon sa Gospel Library makita ang “Share” nga tool, nga nagtugot sa mga tiggamit sa sayon nga paggamit sa mga link ngadto sa mga artikulo sa mga magasin sa Simbahan, mga pakigpulong sa kinatibuk-ang komperensya, ug mga manwal sa leksyon diha sa nagkalain-laing mga social media site.
Ang mga tiggamit sa social network mahimo usab nga fan sa opisyal nga mga pahina sa Facebook sa Simbahan. Ang Simbahan adunay sobra sa 280,000 ka mga fan, ang Basahon ni Mormon adunay sobra sa 162,000 ka mga fan, ug liboan pa ka mga tiggamit ang miapil sa uban nga mga pahina nga may kalabutan sa Simbahan. Kon ang usa ka tiggamit sa Facebook moapil ug mosalmot sa usa ka grupo, ang iyang mga higala pahibaloon. Busa, ang mga higala sa gatusan ka libo nga tiggamit sa Facebook mahibalo sa Simbahan pinaagi sa Facebook.
Ang mga miyembro sa Simbahan naggamit usab sa Twitter, usa ka social networking nga Web site nga gigamit sa pagpadala og mubo nga mga mensahe (“tweets”) gamit ang Internet, sa pagpakigbahin sa ebanghelyo. Ilabi na gayud, ang kinatibuk-ang komperensay mao ang nag-una diha sa Twitter atol sa weekend sa kinatibuk-ang komperensya niadtong Abril 2009,2 nagpasabut nga ang kinatibuk-ang komperensya mas gihisgutan kay sa uban nga mga hilisgutan.
Ang Simbahan nag-establisar usab og presensya diha sa YouTube, usa ka inila nga Web site nga butanganan sa video, nga nakakuha og positibo nga reaksyon gikan sa mga miyembro ug dili mga miyembro. Matag video sa Mormon Messages, sama sa uban pa nga gibutang sa YouTube, sayon ra ibutang sa blog o ipakigbahin gamit ang e-mail, Facebook, o Twitter.
Ang Internet naghatag og paagi sa mga miyembro sa Simbahan sa pagpangita sa mga tawo diha sa pamaagi nga dili katuohan sa henerasyon nga milabay, ug samtang ang teknolohiya nagkalambo, ingon usab ang abilidad sa mga miyembro sa Simbahan sa pagpakigbahin sa ebanghelyo.
Ang mga miyembro naghimo og nagkadugang nga mahinungdanon nga tahas diha sa Internet ingon nga nagkadaghan ang mga tawo nga nagsusi sa Simbahan gamit ang Web.
Gilitratohan ni Welden Andersen