Walay Paglubad nga mga Istorya sa Ebanghelyo
Ang Istorya nga Kanunayng Bag-o
Walay laing tawo gayud nga mipuyo sa yuta kinsa nakahimo og susamang impluwensya diha sa mga panghitabo sa kalibutan sama sa nabuhat sa atong Ginoo ug Manluluwas, si Jesukristo.
Ang istorya kabahin ni Jesus ang Kristo mao ang istorya sa karaan nga kanunayng nagpabilin nga bag-o. Ang mas kanunay nakong pagbasa sa Iyang kinabuhi ug pagpangalagad mas dako ang hingpit nga kalipay, kalinaw, katagbawan ang mopuno sa akong kalag. Kanunay adunay bag-ong pagpangdani ang moabut kanako sa pagpamalandong sa Iyang mga pulong ug sa plano sa kinabuhi ug sa kaluwasan nga Iyang gitudlo ngadto sa mga tawo atol sa Iyang kinabuhi dinhi sa yuta.
Kitang tanan nasayud nga walay laing tawo gayud nga mipuyo sa yuta kinsa nakahimo og susamang impluwensya diha sa mga panghitabo sa kalibutan sama sa nabuhat sa atong Ginoo ug Manluluwas, si Jesukristo; apan Siya natawo diha sa hilit nga dapit, gipahigda sa pasungan. Siya mipili og kabus, walay edukasyon nga mga mangingisda isip Iyang mga Apostoles. [Labaw na sa] 1,900 ka mga tuig ang milabay sukad sa Iyang Paglansang sa Krus, apan ang tibuok kalibutan, bisan pa sa tanang panagbangi ug kaguliyang, aduna gihapoy nagdilaab diha sa mga kasingkasing sa minilyon ka mga tawo nga usa ka pagpamatuod sa kabalaan sa trabaho nga Iyang nabuhat. …
Kini usa ka kapanguhaan sa walay katapusan nga kalipay ngari kanako ug nagpuno sa akong kasingkasing labaw pa sa akong gahum sa pagpahayag aron sa pagpamalandong sa katinuod nga ang Dios ang atong Langitnong Amahan ug ang atong Ginoo nga si Jesukristo mibisita sa yuta ug mipadayag pag-usab sa ebanghelyo ngadto sa tawo; ug kini nagpuno kanako uban sa pagpasalamat, nga labaw pa sa akong gahum sa pagsulti, nga Siya nakapanalangin kanako og usa ka kahibalo sa kabalaan sa trabaho nga kita nalakip. Ang akong makanunayon ug matinguhaon nga pag-ampo ngadto Kaniya mao nga ang akong hunahuna dili gayud modulom, nga ako dili gayud mobiya sa dalan sa pagkamatarung, ug samtang ako nagtubo molambo ako diha sa pagsabut, nga ang kahayag ug inspirasyon sa Espiritu sa Dios modilaab unta sa akong kasingkasing ug molamdag sa akong panabut ug mopabilin kanako nga lig-on ug matinud-anon diha sa pag-alagad sa akong Langitnong Amahan.
Ug gusto nakong isulti sa mga Santos sa Ulahing mga Adlaw nga gikinahanglan nato kini, kinsa nakadawat og pagpamatuod sa kabalaan sa trabaho nga kita naapil, aron sa paghan-ay sa atong kinabuhi matag adlaw nga sa ingon ang himaya madala ngadto sa buhat sa Dios pinaagi sa maayong mga buhat nga atong gipanghimo, busa pinaagi sa pagpasiga sa atong kahayag nga ang mga tawo, makakita sa atong mga maayong buhat, modayeg sa Dios. Walay laing katawhan dinhi sa kalibutan nga napanalanginan nga sama sa mga Santos sa Ulahing mga Adlaw; walay laing katawhan nga nakasinati sa mga pagpakita sa pagkamabination ug kalooy ug pagkamainantuson sa Dios nga iyang gitugyan ngari kanato, ug ako moingon nga kita, labaw pa sa tanang katawhan dinhi sa yuta, kinahanglang mopuyo sama sa dios ug magbaton og matarung nga mga kinabuhi.
Inahan ug Anak, ni J. Kirk Richards; paghulagway sa litrato pinaagi ni Christina Smith