Atong mga Panimalay, Atong mga Pamilya
Pagtabang sa mga Bata sa Paggamit sa Ilang Kabubut-on
Sama sa gitudlo sa Langitnong Amahan nila ni Adan ug Eva kabahin sa kabubut-on, kita kinahanglang motabang sa atong mga anak sa pagpasabut ug paggamit sa ilaha.
Sa dihang ang Langitnong Amahan milalang kang Adan ug Eva, sila inosente. Wala sila makahibalo og daghan kabahin sa kinabuhi ug sa mga sangputanan niini. Apan ang Langitnong Amahan milakaw uban kanila ug mitudlo kanila, ug Siya mapailubon ngadto kanila samtang sila nagkat-on kabahin sa ilang pagkaanaa dinhi.
Isip mga ginikanan kita usab adunay pribelihiyo nga makauban sa atong gagmayng mga bata ug motudlo kanila. Bisan pa niana, sa akong hunahuna usahay kita makalimot nga ang atong mga anak mga espiritung anak usab sa atong Langitnong Amahan. Kita adunay responsibilidad sa pagtabang kanila nga sila makakat-on sa ilang unang mga leksyon, ug kini atong misyon sa paggiya kanila padulong sa Manluluwas nga si Jesukristo.
Kon kita mosunod sa ehemplo sa Langitnong Amahan diha sa Tanaman sa Eden, atong gidala sa atong kaugalingon ang responsibilidad sa pag-amuma sa atong mga anak ug pagtudlo kanila kabahin sa ebanghelyo ni Jesukristo. Samtang ato kining buhaton, kinahanglan natong itudlo kanila ang kabahin sa mga sangputanan sa ilang mga lihok. Dili kini sayon nga buluhaton, tungod kay mismo sa atong kaugalingon nagkat-on pa gihapon, ug usahay kita mapakyas sa pagbuhat sa gusto sa Langitnong Amahan. Ug usahay kita manginlabut ug moluwas sa atong mga anak bisan kon sila ang makabenepisyo pinaagi sa pagkat-on sa ilang mga sayop.
Ang Langitnong Amahan mapailubong mitudlo nila ni Adan ug Eva kabahin sa kabubut-on gikan sa sinugdanan. Siya mihatag kanila og mga sugo, mga sangputanan, ug abilidad sa paggamit sa ilang kabubut-on, nag-ingon, “Sa matag kahoy sa tanaman ikaw mahimo nga gawasnon nga mokaon, apan sa kahoy sa kahibalo sa maayo ug sa dautan, ikaw dili mokaon niini, bisan pa niana, ikaw mahimo nga makapili alang sa imong kaugalingon, kay kini gihatag nganha kanimo; apan, hinumdumi nga Ako nagdili niini, kay sa adlaw nga ikaw mokaon niana ikaw sa pagkatinuod mamatay” (Moises 3:16–17; empasis gidugang).
Kita matingala unsaon sa pag-awhag sa atong mga anak sa pagsunod sa mga sugo nga dili pugson sa pagbuhat sa ingon. Adunay pipila ka mga butang nga atong mahimo nga makatabang. Kita makatudlo sa atong mga anak sa ebanghelyo, ilabi na gikan sa mga kasulatan, dayon magpuyo sumala niadtong mga baruganan. Kita makatudlo kanila pinaagi sa pulong ug ehemplo sa pagsalig sa atong Langitnong Amahan ug sa pagpakigbahin uban kanila sa mga panalangin nga moabut pinaagi sa pagsunod sa ebanghelyo. Kita makatudlo kanila nga tungod sa atong mga kahuyang, kita isip mga ginikanan nagkinahanglan sa Iyang gugma, kalooy, ug pailub sama usab ang atong mga anak.
Usahay, kon ang atong gagmay nga mga bata magpabadlong, kita mahimong mawad-an sa paglaum, apan ang atong Amahan sa Langit dili gayud mawad-an og paglaum ngari kanato. Kita kinahanglang magkat-on sa paglantaw sa atong mga anak sama sa paglantaw kanato sa atong Langitnong Amahan: isip Iyang anak nga mga lalaki ug mga babaye nga may potensyal nga mahisama Kaniya pinaagi sa gahum ug grasya sa Iyang Anak. Kita walay gahum sa pagluwas sa atong mga anak, apan kita mahimong maayo nga mga ehemplo ug magbansay og hugot nga pagtuo alang kanila.
Kita wala dinhi aron sa pagpugos ni bisan kinsa sa pagbuhat sa gusto sa Langitnong Amahan. Siyempre, ang bili sa kagawasan ug responsibilidad nga atong ihatag sa atong mga anak mag-agad sa ilang edad ug mga abilidad. Samtang kita motabang sa atong mga anak sa paggamit sa ilang kabubut-on sa hustong paagi, kini mas sayon sa pagtudlo ug paghigugma kanila, dili igsapayan unsa ang ilang gibuhat.
Ang atong Langitnong Amahan nasayud nga si Adan ug Eva matintal ug mokaon sa kahoy sa kahibalo sa maayo ug sa dautan. Siya miandam na og paagi alang kanila sa pagbalik pinaagi sa Iyang Anak. Siya mipadala og anghel sa pagtudlo kanila kabahin sa maulaong sakripisyo sa atong Manluluwas, ang mga baruganan sa paghinulsol, ug sa unsang paagi nga sila makatawag sa Dios sa ngalan sa Anak ug magbaton og kapasayloan sa ilang mga sala pinaagi sa kalooy ug gugma sa Langitnong Amahan (tan-awa sa Moises 5).
Samtang atong ipahayag ang atong gugma alang sa atong mga anak ug motudlo kanila bisan kon sila masalaag, kita maglig-on, maglaum ug mag-ampo alang kanila nga sila makakaplag og hingpit nga kalipay pinaagi sa hugot nga pagtuo ni Jesukristo ug tinuod nga paghinulsol. Samtang buhaton nato kining mga baruganan, kita buhong nga mapanalanginan nga mapuno sa gugma nga putli ni Kristo ug makaangkon og mas daghang kalampusan isip mga ginikanan (tan-awa sa D&P 121:41–46).
Paghulagway pinaagi ni Michael Parker