“Ako naglisud sa pagdasig sa akong kaugalingon sa pagbasa sa mga kasulatan. Unsaon nako nga makabaton og kadasig?”

Ang pagtuon sa mga kasulatan lisud sa sinugdanan. Adunay daghan kaayo nga mga konsepto nga makat-unan, ug ang mga tawo ug mga dapit ingon og wala mailhi. Apan ang pagtuon sa kasulatan mahimong magantihon nga kasinatian kon magpadayon kamo niini.

Sulayi ang eksperimento nga gihulagway ni propeta Alma (tan-awa sa Alma 32:27–34). Mitudlo siya nga kon kamo “mohatag og luna” sa pulong sa Dios sa inyong kinabuhi, makapalambo kini sa inyong kalag ug makapalamdag sa inyong pagsabut. Makapadasig usab kini kaninyo sa pagpadayon sa pagbasa sa mga kasulatan tungod kay, sama sa gisaad ni Alma, ang pulong sa Dios magsugod nga mahimong lamian diha kaninyo (tan-awa sa Alma 32:28).

Ang laing paagi sa pagpangita og pagdasig mao ang pagpangita og daghang mga panalangin nga moabut gikan sa pagtuon sa mga kasulatan:

Kanunay ug sinsero nga pagtuon sa kasulatan makadapit sa Espiritu sa inyong kinabuhi, makatubag sa inyong mga pangutana, makatabang kaninyo nga adunay limpyo nga mga hunahuna, makadasig kaninyo sa pagserbisyo sa uban, makatabang kaninyo nga mag-ampo nga mas epektibo, ug makalig-on sa inyong pagpamatuod kabahin ni Jesukristo ug sa Pagpahiuli.
Ang mga kasulatan makatudlo kaninyo unsaon sa pagbaton og hugot nga pagtuo, unsaon sa pag-ila sa Espiritu Santo, ug unsaon sa paghinulsol. Kini makatudlo kaninyo kon ngano nga kita nagkinahanglan og Manluluwas, ngano nga ang oposisyon gikinahanglan, ngano nga kini nga kalibutan gilalang, ug daghan pa.

Samtang kamo makasinati niini nga mga panalangin, dili na kinahanglan nga pugson ninyo ang inyong kaugalingon sa pagbasa—kamo maghinam-hinam niini.

Ang mga Kasulatan Adunay mga Tubag

Pinaagi sa pagbasa sa 2 Nephi 32:3, diha-diha kamo makasabut ngano nga kita kinahanglan nga mobasa ug magtuon sa mga kasulatan. Nasayud ako nga ang mga kasulatan naglakip sa tanang tubag sa atong mga pangutana! Kinahanglang makasabut kita nga ang mga kasulatan gihatag aron sa pagtabang kanato nga molambo ngadto sa kahingpitan, nga mao ang gikinahanglan nga bahin niini nga kinabuhi. Kada adlaw kitang tanan adunay pipila ka mga minuto nga igahin sa pagbasa sa mga kasulatan.

Sergij C., edad 21, Novosibirsk, Russia

Usa ka mas Lig-on nga Pagpamatuod

Wala ako magbasa sa mga kasulatan hangtud nga ang akong presidente sa Young Women misugyot nga akong trabahoon ang Personal nga Kauswagan. Naghangyo kini kanako sa pagbasa sa mga kasulatan kada adlaw sulod sa pipila ka mga semana. Human makabuhat niini, wala na gyud ako mohunong sa pagbasa niini. Ang akong labing maayong tambag mao nga kinahanglan kamong motrabaho sa inyong Personal nga Kauswagan o sa Katungdanan ngadto sa Dios. Hagita ang inyong kaugalingon sa pagbasa sa mga kasulatan pirme, ug kamo makakita og kausaban sa inyong kaugalingon. Mosulti ako kaninyo niini nga walay pagduha-duha—kamo makamatikod nga kamo adunay mas lig-on nga pagpamatuod.

Paola S., edad 16, Cortés, Honduras

Pag-ampo alang sa Pagsabut

Bisan og kon ako adunay daghang mga proyekto ug mga assignment sa eskwelahan, ako kining ipadaplin ug magsugod sa pagbasa og una sa mga kasulatan. Magsugod ako pinaagi sa pag-ampo aron sa pagdapit sa Espiritu Santo sa pagsabut sa pulong sa Dios. Ug pinaagi sa tabang sa mga manwal sa seminary, ang akong kadasig sa pagbasa sa mga kasulatan milambo ug nagpadayon sa pagtubo.

Elieser N., edad 16, Ilocos Norte, Philippines

Taming sa Dios

Ang yawe sa pagpalambo og bisan unsa nga kinaiya mao ang tinguha. Himoa kini nga inyong tinguha ang pagbasa kada adlaw. Paghimo og listahan [log] kon pila ang inyong basahon, ug paningkamuti nga mobasa sa samang oras kada adlaw. Makatabang kini kaninyo nga mahimong makanunayon. Ang pagbasa sa mga kasulatan sama sa pagbutang sa taming sa Dios. Dili mo moadto sa gubat nga wala ang inyong taming. Ayaw pag-adto sa kalibutan sa sala nga wala ang taming sa Dios. Panalipdi ang inyong kaugalingon—basa sa mga kasulatan.

Andrew G., edad 18, Maine, USA

Usa ka Butang alang sa Tanan

Kini nakatabang kanako sa paghunahuna unsa ang anaa sa mga kasulatan. Dili lamang kini naglakip sa ebanghelyo, sa mga pagtulun-an ni Kristo, ug sa mga sugo, pero kini—ilabi na ang Basahon ni Mormon—usa ka basahon sa pagpanimpalad, puno sa mga gubat, mga bayani, buotan nga mga tawo, ug dautan nga mga tawo. Ang mga kasulatan aduna gayuy butang alang sa tanan.

Eve W., edad 15, Nevada, USA

Dili Lamang usa ka Libro

Ayaw hunahunaa ang mga kasulatan nga usa lamang ka libro nga inyong basahon alang sa seminary o tungod kay kinahanglan ninyong himoon. Inyong mabasa ang pulong sa Dios. Kini dunay mga panimpalad, mga kasakit, mga gubat. Ang mga kasulatan mao ang testamento ni Jesukristo—nga Siya mao ang atong Manluluwas, nga Siya miula ug namatay alang kanato. Ang mga propeta nanagna sa Iyang pagkabalaan. Daghan ang nangamatay tungod kay dili sila molimud unsay ilang nahibaloan nga tinuod. Ang ilang hugot nga pagtuo dili matarug. Kinahanglan nga kitang tanan maningkamot nga mahimong matinud-anon sama nila.

Kaleb L., edad 14, Utah, USA

Gusto Siya nga Makigsulti Kaninyo

Ang atong Langitnong Amahan adunay tubag sa kada pangutana nga inyong ipangutana Kaniya; ang bugtong butang nga inyong buhaton mao ang pagbasa sa mga kasulatan ug paggamit niini sa inyong kinabuhi. Ang pagkahibalo nga ang Langitnong Amahan gusto nga makigsulti kaninyo ug motubag sa inyong mga pag-ampo makatabang kaninyo nga mangita Kaniya kada adlaw diha sa mga kasulatan. Samtang magsunod kamo sa Iyang pulong, ang inyong kinabuhi molambo, ug makakaplag kamo og dangpanan ug kalinaw. Magmalipayon kamo kon makadungog sa Iyang tingog.

Elberth R., edad 18, Ixtapaluca, Mexico

Pagmugna og Kinaiya sa Pagbasa

Ang pagmugna og kinaiya makatabang kaayo. Sugod og hinay; pagbasa og usa ka kapitulo o duha kada adlaw. Sa dili madugay makaangkon kamo og kinaiya sa pagbasa sa mga kasulatan. Sa kasagaran mobasa ako og duha ka mga kapitulo kada gabii ug mokanta og himno. Kini nga naandan nakapabayaw kanako ug malaumon alang sa unsay ikahatag sa sunod adlaw. Ug mas makasabut ako sa mga leksyon sa seminary. Ang mga kasulatan usa ka panalangin. Pahimusli kini.

Taylor C., edad 15, Washington, USA

Tambag alang sa Inyong Kinabuhi

Ang mga kasulatan nagsaysay sa mga kasinatian sa mga tawo kinsa miagi og mga kalisdanan nga susama sa atoa. Kon magsugod mo sa pagbasa sa mga kasulatan, paghalad og pag-ampo ug pagbaton og hugot nga pagtuo nga kamo makakita og tambag alang sa inyong kinabuhi. Ang mga kasulatan mao ang usa sa mga paagi diin ang Langitnong Amahan makigsulti sa Iyang mga anak. Diha sa mga kasulatan atong makaplagan ang kalig-on sa pagsagubang sa tanang mga matang sa mga pagsulay, ug ako mohatag sa akong pagpamatuod nga kon kita natudloan pag-ayo, magmalampuson kita sa pag-ila sa maayo gikan sa dautan ug makalikay sa mga lit-ag ni Satanas.

Anderson F., edad 19, São Paulo, Brazil