Uhot alang sa Pasungan
“Matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios” (Moroni 7:13).
Nagtan-aw si Michael sa gamay, humok nga higdaanan nga uhot. “Nalipay ko nga ang bata nga si Jesus adunay humok, mainit nga higdaanan sa Bisperas sa Pasko,” naghunahuna siya.
Sa miaging semana mainampingong gibutangan ni Michael og gagmay nga uhot kining gamay nga pasungan, usa ka piraso kada higayon. Naghunahuna si Michael nga mao kini ang labing maayong Pasko sukad nga iyang nasinati tungod kay karon dako na siya nga makasabut kon unsa ang Pasko.
Usa ka semana ang milabay si Mama mihatag og leksyon sa family home evening mahitungod sa tinuod nga kahulugan sa Pasko. Miingon siya nga si Jesukristo mao ang labing nindot nga gasa nga gihatag sa Langitnong Amahan ngadto sa kalibutan. Dayon iyang gihatagan ang kada bata sa pamilya og gamay, walay sulod nga pasungan ug gamay nga estatwa sa batang si Jesus.
“Sa mosunod nga semana kada usa ninyo adunay kahigayunan sa paghatag og regalo balik ngadto sa Langitnong Amahan,” miingon si Mama.
“Unsaon nato sa pagbuhat niana?” Nangutana si Michael.
“Ang inyong gasa ngadto sa Langitnong Amahan mao ang pagserbisyo sa uban,” siya miingon. “Kada higayon nga kamo mobuhat og maayong buhat o sa pagtabang og laing tawo, kamo mahimong modugang og usa ka piraso nga uhot sa inyong pasungan. Kon daghan ang inyong mapakita nga pagkamabination ngadto sa uban, mas humok ang pasungan inig ka bisperas sa Pasko.”
“Manghinaut ako nga makabutang og daghang uhot sa akong pasungan kay ni bisan kinsa!” Naghunahuna si Michael.
Pagkasunod adlaw si Michael nagsugod og trabaho sa pagkolekta og uhot.
“Ma, makatabang ba ko nimo sa pagsilhig sa salog?” Nangutana si Michael, sa dihang nakita niya siya (ang iyang inahan) nga nanglimpyo sa kusina.
“Motabang ko nimo sa pagpangita sa imong teddy bear,” iyang giingnan ang iyang manghud nga lalaki sa dihang mihilak kini tungod sa nawala niyang dulaan.
“Gusto usab akong magpala og snow,” miingon siya sa dihang ang iyang papa migawas aron magpala sa agianan.
Sulod sa pipila ka mga adlaw ang gamay nga pasungan ni Michael lahi na kaayong tan-awon. Nabutangan kini og daghang uhot! Pero si Michael nakamatikod usab og kausaban sa iyang kaugalingon. Malingaw na siya sa pagbuhat og maayong butang alang sa uban tungod kay nasayud siya nga mao kini ang gusto sa Langitnong Amahan nga iyang buhaton. Usahay makalimot gani siya sa pagdugang og piraso sa uhot ngadto sa pasungan kon siya motabang.
Nakahukom si Michael nga ang pagbuhat og nindot nga butang mobati siya og kaanindot sa kaugalingon. Sa Bisperas sa Pasko, samtang siya nagbarug sa bugnaw nga mga suga sa Christmas tree, gihinay pagbutang ni Michael ang iyang gamay nga batang si Jesus sa pasungan, nga karon puno na sa uhot.
Nasayud si Michael nga iyang nabuhat ang labing maayo nga iyang mahimo sa pagpakita sa iyang gugma alang sa Langitnong Amahan ug ni Jesus. Mao kini ang labing nindot nga pasko sukad.
Paghulagway pinaagi ni Jim Madsen