Ebanghelyo sa Akong Kinabuhi
Walay Igong Panahon?
Wala koy panahon alang sa institute. Pero ang Espiritu miaghat nako sa pagpangita og panahon.
Sa ulahing bahin sa Disyembre 2008 naglingkod ko sa celestial room sa Templo sa Seoul Korea, naghunahuna sa umaabut nga bag-ong tuig. Naminyo ako dinhi niini nga templo duha ka bulan ang nakalabay, ug dili pa dugay ang akong mga adlaw ug mga semana ingon og napuno sa trabaho, sa akong calling sa Simbahan, ug sa akong bag-ong na-establisar nga pamilya. Mitambong ako pirme sa klase sa institute, apan karon naghunahuna ko nga tingali mohunong na lang.
Samtang nag-ampo ako alang sa direksyon alang sa bag-ong tuig, gibati nako ang lahi nga impresyon sa pagpadayon sa pagtambong sa institute. Gibati usab nako nga dugangan ang akong pagtambong sa templo. Sa akong pagbiya sa templo nianang adlawa, napuno ako sa kalinaw ug pasalamat alang sa bag-ong direksyon nga gihatag sa Ginoo kanako. Gibati nako pag-ayo nga kon ako mosunod sa direksyon nga akong nadawat, mapanalangin ako.
Sugod sa pagka-Enero nagsugod ako sa pagserbisyo isip temple worker sa Templo sa Seoul. Kinahanglan nga makaduha sa usa ka semana ako mobiyahe nga dul-an og usa ka oras ngadto sa templo aron sa paghulip sa akong turno. Dugang pa, kaduha sa usa ka semana ang akong asawa usab mobiyahe og usa ka oras, alang sa pagserbisyo isip temple worker ug ang lain alang sa pagtambong sa klase sa institute sa Basahon ni Mormon uban nako.
Samtang akong buhaton kining dugang nga mga pasalig, naklaro nako nga kinahanglan nga akong kuhaan og pipila ka mga oras ang akong trabaho kada semana. Tungod kay nagtrabaho ako sa sales, gibayran ako kon pila ka buok mga kliyente ang akong ma-mentinar. Akong naamgohan nga ang pagpaminos sa akong oras sa pagtrabaho, mag-atubang usab ako og igo-igong pagminos sa akong suweldo. Hinoon, nahinumdom ako sa impresyon nga akong nadawat, ug nasayud ako nga ang tanan mamaayo ra kon ako mopasalig sa hingpit sa pagsunod sa Ginoo.
Samtang ako nagtambong sa institute ug sa templo kanunay, daghang mga panalangin ang nagsugod sa pag-abut sa akong kinabuhi. Nakamatikod ako og talagsaong mga kausaban. Akong gibati nga duol ang Espiritu ug mas kanunay, ug ang akong pagpamatuod sa gipahiuli nga ebanghelyo mitubo. Ang akong asawa ug ako nakadawat og daghang kaayohan tungod sa pagserbisyo sa templo ug sa pagtambong sa among klase sa institute. Ug wala damha, nakadawat usab ako og temporal nga mga panalangin. Tungod niini, bisan pa sa pagminos sa akong oras sa pagtrabaho, mas daghang mga kliyente ang akong nakit-an kay sa kaniadto. Ang akong kinitaan wala mokunhod; gani, hapit madoble.
Nasayud ako nga kining talagsaon nga mga panalangin nagagikan sa Ginoo. Mapasalamaton ako nga gihatagan Niya ako og kahupayan nga masayud nga kon kita “mangita … og una sa gingharian sa Dios ug sa iyang pagkamatarung, … kining tanan nga mga butang idugang nganha kaninyo” (3 Nephi 13:33).
Paghulagway pinaagi ni Scott Greer