“Maingon nga Ako Nahigugma Kaninyo”

Ni Barbara Thompson

Ikaduhang Magtatambag sa Kinatibuk-ang Kapangulohan sa Relief Society

Paghigugma ug Pagserbisyo mao ang atong timailhan isip mga disipulo ni Kristo.

Kaniadto duna koy kauban sa kwarto kinsa usa ka matahum nga babaye, apan hapit tanang butang nga akong gihimo kaniya daw nakasamok kaniya. Akong gihunahuna, “Sa unsa nga paagi posible nga nakasamok ako kaniya? Sayon ra man unta ko nga ikauban. Dili ba?”

Tungod kay dili kaayo siya ganahan nako, gigamit nako kana nga rason sa dili usab paghigugma kaniya. Maayo gani kay, akong nahinumduman ang tambag nga gihatag sa usa ka bishop atol sa miting sa sakrament samtang didto pa ako sa kolehiyo. Klaro kaayo nakong nahinumduman ang iyang tambag: “Kon wala ikaw mahigugma og maayo sa usa ka tawo, tingali dili paigo ang imong pagserbisyo nianang tawhana. Kon ikaw magserbisyo sa usa ka tawo, imong higugmaon kanang tawhana.”

Human makahunahuna mahitungod sa tambag sa akong bishop, midesisyon ako nga kinahanglang moserbisyo ako niini nga kauban ug sulayan ang tambag sa bishop. Gisugdan ko ang pagpangita og gamayng mga paagi aron pagtabang sa akong kauban sa kwarto, nagpakita og kalooy kaniya, ug nahimong mas andam nga motubag sa iyang panginahanglan.

Diha-diha dayon usa ka milagro ang nahitabo! Akong nasayran nga tinuod gayud nga siya akong gihigugma. Siya usa ka talagsaon, may talento nga pagkatawo. Usa kini ka panalangin kanako nga nakigbahin og apartment uban kaniya. Nahibulong ako nga ang akong pagtan-aw kaniya nausab sa ingon niana ka mubo nga panahon.

Paghigugma ug Pagserbisyo sa Uban

Kon atong susihon ang Juan 13, atong makat-unan ang pipila sa labing mahinungdanong mga leksyon nga gitudlo sa Manluluwas atol sa Iyang unang pagpangalagad, lakip ang:

Pagserbisyo sa usag usa.
Paghigugma sa usag usa.

Samtang ang Manluluwas ug ang Iyang mga Apostoles nagtagbo aron sa pagsaulog sa panihapon sa Pagpalabay, ang palibut sa kwarto hilum. Ang Manluluwas nasayud nga siya hapit na isakripisyo ug ilansang. Sigurado ako nga bisan kon ang mga Apostoles wala dayon makasabut sa kamahinungdanon sa mga panghitabo nianang gabhiuna, sila makakat-on sa dili madugay ug labaw pa nga makasabut sa hingpit sa misyon sa Manluluwas.

Human sa panihapon si Jesus mikuha og tualya, mibu-bo og tubig sa planggana, ug gihugasan ang mga tiil sa matag tawo nga diha. Ang paghugas sa mga tiil gihimo diha sa balaan nga pagtahud ug pagka-mapainubsanon samtang ang Manluluwas sa walay pagduha-duha gilibutan sa mga pagbati sa kasubo alang sa mga panghitabo nga hapit na matuman, lakip ang nagkaduol nga pagbudhi Kaniya.

Si Pedro, nasayud nga si Jesus mao ang Mesiyas ug gisaad nga Manluluwas, gusto nga moserbisyo sa Ginoo kaysa ang Ginoo ang moserbisyo Kaniya. “Kon dili ka pahugas kanako,” ang Manluluwas miingon, “nan wala ikaw ing bahin kanako” (Juan 13:8). Dayon si Pedro andam nga misugot sa mahigugmaong serbisyo sa Manluluwas.

Pagkahuman niana si Jesus mipasabut:

“Nagatawag kamo kanako nga Magtutudlo ug Ginoo: ug husto kamo; kay mao man kana ako.

“Ug kon ako nga inyong Ginoo ug Magtutudlo nanghugas man gani sa inyong mga tiil; nan, kamo usab kinahanglan maghinugasay sa inyong mga tiil, ang usa sa usa.

“Kay usa ka panig-ingnan ang akong gihatag kaninyo, aron nga kamo usab kinahanglan magabuhat sama sa akong gibuhat kaninyo” (Juan 13:13–15).

Si Jesus gusto sa Napulog Duha—ug Siya gusto sa matag usa kanato—nga makat-on nga ang pagkamapainubsanon ug pagserbisyo mao ang takus nga mga kinaiya nga kinahanglang tinguhaon natong maangkon. Siya nagtudlo nga walay usa nga importante kaayo sa pagserbisyo sa uban. Sa pagkatinuod, usa sa mga butang nga nakahimo kanato nga mahinungdanon mao ang atong pagkaandam nga moserbisyo ug mohatag sa atong mga kaugalingon. Sama sa gisulti sa Manluluwas, “Ang labing dako kaninyo ma-inyo siyang sulugoon” (Mateo 23:11; tan-awa usab sa Lucas 22:26).

Pagsunod sa Ehemplo sa Manluluwas

Kini nagpahinumdom sa serbisyo nga gipahigayon human sa pipila ka kinaiyanhon nga mga katalagman nga nahitabo sulod sa nanglabay nga mga bulan ug mga katuigan. Atong nasaksihan ang mga bagyo, mga linog, mga kagutom, ug nagdagsang nga mga sakit. Adunay daghang dili maihap nga asoy sa mga tawo, bisan tuod nag-antus sa ilang mga kaugalingon, kinsa miatiman sa uban nga nasamaran, nasakit, o sa laing bahin nanginahanglan.

Human ang linog sa Peru milaglag sa liboan ka mga panimalay, gibiyaan sa usa ka bishop ang nagun-ob niyang balay ug nagdali pag-adto aron susihon ang kahimtang sa mga miyembro sa iyang ward ug sa pagpanalangin ug paghupay sa iyang gamay nga panon.

Samtang ang usa ka inahan didto sa Haiti nagbangutan sa pagkawala sa iyang kaugalingong mga sakop sa pamilya human sa linog, sa gihapon siya nakahimo sa pagduol aron motabang sa pagpakalma sa mga kahadlok ug sa paghupay sa masulub-on nga mga kasingkasing sa uban, naglig-on sa mga nakalahutay ug nagtabang kanila sa pagpangita og pagkaon ug kapasilongan.

Ang mga young adult sa Chile nagdali-dali sa pagtabang sa pagpang-apud-apod sa pagkaon ug mga sangkap ngadto niadtong kinsa naapektuhan og maayo sa linog didto. Samtang kini nga mga miyembro nagserbisyo, ang ilang malipayong mga panagway ug matinabangon nga mga kamot naglimud sa kamatuoran nga ang ilang kaugalingong personal nga mga kahimtang namiligro usab.

Kining tanang mga tawo ug kadaghanan pa misunod sa pangamuyo sa Manluluwas nga “magabuhat sama sa akong gibuhat kaninyo” (Juan 13:15). Sa kaulahian sa Juan kapitulo 13 atong mabasa:

“Ako magahatag kaninyog bag-ong sugo, Nga kinahanglan maghigugmaay kamo ang usa sa usa; maingon nga Ako nahigugma kaninyo, kinahanglan maghigugmaay usab kamo ang usa sa usa.

“Ang tanang tawo makaila nga kamo mga tinun-an ko, kon kamo maghigugmaay sa usag usa” (Juan 13:35).

Nakamatikud ba kamo kon unsa ka sagad ang mga lider sa Simbahan —gikan ni Presidente Thomas S. Monson ngadto sa Napulog Duha ka mga Apostoles ngadto sa lokal nga mga kapangulohan, mga bishopric, ug mga magtutudlo—magpahayag og gugma alang niadtong ilang giserbisyohan? Kini nga gugma miabut tungod sa pagsunod sa ehemplo sa Manluluwas.

Ang pagserbisyo sa uban mao ang paagi sa atong pagpakita og gugma alang kanila. Tingali ang paghigugma ug pagserbisyo usa ra ug managsama. Sa pagkatinuod, kini ang timailhan kanato isip mga disipulo ni Kristo.

Detalye gikan sa Suffer Little Children to Come unto Me, ni Carl Heinrich Bloch, sa maayong kabubut-on sa National Historic Museum at Frederiksborg in Hillerød, Denmark