Ang Simbahan supak ba sa tanang mga video game o sa mga bayolente nga matang sa dula lamang?

Adunay daghang mga video game nga limpyo, mahagiton, ug makalingaw, ug ang pipila nga mga multiplayer nga dula mahimong makalingaw nga sosyal nga kalihokan. Ang Simbahan dili supak sa mga video game, apan ang mga batan-on giawhag nga maalamon sa ilang pagpili sa mga dula ug sa gidugayon sa panahon nga ilang gigahin niini. Kita gisugo sa paggamit sa atong panahon sa maalamon nga paagi (tan-awa sa D&P 60:13). Tungod kay ang usa ka butang limpyo ug makalingaw wala magpasabut nga angayan kining buhaton.

Si Elder M. Russell Ballard sa Korum sa Napulog Duha ka mga Apostoles mipasabut: “Usa sa mga paagi ni Satanas … sa pagpaluya sa inyong espirituhanong kalig-on mao ang pag-awhag kaninyo sa paggahin og dakong bahin sa inyong panahon sa pagbuhat og mga butang nga walay hinungdan. Namulong ako sa ingon nga mga butang sama sa pagpadayon og tan-aw sa telebisyon o mga video, pagdula og mga video game sa tibuok gabii, matag gabii, [o] pag-surf sa Internet” (“Be Strong in the Lord,” Ensign, Hulyo 2004, 13).

Walay problema ang paggahin og pipila sa inyong panahon sa pagdula og mga video game nga nagsunod sa mga sumbanan sa media nga makita diha sa Alang sa Kalig-on sa mga Kabatan-onan. Apan kinahanglan nga andam ka sa pagpahunong sa mga controller o sa pagpalong sa computer ug mohimo sa laing buluhaton. Ayaw itugot nga ang mga video game mopugong kaninyo sa mga mapuslanon nga mga kalihokan sama sa pag-ehersisyo, pagtuon sa ebanghelyo, paghimo sa buluhaton sa eskwelahan, o paggahin og panahon uban sa inyong pamilya.