Naggiya KaninyoPauli

Ni Presidente Henry B. Eyring

Unang Magtatambag sa Unang Kapangulohan

Gikan sa Abril 1994 nga pakigpulong sa kinatibuk-ang komperensya.

Ang atong mahigugmaon nga Langitnong Amahan gusto nga ang tanan Niyang espiritu nga mga anak makapauli ngadto Kaniya pag-usab. Gipadala Niya ang Iyang Anak, si Jesukristo, aron sa paghimo og luwas nga agianan. Siya mibutang usab og mga giya ug mga tigluwas aron sa pagtabang sa Iyang mga anak diha sa dalan. Mga ginikanan, mga igsoon nga lalaki ug babaye, mga apohan, mga iyaan ug mga uyoan mga gamhanan kaayo nga mga tiggiya ug tigluwas.

Ang mga primary worker nagtabang usab sa paggiya sa mga bata. Usa ka babaye, sa dihang mas batan-on pa, anaa sa Primary general board nga mitabang sa pagmugna sa CTR motto. Siya nagtudlo sa Primary sa iyang ward hangtud nga hapit na siya mag-edad og 90 anyos. Ang gagmayng mga bata makabatyag sa iyang gugma alang kanila. Labaw sa tanan, tungod sa iyang ehemplo nakakat-on sila sa pagbati ug sa pag-ila sa Espiritu Santo.

Usa ka hapon niana ang akong asawa midala sa among kinamagulangan nga lalaki sa panimalay sa usa ka babaye nga mitudlo kaniya sa pagbasa. Ako ang mokuha niya inig pauli nako gikan sa trabaho.

Ang iyang leksyon nahuman og sayo-sayo kay sa among gituohan. Gibati niya ang pagsalig nga nakatultol siya sa dalan sa pagpauli. Busa misugod siya sa paglakaw. Sa dihang nakalakaw na siya og mga katunga sa usa ka milya (0.8 km), misugod na og ngitngit. Layo pa kaayo siya sa balay.

Ang mga suga sa mga sakyanan nga moagi kaniya nahanap tungod sa iyang mga luha. Iyang naamguhan nga nagkinahanglan siya og tabang. Busa mitipas siya sa dalan ug nakakita og dapit nga kaludhan.

Diha sa balilihan iyang nadungog ang mga tingog nga nagpaingon kaniya. Duha ka mga batan-on ang nakadungog kaniya nga naghilak. Miingon sila, “Makatabang ba kami kanimo?” Misulti siya kanila nga siya nasaag ug gusto niya nga makapauli. Nangutana sila kon kahibalo ba siya sa numero sa telepono sa balay o address. Wala siya kahibalo. Gidala nila siya didto duol sa dapit nga ilang gipuy-an. Ilang nakit-an ang among apelyido sa usa ka phone book.

Sa pagkadawat nako sa tawag, nagdali-dali ko aron sa pagluwas, mapasalamaton nga ang buotan nga mga tawo gibutang diha sa iyang pagpauli. Ug mapasalamaton gayud ako nga siya gitudloan sa pag-ampo inubanan sa hugot nga pagtuo nga ang tabang moabut sa dihang siya nahisalaag.

Ako mopamatuod nga ang Ginoo naghigugma kaninyo ug sa matag anak sa Dios. Samtang kamo mosunod sa dinasig nga direksyon niini, ang tinuod nga Simbahan ni Jesukristo, makabalik kamo sa atong mga panimalay uban sa Langitnong Amahan ug sa Manluluwas. ◼

Kinsa ang Inyong mga Tiggiya?

Si Presidente Eyring miingon nga ang Langitnong Amahan mibutang og mga tiggiya ug mga tigluwas sa yuta aron sa pagtabang sa mga anak nga makabalik kaniya. Mahimo kamong mag-drawing og litrato sa pipila sa mga tawo nga gihatag sa Langitnong Amahan aron sa paggiya kaninyo. O mahimo kamong mosulat og mubo nga sulat aron sa pagpasalamat sa usa niining mga tawo alang sa usa ka butang nga ilang gibuhat sa pagtabang kaninyo.

Usa ka ginikanan o sakop sa pamilya.

Usa ka magtutudlo.

Usa ka lider sa simbahan o ubang miyembro sa Simbahan.

Giya sa CTR

Si Presidente Eyring nagsaysay kabahin sa usa ka magtutudlo sa Primary kinsa mitabang sa pagmugna sa CTR motto: Pilia ang Matarung. Kini nga motto nakatabang sa paggiya sa mga bata sa paghimo og maayo nga mga pagpili sulod sa daghang katuigan. Ang singsing nga gipakita dinhi anaa sa German, Finnish, English, French, ug Italian.

Mga paghulagway pinaagi ni Jennifer Tolman; gilitratohan ni Robert Casey