Hangtud Kita Magkita Pag-usab
Sagbut Kana Karong Tuiga—Ibta Kana
Sa dihang nagtubo pa ako didto sa Lehi, Utah, USA, ang akong pamilya adunay tanaman nga may igong gidak-on nga among gipuli-puli ang mais ug patatas matag tuig. Usa ka adlaw ang akong amahan misulti kanako nga paibtan og sagbut ang mais samtang siya mangibut og sagbut sa mga patatas. Samtang nangibut ako paingon sa naglumbay nga unom ka pulgada ang gitas-on (15 cm) nga mais, akong nakit-an ang nagbinugtong nga tanom nga patatas nga nag-anam ka dako ang pagtubo ug mas maanindot kaysa bisan unsang tanom nga patatas sa dapit ni Papa diha sa tanaman. Siya akong gitawag ug nangutana, “Unsay akong buhaton niini?”
Si Papa wala kaayo motan-aw. “Ibta kana.”
Nagtuo nga wala siya makamatikud nga nagtudlo ako sa tanom nga patatas, misupak ako, “Apan Pa, dili kini sagbut. Patatas kini.” Sa gihapon, sa walay pagtan-aw, siya miingon, “Dili karong tuiga. Sagbut kana karong tuiga. Ibta kana.” Busa akong giibut.
Sukad niadto kanunay akong mamalandong sa kaalam sa mga pulong sa akong amahan. Akong naamgohan nga ang pagkamasulundon dili lamang ang paghimo og husto nga pagpili kondili ang paghimo og husto nga pagpili diha sa husto nga panahon. Kon akong ikonsiderar ang tanang mga butang nga ipabuhat kanako sa Langitnong Amahan niining kinabuhia, ang pagbuhat niini sa husto nga panahon daw sama kalisud sa pagbuhat sa tanan. Sama pananglit, ang pagmisyon, pakig-date, pagminyo, pagbaton og mga anak, pag-angkon og edukasyon, ug ang pagsugod og permanente nga trabaho mao ang husto nga pagpili. Bisan pa niana kon buhaton sa mga tawo kining maayo nga mga butang sa sayop nga pagkahan-ay, ang mga sangputanan sa kasagaran makadaot.
Si Haring Benjamin nagtudlo nga kinahanglan natong “tan-awon ang tanan niini nga … mga butang mahimo diha sa kaalam ug kahusay” (Mosiah 4:27). Si Elder Neal A. Maxwell (1926–2004) sa Korum sa Napulog Duha ka mga Apostoles nagtudlo, “Ang hugot nga pagtuo naglakip usab sa pagsalig sa panahon sa Dios, tungod kay Siya miingon, ‘Ang tanan nga mga butang kinahanglan gayud mahinabo diha sa ilang panahon’ (D&P 64:32).”1
Ako nagtuo nga linglahon kita ni Satanas pinaagi sa pagdani kanato sa pagbuhat sa husto nga mga butang diha sa sayop nga pagkahan-ay: sekswal nga pagkasuod sa dili pa ang kaminyoon, pakig-date sa dili pa mag-edad og 16, mahimong usa ka ginikanan ug dayon maminyo, ug uban pa. Ang labing mahinungdanon nga mga sugo sa Dios, kon mapauyon-uyon o mahugawan, mahimong mga tanom nga motubo nga wala sa panahon—nga mga sagbut. Kon ako matintal sa pagpangatarungan sa pagbuhat sa husto nga butang diha sa sayop nga panahon, nahimo akong mapasalamaton tungod sa importante nga leksyon sa akong amahan: “Dili karong tuiga. Sagbut kana karong tuiga. Ibta kana.”
Litrato © Digital Vision