Nganong kinahanglan man nato nga kompletong maunlod sa tubig kon kita bunyagan?

Mahimong nakatambong kamo og bunyag diin ang tawo nga gibunyagan kinahanglang usbon sa pagbunyag tungod kay wala makompleto ang pag-unlod kaniya sa tubig sa unang higayon. Tungod kay ang bunyag usa ka makaluwas nga ordinansa, kinahanglan kaayo nga kini ipahigayon nga tukma ug husto.

Ang bunyag usa ka buhat nga may simbolo. Kini “nagsimbolo sa kamatayon, paglubong, ug pagkabanhaw, ug himoon lamang pinaagi sa pagpaunlod” (Bible Dictionary, “Baptism”). Ang pagpaunlod sa tubig nagrepresentar sa kamatayon ug paglubong ni Jesukristo, apan kini nagrepresentar usab sa kamatayon sa atong natural nga kaugalingon (tan-awa sa Mga Taga-Roma 6:3–6). Ang pagpabangon gikan sa tubig mao ang simbolo sa Pagkabanhaw ni Jesukristo ug nagrepresentar sa pagkatawo og usab isip Iyang mga disipulo sa pakigsaad. Ang duha ka saksi kinsa nagbarug sa kilid sa baptismal font magtan-aw aron sa pagsiguro nga ang tawo nga gibunyagan kompletong maunlod, simbolo nga kompletong matawo pag-usab.

Sa dihang kita gibunyagan, kita nagsunod sa sumbanan nga gipakita sa Manluluwas, kinsa nabunyagan pinaagi sa pagpaunlod sa suba sa Jordan (tan-awa sa Mateo 3:13–17). Ang Langitnong Amahan nagtinguha nga ang matag usa sa Iyang mga anak malimpyuhan sa ilang mga sala aron sila mahimong mopuyo uban Kaniya. Ang pagpabunyag pinaagi sa pagpaunlod, sama kang Kristo, mahinungdanon nga bahin sa Iyang balaanong plano.