Nagtinabangay sa Usag Usa didto sa India
Sa dihang ang kusog kaayo nga mga unos ug mga bagyo milaglag sa habagatang India niadtong Oktubre 2009, ang batan-ong mga lalaki ug mga young adult gikan sa mga District sa Hyderabad ug Bangalore India nanglihok dayon aron makatabang sa pagpagaan sa mga pag-antus niadtong naapektuhan sa mga baha.
Sumala ni Presidente Prasada Gudey sa District sa Hyderabad India, “Ang among batan-ong mga lalaki mihimo og talagsaon nga buhat sa paghatud sa mga pagkaon ug tubig niadtong nanginahanglan. Ang mga sangkap nadonar na ug miabut didto sa probinsya, apan ang gobyerno wala makahatud niini ngadto sa kaliboan nga mga biktima sa kapin pa sa 200 ka mga dangpanan nga mga kampo. Ang among mga miyembro nanggawas nga nagsul-ob sa ilang tsaliko nga Mormon Helping Hands samtang ilang gipahigayon ang ilang hapsay kaayo nga trabaho sa paghatud sa pagkaon ug tubig ngadto sa matag usa.”
Pipila sa batan-ong mga lalaki ug mga young adult kinsa miserbisyo mikomentaryo kon unsa ka makalingaw ug makatagbaw ang mahimo sa pagserbisyo.
Sa ubos: Saysinta ka mga miyembro sa Simbahan mibiyahe ngadto sa dangpanan nga mga kampo sa amihanang Estado sa Karnataka. Sila mihatud og mga habol, mga luna, ug mga pakite sa panglimpyo sa lawas nga gipangolekta sa mga miyembro sa Simbahan. Usa ka batan-ong lalaki mipahayag, “Hilabihan ka talagsaon ang pagtabang uban niining flood relief project. Kanunay ako nga may tinguha sa pagtabang ug sa pagserbisyo sa uban. Mapasalamaton kaayo ko nga nakahimo sa pagserbisyo. Nakahilak ako samtang nagtan-aw niadtong mga tawo kinsa nawad-an sa tanan tungod sa baha. Usa kini ka dakong panalangin nga makahimo sa pagtabang sa katawhan sa akong nasud.”
Sa ibabaw: “Sa dihang gisultihan nako ang akong mga higala sa kolehiyo mahitungod sa proyekto sa pagserbisyo, nalipay sila kanako. Akong gipasabut kon unsa ang among gibuhat ug mipakigbahin sa mga baruganan sa Simbahan ngadto kanila. Akong gibati ang kaanindot sa dihang nagtabang ako sa mga tawo niana nga proyekto. Akong pasalamat sa organisasyon sa Simbahan sa paghatag kanamo og kahigayunan sa pagserbisyo.” —Deepak Sharma
Sa tuo “Akong gibati ang tumang kalipay nga nakabaton og kahigayunan sa pagserbisyo sa akong isigkatawo. Nakabaton ako og maanindot nga kasinatian, ug nakat-on ako og daghan kaayong mga butang pinaagi sa paghimo niini, ug sa samang higayon nalipay kami nga nagkahiusa uban sa mga higala nga nagputos og pagkaon ug mga sangkap nga gikinahanglan. Akong gibati ang gugma sa Manluluwas ug kalinaw samtang nagserbisyo sa uban.” —Venus Armstrong
“Malipayon kaayo ko nga nakatabang niini nga proyekto. Kini mihatag kanako og dakong kalipay nga masayud nga ako nagtabang sa pagserbisyo sa mga tawo kinsa anaa sa dakong panginahanglan. Ako nag-ampo nga ang mga tawo mapanalanginan.” —Vishali Nakka
Sa tuo: “Nindot kaayo ang bation nga magserbisyo sa flood relief project. Mitabang ako sa pagpamintal ug sa pag-apud-apod sa mga binugkos nga pagkaon. Usa kadto ka dakong panalangin nga maadto didto uban sa laing kaigsoonan sa priesthood ug nakahimo sa pagtabang ug sa pagserbisyo sa mga tawo kinsa anaa sa dakong panginahanglan.” —Avinash Thomas
Gilitratohan nila ni Charles ug Carol Kewish; dibuho ni Joseph Smith pinaagi ni Dan Weggeland, sa maayong kabubut-on sa Church History Museum