Adto sa Templo ug Angkuna ang Inyong mga Panalangin

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Mga sister, mas bulahan kita. Ang Manluluwas ang pangulo niini nga Simbahan. Kita gipangulohan og buhi nga mga propeta. Kita adunay balaan nga mga kasulatan. Ug kita adunay daghang balaan nga mga templo sa tibuok kalibutan diin atong madawat ang mga ordinansa nga gikinahanglan aron pagtabang nato nga makabalik ngadto sa atong Langitnong Amahan.

Mouna kita og adto sa templo alang sa atong mga kaugalingon. “Ang nag-unang katuyoan sa templo,” mipasabut si Elder Robert D. Hales sa Korum sa Napulog Duha ka mga Apostoles, “mao ang pagsangkap og mga ordinansa nga gikinahanglan sa atong kahimayaan sa celestial nga gingharian. Ang mga ordinansa sa templo mogiya kanato ngadto sa atong Manluluwas ug mohatag kanato sa mga panalangin nga moabut kanato pinaagi sa Pag-ula ni Jesukristo. Ang templo mao ang labing dako nga unibersidad sa pagkat-on nga nahibaloan sa tawo, naghatag kanato og kahibalo ug kaalam kabahin sa Paglalang sa kalibutan. Ang mga instruksyon sa endowment naghatag og giya kon unsaon nato sa pagpuyo sa atong mga kinabuhi dinhi sa pagkamortal. … Ang ordinansa naglangkob og sunod-sunod nga mga instruksyon kon unsaon nato sa pagkinabuhi ug sa mga pakigsaad nga atong pagahimoon aron magpuyo nga matarung pinaagi sa pagsunod sa Manluluwas.”¹

Apan ang atong serbisyo sa templo wala mahuman diha. Si Presidente Boyd K. Packer, Presidente sa Korum sa Napulog Duha ka mga Apostoles, nagtudlo: Sa pagbarug isip puli alang sa usa ka tawo kinsa namatay na, kamo makahinumdom pag-usab sa mga pakigsaad nga inyong gihimo. Masilsil gayud sa inyong hunahuna ang mahinungdanon nga espirituhanon nga mga panalangin nga may kalabutan diha sa balay sa Ginoo. … Sa mga pakigsaad ug mga ordinansa nasentro ang mga panalangin nga mahimo ninyong maangkon diha sa balaan nga templo.”²

Adto sa templo ug dayon mobalik. Ang paghimo ug pagtuman sa mga pakigsaad ngadto sa templo mopabilin kanato sa dalan paingon sa labing mahinungdanon sa tanang mga panalangin—ang kinabuhing dayon.

Barbara Thompson, ikaduha nga magtatambag sa kinatibuk-ang kapangulohan sa Relief Society.

Gikan sa mga Kasulatan

Isaias 2:3; 1 Mga Taga-Corinto 11:11; Pinadayag 7:13–15; Doktrina ug mga Pakigsaad 109

Gikan sa Atong Kasaysayan

Si Propeta Joseph kanunay nga makigsulti sa mga sister sa Relief Society sa ilang mga miting. Uban sa padayong pagtukod sa Templo sa Nauvoo, ang Propeta mitudlo sa mga sister sa doktrina, nag-andam kanila sa pagdawat og dugang pa nga kahibalo pinaagi sa mga ordinansa sa templo. Niadtong 1842 siya miingon ngadto ni Mercy Fielding Thompson nga ang endowment “maoy modala kanimo pagawas sa kangitngit ngadto sa talagsaon nga kahayag.”³

Gibanabana nga 6,000 ka mga Santos sa Ulahing mga adlaw ang nakadawat og mga ordinansa sa templo sa wala pa ang exodus gikan sa Nauvoo. Si Presidente Brigham Young (1801–77) miingon, “Kini mao ang tinguha nga gipakita sa mga Santos nga makadawat sa mga ordinansa [sa Templo], ug mao ang among tinguha sa pagpangalagad ngadto kanila, nga akong gigahin ang akong kaugalingon sa hingpit ngadto sa buhat sa Ginoo diha sa Templo gabii ug adlaw, nga dili gani matulog sobra sa upat ka oras, sa kasagaran, matag adlaw, ug mopauli makausa sa usa ka semana.”⁴ Ang kalig-on ug gahum sa mga pakigsaad didto sa templo mipalig-on sa mga Santos sa ilang pagbiya sa ilang siyudad ug sa templo alang sa ilang pagpanaw padulong ngadto sa dapit nga wala pa mahibaloi.

Paghulagway sa litrato pinaagi ni Athley Glori