Ang Atong Pinasidunggan nga Panulundon sa Pioneer
Matag usa kanato makakat-on gikan sa atong unang pioneer nga mga katigulangan, kansang mga panglimbasug ug mga kasakit giatubang pinaagi sa matinguhaon nga kaisug ug usa ka malungtaron nga hugot nga pagtuo sa usa ka buhi nga Dios.
Ang Pag-antus sa mga Pioneer
“Ang unang panaw niadtong 1847, giorganisar ug gidumala ni Brigham Young, gihulagway sa mga historian nga usa sa labing talagsaon nga walay paglubad nga kasaysayan sa Estados Unidos. Gatusan ka mga Mormon pioneer nag-antus ug namatay gikan sa sakit, tumang kainit o sa kabugnaw, o kagutom. Adunay pipila kinsa, nagkulang og mga karwahe ug mga kabayo, sa tinuoray milakaw og 1,300 ka milya [2,092 km] tabok sa mga kapatagan ug ngadto sa mga kabukiran, nagtulod ug nagguyod og mga karomata.”1
Makapadasig nga Hugot nga Pagtuo
“Matag usa kanato makakat-on gikan sa atong unang pioneer nga mga katigulangan, kansang mga panglimbasug ug mga kasakit giatubang pinaagi sa matinguhaon nga kaisug ug usa ka malungtaron nga hugot nga pagtuo sa usa ka buhi nga Dios. … Ang kabatan-onan ug kabataan kauban sa liboan nga nagguyod ug nagtulod sa karomata o milakaw subay nianang agianan sa mga pioneer, sama ra usab sila sa mga Santos karon kinsa mga pioneer sa ilang kaugalingong mga dapit sa tibuok kalibutan. Sa akong hunahuna walay miyembro niining Simbahan karon nga wala matandog sa mga asoy sa unang mga pioneer. Kadtong mihimo og dako alang sa kaayohan sa tanan sigurado gayud nga ang ilang tumong mao ang pagdasig og hugot nga pagtuo. Ilang nakab-ot ang ilang tumong sa usa ka hilabihan ka maanindot nga paagi.”2
Pag-atubang sa mga Kalisud
“Mga karaan na kaayo nga pahina sa usa ka abugon nga journal sa pioneer makapatandog nga misaysay ‘Miyukbo kami sa among kaugalingon sa usa ka mapainubsanon nga pag-ampo ngadto sa usa ka Gamhanan nga Dios uban sa kasingkasing nga puno sa pasalamat ngadto Kaniya, ug mipahinungod niiing yuta ngadto Kaniya aron mahimong dapit nga kapuy-an sa Iyang mga katawhan.’
“Ang yano nga mga balay gihulagway niining paagi sa usa ka tawo kinsa anaa didto sa dihang usa pa ka bata nga lalaki: ‘Walay bintana sa bisan unsa nga matang sa among balay. Ni usa ka pultahan. Ang akong inahan mibitay og daan nga hapin sa higdaanan, nga magsilbing pultahan sa unang tingtugnaw. Kini mao ang among higdaanan, among parlor, among sala, among kusina, among katulganan, ang tanan anaa niini nga kwarto nga mga 12 por 16 ka pye [3.6 por 4.9 ka metros]. Giunsa namo nga makapaigo niini wala ko masayud. Nahinumduman nako ang akong pinalanggang inahan miingon nga walay rayna nga mas malipayon diha sa iyang palasyo o mapasigarbuhon sa kapasilungan ug sa mga panalangin sa Ginoo kay kaniya kon siya mosulod nianang nahuman nga payag.’
“Ang ingon mao ang mga pagsulay, kalisud, panlimbasug, ug mga kasubo kaniadto. Kini giatubang og matinguhaon nga kaisug ug usa ka malungtaron nga hugot nga pagtuo sa usa ka buhi nga Dios.3
Mga Pioneer Karon
“Among gipasidunggan kadtong milahutay og hilabihan nga mga kalisud. Among gidayeg ang ilang mga ngalan ug namalandong sa ilang mga sakripisyo.
“Unsa kaha sa atong panahon? Aduna bay mga kasinatian sama sa pioneer alang kanato? Ang mga henerasyon sa umaabot mamalandong ba kaha uban sa pasalamat sa atong mga paningkamot, atong mga ehemplo? Kamo mga batan-on [nga mga tawo] sa tinuoray mahimong mga pioneer sa kaisug, sa hugot nga pagtuo, sa gugma nga putli, sa determinasyon.
“Makapalig-on kamo sa usag usa; kamo adunay kapasidad nga motagad niadtong wala matagad. Kon kamo adunay mga mata nga makakita, mga dunggan nga makadungog, ug mga kasingkasing nga mobati, kamo makatabang ug makaluwas sa uban sa susama ninyo og edad.”4
Ang Pinakabantugan nga Pioneer
“Sa paghunahuna sa tibuok kasaysayan nga nahisulat sa mga kasulatan, atong makat-unan ang pinakabantugan nga pioneer—nga mao si Jesukristo. Ang iyang pagkahimugso gipanagna sa mga propeta sa karaan; ang Iyang pagkatawo gipahibalo sa usa ka anghel. Ang Iyang kinabuhi ug ang Iyang pangalagad nakapausab sa kalibutan. …
“Usa ka han-ay sa mga pulong gikan sa basahon sa Mga Buhat naghisgot og daghan: Si Jesus ‘nagpadayon sa paghimo og kaayohan … kay ang Dios uban man kaniya’ (Mga Buhat 10:38). …
“Ang Iyang misyon, ang Iyang pangalagad sa mga tawo, ang Iyang mga pagtulun-an sa kamatuoran, ang Iyang mga buhat sa kalooy, ang Iyang walay pagkausab nga gugma alang kanato makapaagni sa atong pasalamat ug modasig sa atong mga kasingkasing. Si Jesukristo, ang Manluluwas sa kalibutan—gani ang Anak sa Dios—mao ang labing gamhanan nga pioneer, kay Siya nag-una na kaniadto, nagpakita sa tanan sa paagi nga sundon. Hinaut nga kita kanunay nga mosunod Kaniya.”5
Gikan sa ibabaw: mga paghulagway sa litrato pinaagi ni Matthew Reier, John Luke, ug sa maayong kabubut-on sa Sandy Utah Willow Creek Stake; Giatupan nga mga Karwahe, ni Minverva Teichert, sa maayong kabubut-on sa Church History Museum