Ang Espiritu Santo ang gituohan nga mahimo natong makanunayon nga kauban, apan wala ako masayud nga bation nako kanunay ang Espiritu. May butang ba nga sayop kanako?

Kon kamo takus apan wala mobati sa Espiritu sa tanang higayon, mahimong nagpasabut kini nga nagkat-on gihapon kamo sa pag-ila ug sa pagsunod sa giya sa Maghuhupay. Si Elder David A. Bednar sa Korum sa Napulog Duha ka mga Apostoles mipasabut, “Bisan pa kon maningkamot kitang magmatinud-anon ug magmasulundon, naa ra gyuy mga panahon nga ang direksyon, kasiguroan, ug kalinaw sa Espiritu dili diha-diha dayon nga mamatikdan sa atong mga kinabuhi” (“Nga Kita Unta Kanunay Makabaton sa Espiritu uban Kanato,” Liahona, Mayo 2006, 29).

Kon wala kamo mahibalo nga ang Espiritu Santo nag-uban kaninyo, gahini og higayon sa paghunong ug sa pagpaminaw. Mahimong bation ninyo ang impluwensya sa Espiritu isip usa ka hilum, malinawon nga pagpasalig. Sulayi ang pag-ila sa ligdong, hinay nga tingog kon kamo nagbuhat og mga butang nga nagdapit sa Espiritu, sama sa pag-ampo, pagtuon sa mga kasulatan, o pagtambong sa miting sa sakrament. Samtang kamo mobuhat sa mga pag-aghat ug magpraktis sa pagpaminaw sa Espiritu, ang inyong abilidad sa pag-ila niadtong hilum, dili masabut nga mga pagbati molambo.

Kinahanglan gayud nga magpuyo kamo nga takus aron ang Epiritu mag-uban kaninyo (tan-awa sa Mosiah 2:36). Kon dili ninyo bation ang impluwensya sa Espiritu sa inyong kinabuhi, mahimo nga kini usa ka timaan sa pagpasidaan nga kamo kinahanglan nga maghinulsol ug motimbang-timbang sa inyong mga prayoridad. Makadapit kamo sa Espiritu diha sa inyong kinabuhi uban sa sinsero nga paghinulsol, pag-ampo, pagtuon sa kasulatan, ug ubang makabayaw nga mga kalihokan.