Pagdala sa Primary ngadto sa Panimalay

Ang Templo Mao ang Balay sa Dios

Nila ni JoAnn Child ug Cristina Franco

“Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangturan” (“Ang Pamilya: Usa ka Pamahayag ngadto sa Kalibutan).

Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.

Unsa ang inyong bation kon kamo makakita og nindot kaayo nga templo? Kini ba nga mga pulong inyong mahinumduman: “Gusto kong makita ug moadto sa templo”?

Usahay kon ang mga bata mokanta sa “Gusto Ko nga Makita ang Templo,”¹ ilang tinguha nga moadto sa templo inig-abut sa adlaw, apan wala sila makasabut nganong adunay mga templo, unsa may mahitabo sulod sa templo, o unsa ang angay nilang buhaton aron makasulod. Magkat-on pa kita og daghan kabahin sa templo.

Nganong adunay mga templo?

Ang Ginoo miingon, “Magtukod og balay ngadto sa akong ngalan, alang sa Labing Halangdon sa pagpuyo diha niini” (D&P 124:27). Ang Espiritu sa Ginoo maanaa sa Iyang mga templo. Ang templo mao ang balay sa Dios. Kini mao ang dapit diin kita mohimo og mga pakigsaad (o mga saad) uban sa Amahan sa Langit. Kon atong huptan ang atong mga pakigsaad, kita makapuyo pag-usab uban Kaniya.

Unsay mahitabo sulod sa templo?

Ang tanan kinahanglan nga mabunyagan aron makabalik ngadto sa Langitnong Amahan. Daghang mga anak sa Langitnong Amahan ang namatay nga wala mabunyagi. Inig 12 anyos ninyo, kamo makapabunyag diha sa templo alang niadtong mga tawo aron sila makaangkon sa sama nga mga panalangin.

Sulod sa templo madawat usab nato ang endownment, o gasa. Kini nga gasa mao ang saad nga kon kita mosunod sa mga sugo, kita makaangkon og kinabuhing dayon.

Sa templo ang bana ug asawa mahimong ma-sealed isip usa ka pamilya alang karon ug hangtud sa kahangturan. Kana nagpasabut nga kon sila magpabiling takus, sila maminyo hangtud sa kahangturan ug ikauban ang ilang mga anak isip mahangturong pamilya.

Ang tanan nga gibuhat diha sa templo pagabuhaton pinaagi sa priesthood, o awtoridad, sa Dios.

Unsaon nako sa pag-andam sa pagsulod inig-abut sa adlaw?

Aron makasulod sa templo, kinahanglan nga kamo dili moubus sa 12 anyos. Kinahanglan nga kamo nabunyagan ug nakumpirmahan. Kinahanglan nga kamo nagatuo sa Langitnong Amahan ug sa Iyang Anak, si Jesukristo. Kinahanglan nga kamo nagtuo sa Ang Simbahan ni Jesukristo sa mga Santos sa Ulahing mga Adlaw. Kinahanglan nga kamo nagsunod sa mga sugo sa Langitnong Amahan. Ang inyong bishop o presidente sa branch mointerbyu kaninyo aron sa pagsigurado nga kamo takus nga mosulod sa templo, ug kamo makadawat og rekomend sa templo nga ipakita didto sa templo. Ang pagbaton og rekomend nagpasabut nga kamo nagpuyo sa paagi nga kamo makasulod.

Kon kamo magpabilin sa dalan nga modala kaninyo sa templo, kamo mas andam nga moadto aron ang “Espiritu mabati, maminaw ug mag-ampo. Kay ang templo balay man sa Dios, may katahum ug gugma.”²

Mubo nga mga sulat

1. “Gusto Ko nga Makita ang Templo,” Songbook sa mga Bata, 99.

2. “Gusto Ko nga Makita ang Templo,” 99.

Kalihokan

Tan-awa ang duha ka mga litrato. Asa nga pamilya ang andam nga moadto sa open house sa templo? (1) Sa unang litrato, lingini ang mga butang nga nakatabang sa pamilya sa pag-andam sa pagbisita sa templo. (2) Sa lain nga litrato, lingini ang mga butang nga kinahanglang usbon sa pamilya aron mahimong andam nga moadto. (3) Paghunahuna og duha ka butang nga inyong mahimong buhaton aron andam nga moadto sa templo inig ka dako ninyo. Isulat kadtong mga butanga ubos sa mga litrato.

Usa ka butang nga akong himoon sa pag-andam sa pag-adto sa templo mao ang ____________________________ .

Usa ka butang nga akong himoon sa pag-andam sa pag-adto sa templo mao ang ____________________________ .

Litrato sa Templo sa Bern Switzerland pinaagi ni Chris Wills; mga paghulagway pinaagi ni Adam Koford