Ang Akong mga Adlaw sa pagka-Pioneer sa Calgary

Lorraine Gilmour, Ontario, Canada

Natawo ako sa usa ka gamay nga lungsod sa amihanang England niadtong 1947. Sa dihang 15 anyos pa ko, gipaila-ila ko sa mga misyonaryo pinaagi sa mga higala, ug nagpamiyembro ko sa Simbahan. Ang akong pamilya, hinoon, wala magpamiyembro.

Sa dihang nakakat-on ko kabahin sa mga unang pioneer sa Simbahan, mibati ko nga daw gilimbungan nga wala makabaton og panulundon nga mga katigulangan kinsa mitabok sa mga kapatagan. Apan samtang naglambo ko sa ebanghelyo, ang akong mga pagbati nausab.

Nakasabut ko nga ang una nga mga pioneer miandam sa agianan sa mga tawo sama nako aron mamiyembro sa Simbahan. Ang duha ka misyonaryo kinsa mipaila-ila kanako sa ebanghelyo mga kaliwat niadtong mga pioneer, mao nga dako ako og utang kabubut-on ngadto sa mga pioneer. Mibati ko nga nasumpay kanila sa usa ka espesyal nga paagi.

Nakaamgo usab ko nga ako adunay panulundon nga pagkamanggihatagon, kugihan nga mga tawo kinsa misakripisyo, mitrabaho, ug gani nakiggubat aron ako makabaton og mga butang nga wala nila maangkon ug sa paghatag kanako sa kagawasan nga akong natagamtam karon. Ang akong mga ginikanan wala magpamiyembro sa Simbahan, apan ilaha kong gipadako uban sa maayong mga mithi ug mga baruganan nga nakaandam kanako sa pagdawat sa ebanghelyo.

Sa katapusan, nahibaloan nako nga adunay daghang matang sa mga pioneer. Ako ang unang henerasyon nga miyembro sa Simbahan sa akong kaliwatan. Ang akong pamilya wala malipay sa akong desisyon nga magpabunyag, nga nakapalisud kanako sa pagtambong sa akong mga miting. Ang among gamay nga branch naglisud tungod sa kakulang og mga miyembro, ilabi na sa mga tighupot sa priesthood. Sa kadugayan naklaro nga isira kini sa mission.

Isip resulta, mihukom ko nga mobalhin sa Canada, nga mao ang usa sa labing lisud nga mga desisyon nga akong gibuhat. Ako bugtong nga anak ug gihigugma nako ang akong mga ginikanan pag-ayo, sama sa ilang paghigugma kanako, apan ang akong pagpamatuod narisgo unta kon nagpabilin pa ko sa usa ka dapit diin dili ko makasimba. Nakahinumdom gihapon ko niadtong gabii sa akong pagbiya—ang akong amahan nagdagan kilid sa tren nagpalupad og mga halok padulong kanako samtang nagsud-ong ang akong mama. Nagsubo ko pag-ayo, apan nasayud ko nga kinahanglan kong mobiya.

Miabut ko sa Calgary, Alberta, atol sa Adlaw alang sa mga Inahan niadtong Mayo 1967. Misimba ko uban sa mga miyembro diin ko nagpuyo ug mihilak sa entiro nga miting. Nakahinumdom ko nga nagsulat ngadto sa akong mga ginikanan nga may luha nga nagdagayday sa akong mga aping, naghisgot kanila nga ganahan ko sa Canada apan gimingaw pag-ayo sa England ug sa akong pamilya.

Nanlimbasug ko sa pag-adjust sa akong bag-o nga kinabuhi, nag-antus sa kamingaw, nag-inusara, ug mga kasagmuyo, apan ako nagpabiling matinud-anon sa ebanghelyo. Mitambong ko sa tanan nakong mga miting ug midawat og mga calling. Kini mao ang akong mga adlaw sa pagka-pioneer.

Sa wala madugay nakaplagan nako ang akong bana. Kami na-sealed sa Templo sa Cardston Alberta ug mipasanay og tulo ka mga anak sa Simbahan.

Matag higayon nga mouli ko sa England, mapuno ko sa mga panumduman sa akong pagkakabig ug dili nako kapugngan nga magmapasalamaton sa akong mga panalangin. Asa kaha ko karon kon ako wala pay kaisug sa paghimo sa ingon kalisud nga pagpili ug pagsunod sa Espiritu?

Ako mahangturong mapasalamaton sa unang mga pioneer nga mga miyembro ug dili miyembro kinsa miandam sa agianan aron ako ug ang uban sama kanako makadungog sa ebanghelyo. Kadtong nag-una kanako naghatag kanako og oportunidad ug kaisug nga mahimong modernong pioneer.

Nakahinumdom gihapon ko niadtong gabii sa akong pagbiya—ang akong amahan nagdagan kilid sa tren nagpalupad og mga halok padulong kanako samtang nagsud-ong ang akong mama. Nagsubo ko pag-ayo, apan nasayud ko nga kinahanglan kong mobiya.