Sugdi sa Paglihok

Ni Elder Von G. Keetch

Area Seventy, Utah Salt Lake City Area

Ang pagpahulay diha sa tumoy sa bungtod mora og sigurado nga paagi sa paglikay nga makahimo og mga sayop, apan kini usa usab ka paagi sa paglikay sa kalamboan.

Usa ka istorya ang gisaysay kabahin sa usa ka grupo sa mga smoke jumper. Kining isug nga mga lalaki ug mga babaye mopalong sa sunog sa kalasangan pinaagi sa pag-parachute padulong sa dapit nga ibabaw sa kalayo ug palungon ang kalayo gikan sa ibabaw padulong sa ubos, samtang ang uban mopalong niini gikan sa ubos.

Atol sa usa ka dakong sunog sa kalasangan, usa ka team sa maayo kaayong mga smoke jumper nagpundok alang sa mubong pahibalo sa wala pa mosakay sa ilang eroplano. Ang dispatcher—usa ka maalamon ug sinati nga bombero—miingon sa mga smoke jumper nga ang sitwasyon dili gayud matagna ug dili siya makahatag og tukma nga mga instruksyon. Hinoon, ang dispatcher mihatag og instruksyon, nga kinahanglan nga ang mga smoke jumper mokontak kaniya pinaagi sa radyo kon sila naka-parachute na sa tumoy sa bungtod ibabaw sa kalayo. Dayon iya silang hatagan og mga instruksyon kabahin sa paagi nga ilang sundon aron sa pagsugod sa pagpalong.

Diha-diha dayon ang mga smoke jumper nangambak gikan sa eroplano, nag-parachute ngadto sa tumoy sa bungtod sa ibabaw sa baga kaayo nga kalayo, ug nagpundok para sa unsay buhaton. Samtang ilang nakita ang sunog gikan sa ibabaw, sila nakakita og pipila ka dalan nga posibleng kaagian.

Sa pagtuman sa ilang gikasabutan uban sa dispatcher, ang lider sa team mikuha sa radyo, nakuha ang ensaktong frequency, ug mitawag sa dispatcher aron sa pagpangayo og mga instruksyon kon asa nga dalan ang subayon. Apan static ra ang mogawas gikan sa radyo; dili gayud nila madunggan ang dispatcher.

Naghunahuna nga ang dispatcher nagkapuliki sa ubang mga buluhaton, ang mga smoke jumper mihukom nga magpaabut og 10 minutos ug mosulay pag-usab. Apan sa dihang sila misulay sa pagkontak sa dispatcher sa ikaduhang higayon, mao ra gihapon ang resulta—walay madungog ug static ug walay mga instruksyon.

Ang mga smoke jumper nagsabut sa usag usa. Nakakita gihapon sila og mga dalan ubos sa bukid nga makahatag kanila og maayong posisyon sa pagpalong sa sunog. Apan ang ilang gikabalak-an kay wala silay bisan unsa nga direksyon gikan sa dispatcher. Sila nabalaka nga kon sila magsugod sa paglugsong sa dalan nga sa ilang tan-aw mao ang labing maayo para kanila, tingali og sukwahi sa gusto sa dispatcher ang ilang padulngan ug sila mapugos sa pagbalik.

Busa sila mihukom sa pagpaabut sa tumoy sa bungtod. Mga kinse minutos ang milabay misulay sila sa pagkontak pag-usab sa dispatcher. Wala. Ilang gipangtang-tang ang ilang mga backpack ug nangita og lugar nga kalingkuran. Ang traynta minutos nahimong usa ka oras; ang usa ka oras nahimong duha ka oras. Sila kanunayng naningkamot sa pagkontak sa dispatcher. Apan sama sa gihapon, makadawat lang sila og static.

Ang mga smoke jumper mihukom sa pagpaniudto. Human niana, dihang dili gihapon nila makontak ang dispatcher, sila misandig sa ilang mga backpack ug namahulay. Sila nawad-an sa kadasig. Kon ang dispatcher motubag unta kanila ug mosulti asa sila moagi, sila malipayon kaayong mosubay niana nga agianan ug magsugod sa ilang mga paningkamot sa pagpalong sa sunog. Apan ingon og gipasagdan na lamang sila sa dispatcher, tingali nagkapuliki sa ubang mga butang. Ug sila nakahukom nga dili sila molihok kon walay direksyon sa dispatcher. Hinoon, kadto nga mga direksyon mao ang gisaad ngadto kanila sa wala pa sila mo-parachute ngadto sa tumoy sa bungtod.

Pito ka oras ang milabay human miabut ang mga smoke jumper diha sa tumoy sa bungtod, ang gikapoy nga crew chief gikan sa grupo nga nagpalong sa sunog sa ubos sa bukid miabut ug nakit-an ang mga smoke jumper. Siya natingala pag-ayo. Nagpaingon sa ilang lider, siya nangutana, “Unsay inyong gibuhat namahulay lang sa tumoy sa bungtod? Nagkinahanglan gyud mi sa inyong tabang. Ang sunog hapit dili na namo makontrolar tungod kay kami walay igong tabang sa pagkontrolar niini. Ug niining tanang higayon kamo namahulay lang dinhi sa tumoy sa bungtod?

Ang lider sa smoke jumper mipasabut sa ilang problema ngadto sa crew chief. Sila gipasaligan og mga instruksyon gikan sa dispatcher. Sila mabinantayon kaayo aron madungog kadtong mga instruksyon. Apan ang dispacther mibaliwala kanila, wala motubag sa ilang mga tawag. Tinuod, nakakita sila og mga agianan sa nasunugan. Apan sila nahadlok nga sayop ang ilang mapili. Busa sila mihukom nga magpaabut hangtud madungog nila ang gisaad nga mga instruksyon gikan sa dispatcher.

Ang crew chief mikab-ot ug gikuha ang gamay nga radyo nga gigamit sa mga smoke jumper. Siya dayon milakaw og mga 50 ka yarda (45 m) subay sa usa sa mga dalan padulong sa sunog. Siya mihunong ug gisulayan ang radyo. Ang tingog sa dispatcher nadungog kusog ug klaro. Ang crew chief dayon mibalik sa tumoy sa bungtod ug milakaw og dugang nga mga 50 ka yarda paubos sa laing dalan. Siya mihunong ug mitawag sa dispatcher. Usab ang tingog sa dispatcher diha-diha dayon klaro nga nadungog.

Ang crew chief mibalik paingon sa mga smoke jumper ug giitsa ang radyo ngadto sa lider, miingon, “Anaa ka sa dapit nga walay signal. Ang gibuhat lang unta nimo mao ang paglugsong sa usa sa mga agianan, ug ang dispatcher dali untang makahatag kanimo og saktong agianan ug mogiya kaninyo sa saktong lugar kon asa kami nagkinahanglan kaninyo. Imbis nga mamahulay lang dinhi, ug kamo walay pulos para kanamo.”

Kasagaran sa atong panginahanglan sa espirituhanong giya ug direksyon, kita matintal sa paghimo sama gayud kon unsa ang gihimo sa mga smoke jumper. Makaplagan nato ang atong mga kaugalingon sa dili pamilyar nga teritoryo. Kita makakita og mga dalan nga anaa alang kanato, ug kita dili sigurado kon asa ang atong agian. Kita gisaaran og inspirasyon ug tabang gikan sa atong Langitnong Amahan. Apan dili sa kanunay kini moabut diha-diha dayon. Kita mawad-an sa kadasig ug mohukom nga kita molingkud na lamang ug magpaabut hangtud nga ang gisaad nga giya moabut. Kita magsige og paabut, maghunahuna ngano ang balaanong Dispatcher dili motabang kanato sa atong agianan.

Sa pagbuhat sa ingon, atong gibaliwala ang usa ka importante nga baruganan sa pagpadayag. Ang atong Amahan sa Langit naglaum kanato sa paggamit sa atong kaugalingon nga salabutan, abilidad, ug kasinatian sa pagplano sa atong unang agianan. Samtang kita magsubay sa dalan nga atong napilian, kita anaa sa mas maayong posisyon sa pagdawat sa mga saktong agianan nga giandam Niya alang kanato. Apan kon kita molingkod sa tumoy sa bungtod ug mosandig sa atong mga backpack hangtud Siya mohatag kanato og instruksyon, atong girisgo nga makaplagan nato ang atong kaugalingon sa usa ka lugar nga walay pagkaespirituhanon.

Si Presidente Boyd K. Packer, Presidente sa Korum sa Napulog Duha ka mga Apostoles, mitudlo kanato:

“Gipaabut nga kita mogamit sa kahayag ug kahibalo nga anaa na nato sa pagpadagan sa atong mga kinabuhi. Dili na angay nga kita magkinahanglan pa og usa ka pinadayag aron sa pagsugo kanato nga mohimo sa atong katungdanan, kay gisultihan na man kita nga mohimo niana diha sa mga kasulatan; o magpaabut kita nga adunay pinadayag nga mohulip sa espirituhanon o temporal nga salabutan nga nadawat na nato sa una—kondili sa pagpadayon lang niini. Kinahanglang mopadayon kita sa atong ordinaryong kinabuhi, regular nga trabaho, nagsunod sa naandan nga buluhaton ug mga lagda ug mga patakaran nga nagdumala sa kinabuhi.

“Ang mga lagda ug mga patakaran ug mga kasugoan mga mahinungdanon nga panalipud. Kon magkinahanglan kita og pinadayag nga panudlo aron sa pag-usab sa atong agianan, maghulat ra kini diha sa agianan sa pag-abut nato sa panahon sa panginahanglan.”¹

Ako mopamatuod nga ang labing maayo ug labing klaro nga direksyon dili moabut sa atong mga kinabuhi kon kita magpaabut lamang sa atong Langitnong Amahan sa pagpadala og tabang ug giya apan kon kita matinguhaon nga moapil uban sa tanan natong mga paningkamot nga nakasentro sa buluhaton. Alang kaninyo nga nagpaabut sa giya sa Ginoo sa inyong kinabuhi—kinsa nanginahanglan og tabang sa importante kaayo nga desisyon o pangutana—ihatag ko kini kaninyo nga hagit: Sa mainampoon ug mabinantayon nga paagi gamita ang inyong kaugalingong salabutan ug inyong kaugalingong mga kapanguhaan sa pagpili og dalan nga maingon og sakto alang kaninyo. Dayon magmatinguhaon nga moapil sa pagsubay niana nga dalan (tan-awa sa D&P 58:26–28). Kon moabut ang pagkorihir alang sa sakto nga agianan, Siya maanaa sa pagtabang ug paggiya kaninyo.