Fie Maʻu ʻo ha Kau Fakahokohoko Fakamotuʻalea Fakamāmani lahi
Kuo laka hake ʻi ha lekooti ʻe 800 miliona kuo ʻosi liliu fakakomipiuta, talu mei hono fakafeʻiloaki ʻo e fakahokohoko fakamotuʻaleá ʻi he FamilySearch he 2006. Ka ʻoku teʻeki ke ʻosi e ngāué, pea ʻoku fakautuutu hono fie maʻu ha kau fakahokohoko fakamotuʻalea fakamāmani lahí.
ʻI he taimi naʻe foki ai ʻa Hilalī Leimoni ʻo ʻIutā, USA ki ʻapi hili ʻene ngāue fakafaifekaú, naʻe toe ha ngaahi māhina siʻi peá ne toe foki ki he akó. Naʻá ne fie maʻu ha ngaahi founga ke fakaʻaongaʻi lelei ki ai hono taimí, naʻá ne kamata tokoni leva he fakahokohoko fakamotuʻalea ʻo e FamilySearch he ʻintanetí. Naʻá ne kamata fakahokohoko fakamotuʻalea he lea faka-Pilitāniá ka naʻe vave pē ʻene ʻiloʻi ʻoku ʻi ai mo e ngaahi faingamālie ke fai ai e fakahokohoko fakamotuʻaleá ʻi he ngaahi lea fakafonua kehé—kau ai e lea faka-Potukalí, ʻa e lea fakafonua ko ia naʻá ne ako heʻene ngāue fakafaifekaú.
ʻOku pehē ʻe Hilalī, “Koeʻuhí he naʻá ku ngāue fakafaifekau ʻi Potukali, naʻá ku tokanga ki he ngaahi fokotuʻutuʻu ngāue ʻo e fakahokohoko fakamotuʻaleá naʻe lisi maʻa Palāsila mo Potukalí. Naʻe fakautuutu ʻeku tokangá ʻi heʻeku sio ki ha ngāue mei Setupale ʻi Potukalí, he ko e taha ia ʻo e feituʻu naʻá ku ngāue aí.
Ko Hilalií ko ha taha ʻo e kau ngāue tokoni ʻoku tokoni ke feau e fie maʻu fakahokohoko fakamotuʻalea ʻa e FamilySearch ʻoku fakautuutu ʻene tupú ʻi ha ngaahi lea fakafonua kehe mei he lea faka-Pilitāniá. Pea hangē ko e kau ngāue tokoni ʻoku lolotonga ngāue ʻe toko 127,000 kehé, ʻoku taipeʻi ʻe Hilalī e ngaahi hingoa mo e ngaahi meʻa naʻe hoko kiate kinautolu kuo mālōloó koeʻuhí ke lava e kāingalotú ʻo maʻu e fakamatala ʻoku nau fekumi ki aí ke fakakakato e ngāue ouau fakatemipale ki heʻenau ngaahi kuí.
Ko e hā e Fakahokohoko Fakamotuʻaleá?
Ko e fakahokohoko fakamotuʻalea ʻi he FamilySearch ko ha founga ngāue ki hono lau e ngaahi fakamatala kuo fakahū ki he komipiutá—hangē ko e tohi kakaí, lekooti ʻo e malí pe maté, ngaahi tohituku, mo e ngaahi lekooti fakasiasi—pea taipeʻi e fakamatala ʻoku ʻi aí ki ha uepisaiti ʻe lava fai ai ha fakatotoló. ʻOku hanga ʻe he kau ngāue tokoni ʻi he fakahokohoko fakamotuʻaleá ʻo fakafaingofuaʻi e fekumi ʻa e kau mēmipá mo e kau fakatotolo kehe ʻo e hisitōlia fakafāmilí ki hono maʻu e fakamatala ki heʻenau ngaahi kuí ʻi he ʻInitanetí.
ʻOku hanga ʻe he fakahokohoko fakamotuʻaleá ʻo ʻai ke faingofua mo fakafiemālie e ngāue ki he hisitōlia fakafāmilí. Naʻe pehē ʻe Siosefa Sipatakasi ko ha tokotaha fakahokohoko fakamotuʻalea mei Hungali, “ʻI he kuohilí, kapau naʻá ke fekumi ki ho kāingá, te ke nofo ʻo takai e ngaahi maikolofilimí (microfilm). ʻI he taimi te ke maʻu ai e mēmipa ʻo e fāmilí naʻá ke kumi ki aí, mahalo te ke lava ke ʻilo ai mo ha ngaahi hingoa ʻoku nau fekauʻaki. Ko ia ai te ke toe toutou takaiʻi ai e filimí.”
ʻOku hokohoko atu he ngaahi ʻahó ni hono tānaki ʻe he FamilySearch ʻa e ngaahi lekooti fakahisitōlia mei he ngaahi puleʻanga mo e kau tauhi lekooti mei he tapa kehekehe ʻo māmani. Ka ʻoku ʻikai ʻeni ke toe ʻai e ngaahi lekōtí he filimí pea fakafaingofuaʻi hono maʻu ia ʻe he kau fakatotoló, ka ʻoku hanga ʻe he kau ngāue ʻi he FamilySearch ʻo fakahū kinautolu ki he polokalama fakahokohoko fakamotuʻaleá. ʻOku maʻu hake leva ʻe he kau ngāue tokoní ʻa e ngaahi ʻīmisí mei heʻenau komipiutá pea taipeʻi e fakamatalá ʻo hangē ko ia ʻoku nau sio ki aí. ʻI he foungá ni ʻoku fakakomipiutaʻi ai e fakamatalá pea lava ke maʻu ia ʻi hono kumi ʻi he FamilySearch.org lolotonga ia ʻoku nofo fiemālie pē e kau fakatotoló ʻi honau ʻapí.
Ko e hā e Tuʻunga ʻoku Aʻu ki ai e Fakahokohoko Fakamotuʻaleá?
Talu mei hono fakafeʻiloaki mai ʻo e fakahokohoko fakamotuʻaleá ʻi he FamilySearch he 2006, kuo fakahoko ʻe he kau ngāue tokoni he fakahokohoko fakamotuʻaleá ha fakalakalaka matuʻaki mahuʻinga—ʻo hiki ha meimei lekooti ʻe 800 miliona. Ka ʻoku teʻeki ai ke vave ke ʻosi e ngāue ke faí. ʻOku ʻi ai ha lekooti ia ʻe 150 piliona ʻoku tauhi mo maluʻi he ngaahi filimi ʻi he Granite Mountain Records Vault ʻi Sōleki Sití—pea ʻoku toe lahi ange mo e ngaahi lekooti ʻoku tānaki atu maʻu peé. ʻOku ʻi he ngaahi lekooti ko ʻení ha fakamatala ki ha kakai e lauipiliona mei ha fonua ʻe 100 ʻoku kau ai ha ngaahi lea fakafonua ʻe 170 tupu.
ʻOku aʻusia ʻe Lopeti Mekinusikī, ko ha faifekau ngāue tokoni ʻa e Siasí pea ko ha tokotaha fakahokohoko fakamotuʻalea lolotonga ia mei Pōlani, ʻa e fie maʻu lahi ko ia ʻo ha kau ngāue tokoni tokolahi ange ʻi he ngaahi lea fakafonua kehe mei he lea faka-Pilitāniá. ʻOkú ne fakamatala ʻo pehē, “Koeʻuhí ko hono vahevahe e fonuá mei he 1772 ki he 1918, naʻe tauhi e ngaahi lekooti ʻa Pōlaní ʻi ha lea fakafonua ʻe fā: lea faka-Lūsia, Siamane, Latina, mo e faka-Pōlani.” Koeʻuhí ko e lahi taha e kau fakahokohoko fakamotuʻalea ʻi Pōlaní ʻoku nau lea faka-Pōlani, ne kamata ʻenau fakahokohoko fakamotuʻaleá ʻi he ngaahi lekooti faka-Pōlaní. Pea ʻoku kei toe ai e ngāue ia ke fai ki he ngaahi lekooti faka-Lūsiá, Siamané, mo e faka-Latiná. Ka ʻi he tokoni ʻa e kau ngāue tokoni fakaemāmani lahi kuo nau poto he ngaahi lea fakafonua kehé, ʻoku lava ai ʻe he kau fakatotolo ʻi he hisitōlia fakafāmilí ʻo maʻu ʻenau ngaahi kuí—ʻo tatau ai pē pe ko e hā e lea fakafonua naʻe hiki ai e fakamatala mahuʻingá.
Ke fakafaingofuaʻi hono maʻu ʻo e ngaahi lekooti ko ʻení, kuo ʻosi tuku atu e polokalama fakahokohoko fakamotuʻaleá ʻi he lea fakafonua ʻe 11: lea faka-Hōlani, Pilitānia, Falanisē, Siamane, ʻĪtali, Siapani, Pōlani, Potukali, Lūsia, Sipeini, mo e faka-Suētení. ʻOku poupouʻi atu e kakai ʻoku poto ʻi ha taha ʻo e ngaahi leá ni—ʻo tatau ai pē pe ko ʻene lea fakafonuá ia pe naʻá ne ako ia ʻi he ngāue fakafaifekaú, akó, pe ʻi ha faʻahinga ako kehe—ke kau mai pea kamata hono fakahokohoko fakamotuʻalea e ngaahi lekōtí.
Te u Kamata Fēfē Nai?
ʻOku vave mo faingofua e kamata ʻa e tokotaha ngāue tokoni fakahokohoko fakamotuʻaleá. Muimui pē he ngaahi fakahinohino ʻi he indexing.familysearch.org ke hiki mai e polokalamá ki hoʻo komipiutá. Hokó, fokotuʻu ha ʻakauni, pea fili ha kulupu, pe “faʻahinga” ʻo e lekooti ke fakahokohoko fakamotuʻaleá. Kuo ʻosi fakakalakalasi e ʻū lekōtí ki ha fanga kiʻi kulupu ʻo e hingoa ʻe 20 ki he 50 ke lava e kau ngāue tokoní fakamoleki ha taimi siʻi pe taimi lahi ʻo fakatatau ki he meʻa te nau loto ki aí ke fakahoko e fakahokohoko fakamotuʻaleá. Mahalo naʻa miniti ʻe 30 pea lava kakato e ngāue ki ha kulupu hingoa ʻe taha, ka te ke lava pē ʻo kiʻi mālōlō lolotonga hoʻo ngāué pea toki foki mai ʻamui koeʻuhí he ʻoku lava pē ʻe he polokalamá ʻo fakahaofi e ngāue naʻá ke ʻosi faí. Kapau ʻoku ʻikai te ke lava ʻo fakaʻosi e ngāue ko iá ʻi ha uike ʻe taha, pea ʻe ʻatā leva ia ke fakakakato ʻe ha niʻihi kehe.
Ko e faʻahinga lekooti mei he ngaahi fonua ʻi māmaní ʻoku ʻomai ia ʻe he FamilySearch mei he ngaahi fonua ko iá ke fai hono fakahokohoko fakamotuʻaleá. Ko Misa Sapatakaí ʻoku haʻu ia mei Hungali, ka naʻe kamata ʻene fakahokohoko fakamotuʻalea ʻi he ngaahi lekooti he lea faka-Pilitāniá mo e faka-ʻAfilikāní kae ʻoua leva kuo toki maʻu e ngaahi lekooti mei hono fonua totonú. ʻOku pehē ʻe Misa Sapatakai, “Ko e taha ia e momeniti fakafiefia tahá ʻa hono fakahā mai ʻi he kamataʻanga ʻo e 2011 kuo ʻi ai e faʻahinga lekooti mei Hungali. Kuo tokolahi ha kāingalotu Hungali—ʻa e talavou mo e matuʻotuʻa—kuo lesisita pea hoko ko e kau fakahokohoko fakamotuʻalea ʻvēkeveke’ talu mei he taimi ko iá.” ʻOku tupu e loto vēkeveke ʻa Misa Sapatakaí mei he ʻamanaki lelei ʻe maʻu ha tokolahi ʻo ʻenau ngaahi kuí ʻi hono hiki e ngaahi lekooti ko ʻení. “ʻI heʻetau langa hake ʻa e tanakiʻanga fakamatala fakaʻofoʻofá ni, te tau lava ke maʻu ai ha ngaahi hingoa lahi ange hotau fāmilí, fakahaofi e taimí mo tokoniʻi ʻetau ngaahi kuí ke maʻu vave ange honau ngaahi ouau fakahaofí.”
Fefē Kapau ʻOku ʻIkai Ke u Maʻu e Tekinolosia Fakamuimuitahá?
ʻOku ʻi ai e ngaahi feituʻu lahi ʻi he māmaní, ʻoku faingataʻa ke maʻu ha komipiutá mo e ʻInitanetí maʻanautolu ʻoku vēkeveke ke fai e fakahokohoko fakamotuʻaleá. Ko e tūkunga ʻeni ʻoku fehangahangai mo e kau taki ʻi he Siteiki Mekisikou Siti Seilahemalá ʻi heʻenau loto ke kau e toʻu tupú he fakahokohoko fakamotuʻaleá. Koeʻuhí he ʻoku ʻikai ke maʻu ʻe he toʻu tupú kotoa ha komipiuta ʻi honau ʻapí, naʻe loto leva e kau takí ke tuku mavahe ha loki komipiuta ʻi ha ʻapiako fakalotofonua ke nau fakaʻaongaʻi he tuku ʻa e akó.
Naʻe ngāue leva e toʻu tupú ke fakahokohoko fakamotuʻalea e lekooti mei he tohi kakai ʻa Mekisikou ʻi he 1930. ʻOku pehē ʻe Pīsope Talio Sapata Viva, “ʻI hono toe vakaiʻi ʻe he toʻu tupú ʻa e ʻū fakamatalá, naʻa nau fakakaukauloto atu ki he ʻalu ʻa e kakaí mei he ʻapi ki he ʻapi ʻo tānaki kotoa e ʻū fakamatalá ni ʻo ʻikai ʻiloʻi ʻe ʻi ai e ʻaho ʻe tokoni ʻenau ngāué ki he ngāue ʻa e ʻEikí ʻi hono fakahoko ‘ʻa e moʻui taʻe-faʻa-maté mo e moʻui taʻengata ʻa e tangatá’” (Mōsese 1:39).
ʻI he ngāue fakataha ʻa e kau taki ʻo e siteikí ke maʻu e tekinolosia naʻe fie maʻú, naʻe lava leva ʻe he toʻu tupú mo e kāingalotu kehe ʻo e siteikí ʻo fakahokohoko fakamotuʻalea ha lekooti ʻe 300,000 ʻi ha māhina pē ʻe taha.
ʻI heʻetau vakai ki he toʻu tupu ʻo e siteiki Seilahemalá ʻoku tau ako ai, neongo ʻoku ʻikai ke ʻi ai haʻo komipiuta, te ke kei lava pē ʻo kau atu. ʻE lava ke fakahoko e polokalama fakahokohoko fakamotuʻaleá ʻi ha faʻahinga komipiuta pē ʻoku maʻu ai e ʻInitanetí, kau ai e ngaahi ʻapi ʻo e kāingalotú, ngaahi senitā hisitōlia fakafāmilí, ngaahi falelotú, pea aʻu pē ki he ngaahi ʻapiakó pe laipelí ʻo ka fakangofua.
Ko e Ngaahi Tāpuaki ʻo e Fakahokohoko Fakamotuʻaleá
Ko e ngaahi fakamatala faka-Potukali naʻe fakahokohoko fakamotuʻalea ʻe Sisitā Hilalī Lemaní ko ha ngaahi lekooti papitaiso ia kuo laka hake he senituli ʻe uá. Naʻe ʻikai ʻasi lelei e ʻū pēsí pea ko e ngaahi mataʻitohi fakaʻofoʻofá ne faingataʻa hono laú, ka naʻá ne faivelenga pē he ngāué ʻi heʻene fakakaukau ki he ngaahi hingoa he pēsí ko ha kakai ʻoku nau tali mai ke fai ha ngāue maʻanautolu he temipalé.
Naʻe pehē ʻe Hilalī, “ʻI heʻeku fakahokohoko fakamotuʻaleá, naʻe tuʻo lahi ʻeku ongoʻi nonga, pea ʻiloʻi fakapapau ʻe ʻi ai e ʻaho ʻe fakaava hake ʻa e lekooti papitaisó ʻe ha tokotaha Siasi mei Potukali ʻo ʻilo ʻene kuí ʻi he meʻa ne u fakahokohoko fakamotuʻaleá. Ko ʻeni ʻoku palani ke langa ha temipale ʻi Lisipooni ʻi Potukali, ʻoku ou ʻilo ʻe ʻi ai ha ʻaho ʻe maʻu ai ʻe he kāingalotu aí ʻenau ngaahi kuí koeʻuhí ko e ngāue ko ia ʻoku fai ʻi he fakahokohoko fakamotuʻalea ʻi he FamilySearch.”
ʻE toe lahi ange ha ʻū lekooti ʻe fakatolongá pea mo e founga ʻe fakaava ai maʻanautolu kuo ʻosi mavahe atú ke maʻu e tāpuaki kakato ʻo e ongoongoleleí, koeʻuhí ko e tokoni ko ia ʻoku fai ʻe he kau ngāue tokoni hangē ko Sisitā Lemaní.
Fakaikiikí fai ʻe Bradley Clark; ngaahi tā ʻo e maka he faʻitoká fai ʻe David Stoker; toʻohemá: tā fakatātaaʻi ʻo e ʻatá ʻe Cody Bell; toʻomataʻú: tā fakatātaaʻi ʻo e ʻatá ʻe Robert Casey © 2005 IRI
Toʻohemá: faitāʻi e ʻatá ʻe Welden C. Andersen