ʻOku fakangatangata nai e fakatomalá? Kapau te u kole fakamolemole tuʻo lahi ʻi he meʻa tatau, ʻe aʻu nai ki ha tuʻunga he ʻikai ke toe tali ai?
ʻOku ʻi ai ha meʻa ʻe ua ke manatuʻi heni: (1) ko e ʻaloʻofa ʻa e ʻOtuá ʻoku ʻikai hano ngataʻanga, pea (2) ʻoku ʻuhinga e fakatomala moʻoní ko hono liʻaki hoʻo ngaahi angahalá.
Ka ʻi he tafaʻaki ʻe tahá, koeʻuhí ko e Fakalelei taʻe fakangatangata ʻa Sīsū Kalaisí ʻoku ʻatā e fakatomalá ke maʻu ia ʻe he taha kotoa pē, ʻo aʻu ai pē kiate kinautolu kuo tuʻo lahi ʻenau fakahoko e fehālaaki tatau. Pea hangē ko e lau ʻa e palōfita ko ʻAlamaá, “Vakai, [ko e ʻEiki ko e ʻOtuá] ʻokú ne ʻoatu ha fakaafe ki he kakai fulipē, he kuo mafao atu ʻa e toʻukupu ʻo e ʻaloʻofá kiate kinautolu, pea ʻokú ne folofola: fakatomala, pea te u tali ʻa kimoutolu” (ʻAlamā 5:33).
ʻI he tafaʻaki ʻe tahá, naʻe akonaki ʻa e Palōfita ko Siosefa Sāmitá, “Ko e fakatomalá ‘oku ‘ikai ko ha meʻa ia ke filioʻi mo ia ‘i he ‘aho kotoa pē. Ko e maumaufonó mo e fakatomala fakaʻahó ‘oku ‘ikai ko ha meʻa ia ʻoku fakahōifua ‘i he ‘ao ‘o e ‘Otuá” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 86).
Ko ia ai ko e hā ʻa e kī ki he fakatomalá? Hangē ko ia naʻe fakahā ʻe he ʻEikí kia Siosefa Sāmitá, “Te mou ‘ilo ‘i he meʻá ni ‘o kapau ‘oku fakatomala ha tangata mei heʻene ngaahi angahalá—vakai, te ne vete ia pea liʻaki ia” (T&F 58:43). Pea hangē ko ia naʻe akoʻi ʻe ʻAlamaá, “ʻIlonga ia ʻe fakatomalá te ne maʻu ʻa e ʻaloʻofá; pea ʻilonga ia ʻokú ne maʻu ʻa e ʻaloʻofá ʻo kātaki ki he ngataʻangá ʻe fakamoʻui ia” (ʻAlamā 32:13; toki tānaki atu ʻa e fakamamafá).
ʻI hono fakalea ʻe tahá, kuo pau ke ke vete pea liʻaki hoʻo angahalá mo feinga ke faivelenga ki he ngataʻanga hoʻo moʻuí. Kapau ʻoku faingataʻa ke ke ikunaʻi ha faʻahinga angahala pau, ʻoua naʻá ke foʻi ʻi he fakakaukau maʻuhala ko ia ʻoku fakangatangata pē ʻa e fakatomala fakamātoató. Kumi tokoni mei hoʻo ongomātuʻá mo hoʻo pīsopé pe palesiteni fakakoló. ʻE tokoni atu ʻenau ʻofá, poupoú, mo e faleʻí ʻi hoʻo feinga ko ia ke toʻo e angahalá mei hoʻo moʻuí mo hoʻo feinga ke ofi ange ki he Tamai Hēvaní mo Sīsū Kalaisí.