Ko e Lea ʻi he ʻAho ní
Poupou e Palōfitá ki he Kakai Lalahi KeiTalavoú ke Nau Hoko ko ha Maama
Naʻe naʻinaʻi ʻa Palesiteni Tōmasi S. Monisoni ki he kau fanongó ʻi ha Fakataha Fakalaumālie ʻi he ʻUnivēsiti Pilikihami ʻIongi-Polovó he ʻaho 1 ʻo Nōvema 2011, ke nau hoko ko ha “faʻifaʻitakiʻanga anga māʻoniʻoni.”
Naʻe lau ʻa Palesiteni Monisoni mei he lea ʻa e ʻAposetolo ko Paulá ʻi he Fuakava Foʻoú—“Ka ke ʻi he kakai tuí ko ha fakaʻilonga, ʻi he lea, mo e ʻulungāanga, mo e ʻofa, mo e faianga, mo e tui, mo e māʻoniʻoni” (1 Tīmote 4:12)—ʻo ne fakahā ʻa ʻene fakaʻamu ʻe hoko e kāingalotu ʻo e Siasí ko ha maama ki māmani.
Naʻá ne fehuʻi, “Ko e hā ʻa e maama? ʻOku ou saiʻia ange ʻi he tali faingofua ʻko e meʻa ʻokú ne fakamaamangiaʻi ha meʻa.’ ʻE lava ʻe hono tā ha faʻifaʻitakiʻanga ʻo e anga māʻoniʻoní … ʻo tokoni ke fakamaamangiaʻi ha māmani ʻoku fakautuutu ʻene fakapoʻulí.”
Naʻá ne pehē kuo ulo siʻisiʻi e maama ia ʻa ha tokolahi ʻo aʻu pē ki heʻene mate. Naʻá ne pehē ko hotau fatongiá ke tauhi ʻetau ngaahi māmá ke kei ulo lahi ke lava ʻa e niʻihi kehé ʻo mamata pea muimui ki ai, pea ʻoku fie maʻu ke tau tui.
Naʻá ne pehē, “Ko e meʻa ia ʻatautolu takitaha ke fakatupulaki ʻa e tui ko ia ʻoku fie maʻu ke tau hao fakalaumālie aí pea fakaulo atu ʻetau māmá ke mamata ki ai e niʻihi kehé. Manatu he ʻikai lava ke nofo fakataha ʻa e tuí mo e loto veiveiuá ʻi he feituʻu tatau ʻi he taimi tatau.”
Naʻe fakamatala ʻa Palesiteni Monisoni ʻo pehē ko e niʻihi ʻo e ngaahi founga lelei taha ke maʻu ai mo tauhi ʻa e tuí ko hono lau mo ako e folofolá pea ke lotu maʻu pē.
Naʻá ne fehuʻi ange, “Kuo mou lau e Tohi ʻa Molomoná? Kuo mou ʻahiʻahiʻi ʻa e talaʻofa ʻi he tohi ʻa Molonaí?” Naʻá ne fakalotolahi kiate kinautolu ʻi he fakatahaʻangá ke nau tuku mavahe ha taimi ʻi he ʻaho takitaha ke nau fekumi ai ʻiate kinautolu pē pe ʻoku moʻoni e Tohi ʻa Molomoná, “he te ne liliu ho lotó pea te ne liliu hoʻo moʻuí.”
Naʻe lau ʻe Palesiteni Monisoni mei he 3 Nīfai 12:16—“Tuku ke ulo pehē hoʻomou māma ʻi he ʻao ʻo e kakaí ni, koeʻuhi ke nau mamata ki hoʻomou ngaahi ngāue leleí pea tuku ʻa e fakafetaʻí ki hoʻomou Tamai ʻa ia ʻoku ʻi he langí”—peá ne fakamatalaʻi ange ko Kalaisi ʻa e “maama moʻoní, ʻokú ne fakamaama ki he tangata kotoa pē ʻoku haʻu ki māmani’ (Sione 1:9), ko ha maama ʻoku ‘ulo ʻi he poʻulí’” (Sione 1:5).
Naʻá ne fakaʻosi ʻo pehē: “ ʻOku ʻikai fakangatangata hotau ngaahi faingamālie ke tau ulo atú. …ʻI heʻetau muimui ʻi he faʻifaʻitakiʻanga ʻa e Fakamoʻuí, te tau maʻu ai ʻa e faingamālie ke tau hoko ko ha maama ʻi he moʻui ʻanautolu ʻoku tau feohí.”
Naʻe poupou ʻa Palesiteni Monisoni ki he kāingalotú ʻi haʻane lea ʻi he fakataha fakalaumālie naʻe fai ʻi he ʻUnivēsiti Pilikihami ʻIongi-Polovó ke nau lau e Tohi ʻa Molomoná pea fekumi ʻiate kinautolu pē ke ʻiloʻi ʻa hono moʻoní.
© IRI