ʻE lava nai ʻe he kakai taʻesiasí ʻo maʻu e sākalamēnití?

Hangē ko ia ʻokú ke ʻiloʻí, ko e maá mo e vaí naʻe fakataumuʻa ia maʻá e kau mēmipa ʻo e Siasí koeʻuhí ke tau lava ʻo fakafoʻou ʻetau ngaahi fuakava he papitaisó. Neongo ia, ʻoku ʻikai totonu ke tau fai ha meʻa lolotonga e houalotu sākalamēnití ke taʻofi ai e kakai taʻesiasí mei hono maʻu ʻo e sākalamēnití.

ʻOku lelei ke fakaafeʻi mai e ngaahi kaungāmeʻa mo e fāmili taʻesiasí ki he lotú, pea ʻoku tau loto ke nau ongoʻi ʻoku talitali lelei kinautolu mo nau ongoʻi fiemālie ʻi heʻetau ngaahi fakatahaʻangá. ʻE lava ke tokoni ke nau mateuteu ki he sākalamēnití ʻaki hano fakamatalaʻi kiate kinautolu ʻa e ʻuhinga ʻo e sākalamēnití pea mo e meʻa ʻe hoko ʻi he lotú. Kapau te nau ʻeke pe ʻoku totonu ke nau maʻu e sākalamēnití, talaange pē kiate kinautolu te nau lava ke fili ke fai ia ka naʻe fakataumuʻa pē ia maʻá e kau mēmipa ʻo e Siasí, ʻa ia ʻoku nau fakafoʻou ʻenau ngaahi fuakava naʻe fai he papitaisó.

Naʻe pehē ʻe ʻEletā Taleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku hanga ‘e he ouau ‘o e sākalamēnití ‘o ‘ai ke hoko ‘a e houalotu sākalamēnití ko e fakatahaʻanga toputapu mo mahuʻinga taha ia ‘i he Siasí” (“Houalotu Sākalamēnití mo e Sākalamēnití,” Liahona, Nōv. 2008, 17). ʻOku totonu ke tau tokoniʻi e kakai taʻesiasí ke mahino kiate kinautolu ʻa e mahuʻinga ʻo e ouau ko ʻení, pea fakapapauʻi ʻoku nau ongoʻi fiemālie ʻi heʻetau ngaahi fakatahaʻangá.