Ko e Fiefia Moʻoní
Ko hai te u lava ʻo vahevahe ki ai e ongoongoleleí? Naʻe ʻi ai ha toko taha pau ne u fakakaukau ki ai.
“Pea kapau te mo … ʻomi, ʻa e foʻi laumālie ʻe toko taha pē kiate au, hono ʻikai ke lahi pehē fau ʻa hoʻomo fiefia fakataha mo ia ʻi he puleʻanga ʻo ʻeku Tamaí!” (T&F 18:15).
ʻI hono lau ʻe heʻeku pīsopé ʻa e veesi ko ʻení, naʻá ku fuʻu fiefia. ʻOku ou lava ke fakakaukau atu ki haʻaku ʻi ha papitaiso ʻo ha taha ne u fakafeʻiloaki ki he ongoongoleleí. ʻE fuʻu fiefia hoku kaungāmeʻá, pea ʻe ʻilo ʻe he tokotaha kotoa pē ʻe papitaiso hoku kaungāmeʻá koeʻuhí ko au. ʻE fuʻu lahi ʻeku fiefiá.
Naʻe haʻu pē ki hoku ʻatamaí he taimi ko iá e hingoa ʻo ʻEniselaá. Ko hoku kaungāmeʻa lelei tahá ia, pea ʻokú ne fie maʻu e ongoongoleleí. ʻOku ou tui ʻe tokoni ʻene fanongo ki he ongoongoleleí mo ʻiloʻi ko e ʻofefine ia ʻo e ʻOtuá ke tali ʻene ngaahi fehuʻí pea tupulaki ai.
ʻI he ʻaho hono hokó ne u ʻeke ange, “ʻE ʻEniselā, ʻoku fai ha papakiu ʻi homau ʻapi siasí he Tokonakí. Te ke fie ʻalu ki aí?”
Naʻá ne tali mai, “Pau ʻaupito ia, pea ʻoku ngali fakalata ia.”
Naʻá ne haʻu pea ʻi he ngaahi māhina hokó, naʻá ku fakaafeʻi hokohoko ia ki he ʻekitivitī kotoa pē ʻa e Siasí ne faí. Ne u ʻeke ange kiate ia he ʻosi ʻa e ʻekitivitī kotoa pē, “Ko ia ai ʻEniselā, ko e hā hoʻo fakakaukaú?” Naʻe hoko ai mo ha talanoa kau ki he ngaahi tefitoʻi moʻoni taʻengatá. Naʻá ku fiefia. ʻE vave pē ha ʻaho te u utu ai e ngaahi tāpuaki naʻe talaʻofa mai ʻe he Tamai Hēvaní.
ʻI ha pō momoko ʻe taha kimuʻa he Kilisimasí, naʻá ma fakakaukau mo ʻEniselā ke lue takai he Temipale Uasingatoni D.C. Naʻe ʻākilotoa kimaua ʻe he Laumālie Māʻoniʻoní ʻi heʻema lué, pea ne u ʻilo naʻá ne ongoʻi ha meʻa.
Ne u ʻeke ange, “Ko e hā leva hoʻo ongoʻí?”
“ʻOku ou loto ke papitaiso au. … ʻOleva angé,” ko ʻene fakatokanga mai ia heʻene sio ʻoku ou fuʻu mata fiefiá. “He ʻikai lava ke u papitaiso he taimí ni, pea he ʻikai lava ke ʻaʻahi ange e ongo faifekaú. He ʻikai ke teitei fakangofua ia ʻe heʻeku ongomātuʻá. Ka te ke lava nai ʻo akoʻi mai e meʻa kotoa pē ʻokú ke ʻiló?”
Naʻá ku ʻohovale, ʻo tali loto-fakatōkilalo, “ʻIo, te u feinga ke akoʻi atu e meʻa kotoa pē ʻoku ou ʻiló.”
ʻI he pō ko iá ne u fakakakau ki he palōmesi ne u faí. Meʻa kotoa ʻoku ou ʻiló? Fēfē kapau ʻoku ʻikai feʻunga e meʻa ia ʻoku ou ʻiló? ʻOku mālohi feʻunga nai ʻeku fakamoʻoní? ʻOku ou ʻiloʻi fakapapau nai ʻoku moʻoni e ongoongoleleí?
Naʻá ku fakakaukau ke kamata he ʻaho hono hokó ke ako e meʻa kotoa pē te u lavá ʻo fekauʻaki mo e ongoongoleleí, ke maʻu ha fakamoʻoni mālohi ki hono moʻoní.
Ne u kamata lau loto vēkeveke e folofolá he pō kotoa pē. Naʻe kamata ke toe fakamātoato ange ʻeku lotú ʻo kole ke u ʻiloʻi mo ʻEniselā ʻoku moʻoni e ongoongoleleí.
Naʻe māmālie e hoko mai ʻa e olá. ʻI heʻema talanoá naʻe tataki au ʻe he Laumālié he taimi ʻe niʻihi ke lea ʻaki he taimi pē ko iá ha ngaahi meʻa ne teʻeki ke u fakakaukau ki ai. Naʻe mālohi ange ʻeku fakamoʻoní ʻi heʻeku fakahoko iá. Naʻe hoko ʻo moʻoni e folofolá kiate au.
Naʻe tokoni mai ʻeku ongomātuʻá. Ko ha ongo maʻuʻanga tokoni mahuʻinga ia, pea naʻá ku ako ke ʻofa mo fakahoungaʻi lahi ange kinaua.
Hili ha taʻu ʻe nima naʻe teʻeki pē ke hoko ʻa ʻEniselā ko ha mēmipa ʻo e Siasí. Kapau te u fakamāuʻi au ʻo fakatatau ki heʻeku fakaʻamu he foomu uá, mahino pē ʻoku ʻikai ke u lava ha meʻa. Naʻe ʻikai ke u tangutu ʻi ha papitaiso mo maʻu e “fiefia” ʻo hono fakamālōʻia au ʻe he tokotaha kotoa ʻi hono ʻomi hano kaungāmeʻa ki he ongoongoleleí. Neongo iá, kuo liliu ʻeku ngaahi fakaʻamú. Kuó u ʻomi hoku laumālié ke ofi ange ki he ʻOtuá. Tatau ai pē pe ʻe ʻikai ke kau ʻa ʻEniselā ia ki he Siasí, naʻe ʻikai ke taʻeʻaonga e ako mo e akoʻi ne u faí. Naʻá ne ako lahi ange ki he folofolá, pea ʻi hono vahevahe ia kiate iá ʻoku fakaului ai mo au. Pea tokoniʻi ai au ke u toe poto ange ʻi hono vahevahe ia mo e niʻihi kehé.
Ko e fiefia ko ia naʻe talaʻofa mai ʻi he Tokāteline mo e Ngaahi Fuakavá naʻe ʻikai ke ʻuhinga ia ki he ngaahi lāngilangi fakaemāmaní. Ka ʻoku lahi ʻeku fiefiá koeʻuhí he ʻoku ou ʻiloʻi lelei ange hoku Fakamoʻuí pea maʻu ha fakamoʻoni mālohi ki Heʻene ongoongoleleí.
Tā fakatātaaʻi ʻe Julie Rogers