Ko e Tokotaha Vaʻinga Soka Lelei Tahá
[“Folofola ʻa Sīsū ke ʻofa he taha kotoa pē; pea angalelei foki kiate kinautolu”] (Tohi Hiva ʻa e Fānaú, 39).
Ne u kuku hoku nimá, uʻu hoku loungutú, mo ʻakahi e foʻi pulu ne teka mai kiate aú. Pea naʻá ku fingoʻi hoku matá he ʻalu kehe ʻa e pulú ia mei he koló.
Naʻe ʻi ai ha kiʻi taʻahine ko Neni naʻe tuʻu pē he veʻe ʻaá ʻo sio ki heʻemau vaʻingá. Naʻá ne lele ke toʻo hake e foʻi pulú, pea humu ʻi heʻene fuʻu fiefiá. Naʻe kata e tokotaha kotoa pē. Naʻe ʻikai ke fakamālō ha taha kiate ia heʻene lī mai e foʻi pulú kiate kimautolú.
Naʻá ku ongoʻi halaia. Ne u ʻilo ne loto ʻa Neni ke vaʻinga, ka naʻe ʻikai te u loto ke fakaafeʻi mai ia.
Naʻe anga fakalongolongo ʻa Neni, mafuefue hono ʻulu keló, matasioʻata matolu, pea leʻo fakaoli. Naʻe ʻikai pē ke ʻi ai hano kaungāmeʻa heʻemau kalasí. Naʻe ʻikai ʻuhinga ia naʻá ku fehiʻa ai. Naʻe teʻeki ai pē ke u talanoa au mo ia.
Naʻe talamai ʻe heʻemau faiakó he hoʻatā ko iá te ne feʻunuʻaki homau ʻū tesí. Te ne fai ha fakanofonofo foʻou.
Naʻe fuʻu longoaʻa e lokí. Naʻá ku malimali atu ki hoku kaungāmeʻa lelei taha ko Lianá.
Naʻe ʻunu mai ʻa Kalolaine ʻo pehē mai. “ʻOku ou fanongo atu kia Neni ʻokú ne talaange kia Misisi Mātini ʻoku fie tangutu ia ho tafaʻakí. Palakū!”
Naʻá ku fuʻu ʻohovale. Peá u fifili, “Ko e hā ʻokú ne fili ai aú?” Naʻe teʻeki ai ke u angakovi kia Neni, ka naʻe teʻeki ai pē ke u angalelei au ki ai.
Naʻe fanafana mai ʻa Kalolaine, “Talaange ki he faiakó ʻoku ʻikai te ke fie nofo koe mo ia. Telia naʻa ʻikai ke toe fie nofo ha taha ia mo koe.”
Naʻá ku sio atu kia Neni. Naʻe punou pē hono ʻulú. Pau pē naʻá ne ʻilo e meʻa ʻoku fakakaukau ki ai e taha kotoa he lokí.
Naʻe ui mai au ʻe Misisi Mātini ki hono tesí. Naʻá ku ʻilo ko Není ko e ʻofefine ia ʻo e ʻOtuá pea naʻe tala ʻe Sīsū ke ʻofa ʻi he taha kotoa pē. Ka ʻo kapau te u kaungāmeʻa mo Neni, ʻe fakakaukau e taha kotoa ʻoku ou faikehe.
Naʻe ʻeke mai ʻe Misisi Mātini kiate au, “Ko hai ʻokú ke fie tangutu mo iá?”
Naʻá ku pehē ange, “Liana.” Meʻa faingofua ē.
Naʻe malimali pē ʻa Misisi Mātini. “Te ke fie nofo foki mo Neni?”
Naʻá ku sio pē ki lalo pea fafana atu, “He ʻikai ke u loto ki ai.”
Naʻe ʻohovale ʻa Misisi Mātini. “Ko hoʻo fakamātoato, ʻEnisī?”
Ne u tali atu, “ʻIo.”
Naʻe toe fokotuʻutuʻu e ʻū tesí he ʻaho hono hokó. Naʻá ku tangutu mo Liana. Naʻe tangutu mai ʻa Neni he tafaʻaki ʻe taha ʻo e loki akó. Naʻe teke ʻe he ongo tamaiki fefine ia ne nofo ofi ki aí hona tesí ke mamaʻo pea hangē ʻokú ne tangutu toko taha peé. Naʻe hangē ʻe kamata ke ne tangí.
Hili ha ngaahi uike siʻi mei ai ne hiki ʻa Neni ki ha ʻapiako ʻe taha. Naʻe ʻi ai ha taʻahine ʻi homau uōtí ne ako ai, peá u ʻeke ange pe naʻe feʻiloaki mo e taʻahine foʻou ko hono hingoá ko Neni.
“Mahalo pē. Ko e taʻahine fēfē?” ko ʻene fehuʻí mai ia.
“ʻOku anga fakalongolongo. ʻOku mafuefue hono ʻulú, pea tui matasioʻata matolu. Naʻe ʻikai ha taha ia ʻi heʻeku kalasí ne saiʻia ai.”
Naʻá ne pehē mai, “Moʻoni? Pau pē ʻoku ʻikai ko e taʻahine tatau ia. Ko e taʻahine foʻou ʻoku ou ʻiló ʻoku fakaoli ʻaupito. ʻOku saiʻia e taha kotoa ai. Ko ha tokotaha soka tōtōatu ia.”
Naʻá ku fakakaukau ki he ʻaho naʻe siofi ai ʻe Neni ʻemau vaʻinga soká. Naʻá ne fie maʻu ha faingamālie mo ha kaungāmeʻa. Pea naʻá ku mei lava ke fakahoko fakatouʻosi kinaua.
ʻI he ʻaho ko iá ne u fai ha palōmesi ke angalelei maʻu pē ki he taha kotoa pea ʻoua naʻa ʻi ai ha taʻahine hangē ko Není ʻe mavahe meiate au ʻoku teʻeki ke u feinga ke hoko ko hono kaungāmeʻa.
Tā fakatātaaʻi ʻe Brad Clark