ʻĀmosi 3:7

ʻOku akoʻi mai ʻe he veesi ko ʻení ʻa e fatongia mahuʻinga ʻo e kau palōfitá.

7 Ko e moʻoni ʻe ʻikai fai ha meʻa ʻe [he ʻEiki] ko e ʻOtuá, kae taʻefakahā ia ki heʻene kau tamaioʻeiki ko e kau palōfitá” (ʻAmosi 3:7).

Ko e ʻEiki ko e ʻOtuá

“Koeʻuhí ko e ‘ofa ‘a ‘etau Tamaí ‘i Heʻene fānaú, te Ne foaki mai ai kiate kitautolu ‘a e fakahinohino ki he meʻa ‘oku mahuʻinga taha ‘i he moʻuí ni ‘o fekauʻaki mo e meʻa ʻe tuku ki ai ʻetau tokangá pea ‘omi ai ‘a e fiefiá, pe ko e ngaahi meʻa te tau taʻe tokanga ki aí ‘o hoko ai ʻa e mamahí. ‘Oku ‘i ai e taimi ‘e niʻihi te ne fakahā fakahangatonu pe ki ha taha ‘a e ngaahi meʻa ko ‘ení ‘i he ueʻi ‘a e Laumālié. Kae ʻikai ko ia pē, ka te Ne toe fakahā mai pē foki kiate kitautolu ‘a e ngaahi meʻa mahuʻinga ko ‘ení ‘o fakafou mai ʻi Heʻene kau tamaioʻeikí. … ‘Okú Ne fai ʻení koeʻuhi ke lava ‘o ‘ilo ‘e kinautolu ʻoku ‘ikai ke nau lava ‘o ongoʻi e ueʻi ‘a e Laumālié, ‘o kapau te nau fakafanongo, he kuo ‘osi fakahā ‘a e moʻoní kiate kinautolu pea kuo ‘osi fai ange mo e fakatokangá.”

Palesiteni Henry B. Eyring, Tokoni ‘Uluaki ‘I he Kau Palesitenisī ‘Uluakí, “Ko e Fāmilí,” Liahona, ‘Oka. 1998, 12; Ensign, Feb. 1998, 10.

ʻOkú Ne Fakahā

ʻOku founga fēfē e fetuʻutaki ʻa e ʻEikí mo ʻEne kau palōfitá? ʻOku lahi e ngaahi foungá ʻo kau ai e:

Ueʻi fakalaumālie mei he Laumālie Māʻoniʻoní (vakai, 2 Pita 1:21).
Ngaahi mata-meʻa-hā-mai mo e ngaahi misí (vakai, Nōmipa 12:6; 1 Nīfai 8:2).
ʻAʻahi mai ha kakai kuo sino fakalangi (vakai, Siosefa Sāmita—Hisitōlia 1:16–17; T&F 110:8).

Ko ʻEne Fakapulipulí

Ko e ʻuhinga totonu ʻo e foʻi lea faka-Hepelū ʻoku fakaʻaongaʻi ʻi he Tohi Tapú ki he fakapulipulí ʻoku ʻuhinga ia ko e “faleʻi,” pea ʻoku ʻuhinga ia ki he ngaahi palani pe ngaahi taumuʻa ʻa e ʻEikí.

Ko ʻEne Kau Tamaioʻeiki ko e Kau Palōfitá

“ʻOku toutou fakahā mai ʻe he folofolá ʻoku ʻomi ʻe he ʻEikí ʻEne ngaahi fekaú ki he fānau ʻa e tangatá ʻo fakafou mai he kau palōfita moʻuí. ʻOku ʻikai ha kōmiti, fakatahaʻanga, pe faʻahinga mafai ʻoku ʻi ai haʻanau totonu ke tala kiate Ia ha tokāteline ʻoku fepaki mo ʻEne fonó. Ko e ngaahi tāpuaki taʻengata ʻa e ʻOtuá ʻoku makatuʻunga pē ia mei heʻetau talangofuá mo e fai pau ki he folofola ʻa e ʻEikí ʻa ia ʻoku fakahā mai ʻi Heʻene kau palōfita māʻoniʻoní.”

ʻEletā L. Tom Perry ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku Mau Tui ki he Meʻa Kotoa pē Kuo Fakahā Mai ʻe he ʻOtuá.” Liahona, Nōv. 2003, 88.

Ko e hā e meʻa kuo kole mai kimuí ni ʻe he kau pālofita moʻuí mo e kau ʻaposetoló ke tau faí? Toe vakaiʻi e konifelenisi lahi fakamuimuitahá (vakai, conference.lds.org) pea fakakaukau ke hiki ʻi hoʻo tohinoá e ngaahi meʻa ʻoku ueʻi koe ke ke faí koeʻuhí ko e meʻa naʻe lea ʻaki ʻe he kau palōfita ʻa e ʻEikí.