Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni.
“Kuó u Fai ha Lelei ʻi he Māmaní He ʻAhó Ni?” peesi 14: Fakakaukau ke kamata ʻaki hano hivaʻi ʻo e “Fakamālō ki heʻOtuá” (Ngaahi Himi, fika 10). Mou lau fakataha e fakamatalá pe tomuʻa fili pē e ngaahi konga ʻoku mou saiʻia aí ke mou lau. Fehuʻi ki he kau mēmipa ʻo e fāmilí ʻa e meʻa ne nau ako ʻo kau kia Palesiteni Tōmasi S. Monisoní. Tufotufa atu ha ngaahi penivahevahe mo ha pepa ke lava ʻe he tokotaha kotoa pē ʻo hiki ʻene fakamoʻoni ko Palesiteni Monisoni ʻa e palofita moʻuí. Fakaafeʻi e kau mēmipa ʻo e fāmilí ke fakamālohia e fakamoʻoni ko ʻení ʻi he lotu fakamātoato. Fakakaukau ke fakaʻosi ʻaki hano hivaʻi ʻo e “Kuó U Fai ha Lelei?” (Ngaahi Himí, fika 129.)
“Fie Maʻu ʻo ha Kau Fakahokohoko Fakamotuʻalea Fakamāmani lahi,” peesi 34: Tomuʻa lau e fakamatalá. Fakamatalaʻi lolotonga e efiafi fakafāmili ʻi ʻapí hono ʻuhinga ʻoku hoko ai ʻa e fakahokohoko fakamotuʻalea ʻi he FamilySearch ko ha konga mahuʻinga ʻo e ngāue ki he hisitōlia fakafāmilí pea mo hono ʻuhinga ʻoku fie maʻu ai ke tokolahi ange ʻa e kau ngāue ki he fakahokohoko fakamotuʻaleá. Kapau ʻoku ʻi ai haʻo komipiuta pea ʻokú ke lava ʻo hū ki he ʻInitanetí, hū ki he indexing.familysearch.org. Fokotuʻu ha ngaahi ʻakauni maʻá e kau mēmipa kuo teʻeki ai ke nau fai e fakahokohoko fakamotuʻaleá kimuʻa pea mou ngāue fakataha ki he fakahokohoko fakamotuʻaleá.
“Muimui he Palōfitá,” peesi 42: Fakanounouʻi e fakamatala maʻa ho fāmilí. ʻE lava ke mou lau fakataha ʻa e konga fakaʻosi ʻo e fakamatalá, “Ko e Ako ke Fakafanongo ki he Lea ʻa e Palōfitá.” Toe fakamanatu e ngaahi kupuʻi lea ʻoku pehē ai ʻe ʻEletā Pēneti ʻe lava ʻo tokoni mai ke tau ʻiloʻi ai e ngaahi fakahinohino ʻoku fai mai ʻe he kau palōfitá kiate kitautolú. Fakaafeʻi e kau mēmipa ʻo e fāmilí ke nau fakafanongo ki he ngaahi kupuʻi lea ko ʻení ʻi he konifelenisi lahí he māhina ka hoko maí. Fakakaukau ke fakaʻosi ʻaki hoʻo fakamoʻoni ki he muimui he palōfitá.
“Toko Taha kae ʻIkai Tuēnoa,” peesi 54: Kamata ʻaki hono ʻeke ki he kau mēmipa ʻo e fāmilí pe kuo ʻi ai ha taimi naʻa nau ongoʻi tuēnoa ai ʻi heʻenau feinga ke moʻui ʻaki e ngaahi tuʻunga moʻui ʻa e ʻEikí. ʻOku nau fakafepakiʻi fēfē e ngaahi ongo ko ʻení? Vahevahe ange e talanoa kia Sione Kapalelá. Fakakaukau ke fakaafeʻi ha taha ke ne vahevahe mai e founga naʻá ne tauhi ʻaki e ngaahi fekaú lolotonga iá ne ʻikai fai pehē ha niʻihi kehe mo e founga ne tāpuakiʻi ai ia ʻi heʻene talangofuá.
“Fili He Taimí Ni Pē,” peesi 66: Hili hono lau e fakamatalá, tali mo hoʻo fānaú e ngaahi fehuʻi ʻi lalo he “ ʻIo pe ʻIkai?” Mou toki fakakaukau leva ki ha ngaahi meʻa lahi ange ʻoku hoko ʻe fie maʻu ai ke fili ʻi he meʻa ʻoku totonú mo ia ʻoku halá pea ʻeke ange pe ko e hā te nau faí ʻi he tūkunga takitaha.
Ueʻi ʻe he Tohi Lēsoni ʻa e Nēsilí
Ko e efiafi fakafāmili ʻi ʻapi ʻoku ou manatuʻi lelei tahá naʻe kamata ʻaki ia ha ʻekitivitī ʻi he tohi lēsoni ʻa e nēsilí. Naʻá ku fakatātaaʻi mo hoku malí mo ʻema kiʻi fānau fefine ʻe toko tolú ha kiʻi foʻi maau. Naʻa mau lau ʻeni: “Kapau ʻokú ke fuʻu lōloa ʻaupito, ʻoku ʻafioʻi mo ʻofaʻi koe ʻe he Tamai Hēvaní. Kapau ʻokú ke nounou ʻaupito, ʻOku ʻiloʻi mo ʻofa ʻa e Tamai Hēvaní ʻia koe. Māʻolunga, Siʻisiʻi, Māʻolunga, Siʻisiʻi, ʻoku ʻafioʻi mo ʻofaʻi kotoa kitautolu ʻe he Tamai Hēvaní.” Lolotonga ʻemau lau iá, ʻoku mau ʻai ke mau siʻisiʻi pe māʻolunga mo mau fakamahinoʻi ʻoku ʻofa e Tamai Hēvaní ʻiate kimautolu ʻo tatau ai pē pe ʻoku mau lahi fēfē. (Vakai, Vakai ki Hoʻomou Fānau Īkí [2008], 9.)
Hili iá naʻe ʻalu e fānaú mo hoku husepānití ʻo ʻomai e ngaahi foʻi taati fuaʻiʻakau ʻo mau kai fakataha ia. Naʻe maʻu e fiefia ʻema fānau fefiné pea nau loto ke mau toe fai pē ʻa e ʻekitivitī siʻisiʻi-mo-māʻolungá lolotonga e uiké.
Ko e meʻa ʻoku fakaʻofoʻofa ai e efiafi fakafāmili ʻi ʻapí ko e lava ko ia ke fulifulihi holó. ʻOku faʻa nounou mo faingofua pē ʻemau efiafi fakafāmili ʻi ʻapí he ʻoku kei iiki ʻema fānaú, ka ʻokú ma feinga ke akoʻi ki heʻema fānau fefiné ʻa e ngaahi tefitoʻi moʻoni hangē ko e ʻofá, angaʻofá, mo e lotu fakataha.
Valentina Potolani Simonovisi, ʻĪtali