Ngaahi Ongoongo Nounou Mei Māmani

Lea e Kau Takí ki he Kāingalotu Latinó ʻi ha Fakamafola Lea ʻi Nōvemá

Naʻe lea ʻa ʻEletā Kalauta D. Sīviki ʻo e Kau Fitungofulú mo ʻEletā Keuli B. Tokisī, ko e Fitungofulu Fakaʻēlia ʻo ʻIutā Sauté, ʻi ha fakataha fakalotu naʻe fakalele ʻe he ʻSiasí maʻá e kāingalotu ʻAmelika Latiná ʻi he tefito ko e “En la luz de Su amor” (“ ʻI he Maama ʻo ʻEne ʻOfá”), ʻa ia naʻe fai ʻi he ʻaho Sāpate, 13 ʻo Nōvema 2011.

Naʻe kau mai ha kāingalotu lea faka-Sipeini mo faka-Potukali ʻe lauiafe ʻo e Siasí mo honau ngaahi kaungāmeʻa ki he fakataha ko ʻeni ʻi he Senitā Konifelenisí pea ʻi he ngaahi falelotu ʻi ʻAmelika Noate, Lotoloto, mo Saute.

Ko e taʻu ʻeni ʻe valu hono fakahoko fakataʻu ʻe he Siasí ha ngaahi meʻa fakalaumālie naʻe fakatefito ʻi he tupu tokolahi ʻa e Kāingalotú ʻi he tukuikolo Latinó, ʻa ia naʻe kau ai ha ngaahi koniseti faka-Kilisimasi, ngaahi fakatahaʻanga fakalaumālie, mo e ngaahi faiva fakatātā. Naʻe fakaʻilongaʻi ʻe he fakataha fakalaumālie ʻo e 2011 ʻa e fuofua taimi ke fakamafola fakahangatonu ai e polokalama fakataʻú ki he ngaahi falelotu mavahe mei he ʻIunaiteti Siteití.

Feʻiloaki e Hoa ʻo e Palesiteni ʻo Honitulasí mo e Kau Palesitenisī ʻUluakí

Naʻe feʻiloaki ʻa e hoa ʻo e Palesiteni ʻo Honitulasí, ʻa Losa ʻElena Ponila ti Lopo, mo Palesiteni Tōmasi S. Monisoni mo Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, ʻi he ʻaho Tūsite, 8 ʻo Nōvema 2011, ko ha fakataha naʻá ne ui “ko ha faingamālie fakaʻofoʻofa.”

Lolotonga ʻene ʻaʻahi ki he hetikuota ʻo e Siasí, naʻá ne toe ʻaʻahi foki ʻo mamata ʻi Temipale Sikuea, Laipeli Hisitōlia Fakafāmilí, Senitā Konifelenisí, Senitā Tokoni ʻOfa Fakaetangata ʻo e Siasí, mo Uelofea Sikueá.

Naʻá ne fakamatala ki he tokoni kimuí ni mai ʻa e Siasí ʻi ha fuʻu tāfea lahi ʻi Honitulasi. Naʻá ne pehē, “Naʻa mou ʻoange ha toni meʻakai ʻe 90,000 he uike ʻe ua kuo ʻosí maʻá e kakai naʻe uesia ʻe he ʻuhá mo e tāfeá, pea ko ha taha ʻeni ʻo e ngaahi meʻa lahi ʻoku mou faí. ʻOku ou tui he taimí ni ʻoku ʻikai fakangatangata pe ʻi ai ha ngataʻanga ʻo e malava ko ia ʻe he Siasí [mo] ʻenau tukupā ke tokoniʻi ʻa kinautolu ʻoku faingataʻaʻia.”

Naʻe ʻaʻahi ʻa e hoa ʻo e Palesiteni ʻo Honitulasí, Losa ʻElena Ponila ti Lopo, ʻo mamata ʻi he ngaahi fale ʻo e Siasí ʻi Sōleki Sití ʻi ʻIutā, ʻi he USA ʻi Nōvema 8, 2011.

© IRI